ދެމަފިރިން ރީލް ހެދުމުގައި؛ ތުއްތު ދަރިފުޅު ރާޅުތަކުގެ ތެރޭގައި؛ ގިނަ ބައެއްގެ ފާޑުކިޔުން އަމާޒުވެއްޖެ

ގޮނޑުދޮށެއްގައި ސޯޝަލް މީޑިއާ ރީލެއް ހެދުމަށް ދެމަފިރިއަކު ސަމާލުކަން ދީގެން އުޅެނިކޮށް، އެމީހުންގެ ތުއްތު ދަރިފުޅު ރާޅުތަކުގެ ތެރެއަށް ވެއްޓި ހާލުގައި ޖެހިފައިވަނިކޮށް އެހެން މީހަކު އެ ކުއްޖާ ސަލާމަތްކުރާ މަންޒަރު ފެންނަ ވީޑިއޯއެއް އާންމުވެ، ގިނަ ބައެއްގެ ފާޑުކިޔުން އަމާޒުވެއްޖެއެވެ.

އާންމުވެފައިވާ ވީޑިއޯއިން ފެންނަ ގޮތުގައި، އެ ދެމަފިރިން ސެލްފީ ސްޓިކެއް ބޭނުންކޮށްގެން އަމިއްލައަށް ވީޑިއޯ ރެކޯޑްކުރަމުން ގޮނޑުދޮށުގައި ހިނގަމުން ދިޔައެވެ. އެވަގުތު އަންހެންމީހާ ކުޑަކުއްޖާގެ އަތުގައި ހިފައިގެން ހުރި ނަމަވެސް، ކުއްލިއަކަށް އެ ކުއްޖާ ވެއްޔަށް ވެއްޓި، ބީއްސަމުންދިޔަ ރާޅުތަކުގެ ތެރެއަށް ދަމައިގަނެ އެނބުރެން ފެށިއެވެ.

ކުއްޖާ ވެއްޓުމުން އަންހެންމީހާ ކުޑަކޮށް ފަހަތް ބަލައިލި ނަމަވެސް، އަޅާނުލައި އަނެއްކާވެސް ކެމެރާއަށް ހިނިތުންވެ ޕޯޒްކުރަން ފެށިއެވެ. އަދި ފިރިހެންމީހާ ވެސް އެއްވެސް ސަމާލުކަމެއް ނުދީ ވީޑިއޯ ނެގުމުގައި ކުރިއަށް ދިޔައެވެ. ތުއްތު ކުއްޖާ ތިލަ ރާޅުތަކުގެ ތެރޭގައި އެނބުރެމުން ދިޔައިރު ވެސް، އެ ދެމަފިރިން ތިބީ ވީޑިއޯ ހެދުމުގެ ފޯރީގައެވެ. މި ހާދިސާގައި ކުއްޖާ ސަލާމަތްކޮށްފައިވަނީ އެވަގުތު އެ ސަރަހައްދުން ދިޔަ އެހެން މީހަކު ދުވެފައި އައިސް، ފެނުގެ ތެރެއިން އެ ކުއްޖާ ނަގައިގެންނެވެ.

މި ވީޑިއޯ 'އެކްސް' ގައި ހިއްސާކުރި މަރިޔަމް ކިޔާ އަންހެނަކު ބުނެފައިވަނީ، މި ހާދިސާ ހިނގީ އޭނާގެ ފިރިމީހާއާއެކު ގޮނޑުދޮށަށް ގޮސް އުޅުނު ވަގުތު ކަމަށެވެ. އަދި އެ ދެމަފިރިން ރީލް ހެދުމަށް މާބޮޑަށް ގެއްލިފައި ތިބުމުގެ ސަބަބުން، ދަރިފުޅަށް ކުރިމަތިވި ނުރައްކާ އެމީހުންނަށް ރޭކާވެސް ނުލި ކަމަށް އޭނާ ތުހުމަތުކުރިއެވެ. ކުއްޖާ ރާޅާއެކު ދަމައިގަތުމުގެ ކުރިން ސަލާމަތްކުރެވުނީ އެ މަގުން ދިޔަ މީހެއްގެ ހުށިޔާރުކަމުން ކަމަށްވެސް އޭނާ ފާހަގަކުރިއެވެ.

ސޯޝަލް މީޑިއާއަށް ދެވިހިފާފައިވާ މިންވަރާމެދު ސުވާލު އުފައްދަމުން މަރިޔަމް ވަނީ، އަމިއްލަ ދަރިންނަށް އިހުމާލުވާ މިންވަރަށް ރީލް ހެދުން މުހިންމުވީތޯ ސުވާލުކޮށްފައެވެ.

މި ހާދިސާ ހިނގި ސީދާ ތަނެއް، ދުވަހެއް އަދި ވީޑިއޯއިން ފެންނަ މީހުންނަކީ ކޮން ބައެއްކަން އަދި މިހާތަނަށް ކަށަވަރުވެފައެއް ނުވެއެވެ. ނަމަވެސް މި ވީޑިއޯއާއެކު އިންޓަނެޓުގައި ގިނަ ބަޔަކު ދަނީ އެ ދެމަފިރިންގެ ޒިންމާދާރުކަން ކުޑަކަމުން އެކަމަށް ވަރަށް ބޮޑަށް ނުރުހުން ފާޅުކުރަމުންނެވެ.