ރިސޯޓް ލީގު 2023: ކޮއްދިއްޕަރާއި އެއްވަރުވެ، ޗެންޕިއަން ބަރޮސްއަށް ކުއާޓާގެ ފުރުސަތު ހަނިވެއްޖެ!

ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތް 2023 ގެ ނޯތު މާލޭ ޒޯނުގައި މިއަދު ހަވީރު ކުޅެވުނު ފުރަތަމަ މެޗުގައި ގުރޫޕް "ސީ" ގައި ބަރޮސް އާއި ކޮއްދިއްޕަރު ވާދަކުރި މެޗު 2-2 ގެ ނަތީޖާއަކުން ދެޓީމު އެއްވަރުވެއްޖެ އެވެ.

މިއަދުގެ ހަވީރު ކުޅެވުނު ފުރަތަަމަ މެޗުގައި ދެޓީމުގެ ފަރާތުން ވަރުގަދަ ކުޅުމެއް ފެނިގެންދިޔައިރު، މި މެޗުގައި ފުރަތަަމަ ލަނޑުޖަހައި ކުރިހޯދީ ބަރޮސް ޓީމުންނެވެ. މި ލަނޑު ފުރަތަމަ ހާފުގެ 08 ވަނަ މިނެޓުގައި ކާމިޔާބުކޮށްދިނީ އެޓީމުގެ އަހުމަދު ތޮލާލް އެވެ.

ފުރަތަަމަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ޗެންޕިއަން ބަރޮސް ކުރީގައި އޮވެގެންނެވެ.

ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، ކޮއްދިއްޕަރުން މެޗުގެ ނަތީޖާ އެއްވަރުކުރީ 36 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ އަހުމަދު ނައުޝާދު އެވެ. ނަމަވެސް އޭގެ ދެ މިނެޓު ފަހުން ބަރޮސް އިން ލަނޑެއް ކާމިޔާބުކޮށް ދެވަަނަ ފަހަރަށް މެޗުގެ ލީޑު ހޯދިއެވެ. މި ލަނޑު އެޓީމަށް ކާމިޔާބުކޮށްދިނީ މެޗުގެ ފުރަތަަމަ ލަނޑު ވެސް ކާމިޔާބުކޮށްދިން އަހުމަދު ތޮލާލު އެވެ.

މިއީ އަރިމަތިން އެޓީމުގެ ކުޅުންތެރިއަކު ގޯލު ކުރިމައްޗަށް ހުރަސްކޮށްދިން ބޯޅައެއް ކޮއްދިއްޕަރުގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ، އެއްފަހަރުން ޖަހައި ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ބަރޮސް މޮޅުވާން ދަނިކޮށް މެޗުގެ އެންމެ ފަހު މިނެޓްގައި ކޮއްދިއްޕަރުގެ އަހުމަދު ނައުޝާދު ވަނީ ލަނޑެއް ކާމިޔާބުކޮށް މެޗުގެ ނަތީޖާ ދެވަނަ ވަރަށް އެޓީމަށް އެއްވަރުކޮށްދީފައެވެ.

މިއީ ކޮއްދިއްޕަރުގެ ކުޅުންތެރިއަކު ފޮނުވާލި ހަމަލާ ބަރޮސްގެ ކީއްޕަރު އަތުގައި ޖެހިފައި ނުކުތް ވަގުތު މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި މި މެޗުގެ މޭން އޮފް ދަ މެޗަކަށް ވެސް ހޮވުނީ ކޮއްދިއްޕަރު ޓީމުގެ ދެ ލަނޑުވެސް ކާމިޔާބުކޮށްދިން އަހުމަދު ނައުޝާދުއެވެ.

މިގުރޫން ކޮންމެ ޓީމެއް ދެ މެޗު ކުޅެފައިވާއިރު، މިވަގުތު އެއްވަނައިގައި އޮތް ކުޅުނު ދެ މެޗުން މޮޅުވެ ހަ ޕޮއިންޓާއެކު އޮތް ކުޑަހުރާ އެވެ. ދެވަނައިގައި އޮތް ޖުމައިރާއަށް ދެމެޗުން ތިން ޕޮއިންޓް ލިބިފައިވާއިރު، މި ގުރޫޕްގެ ތިންވަނައިގައި އޮތީ އެއް ޕޮއިންޓާއި ގެއްލުން ދެ ގޯލާއިއެކު ކޮއްދިއްޕަރެވެ. އަދި ހަތަރު ޓީމު ހިމެނޭ މި ގުރޫޕުގެ ފުލުގައި އޮތީ އެއް ޕޮއިންޓާއި ގެއްލުން 06 ގޯލާއިއެކު އެންމެ ފަހުގެ ޗެމްޕިއަން ބަރޮސް އެވެ.