ޕާކިސްތާނުން ރައީސުލްޖުމްހޫރިއްޔާ ޑރ. މުއިއްޒުއަށް ރަސްމީކޮށް މަރުޙަބާ ދަންނަވައިފި

ޕާކިސްތާނަށް މިހާރު ފުރަމާނަ ދަތުރުފުޅެއް ކުރައްވަމުން ގެންދަވާ ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް އެ ޤައުމުން ރަސްމީކޮށް މަރުޙަބާ ދަންނަވައިފިއެވެ.

ރައީސުލްޖުމްހޫރިއްޔާ ޑރ. މުޢިއްޒަށް ރަސްމީކޮށް މަރުޙަބާ ދެންނެވުން އޮތީ މިއަދު ހެނދުނު ޕާކިސްތާނުގެ ބޮޑުވަޒީރު މުޙައްމަދު ޝެހްބާޒް ޝަރީފްގެ ރަސްމީ ގެކޮޅުގައި ބޭއްވި ޚާއްޞަ ރަސްމިއްޔާތެއްގައެވެ. ރައީސް ޑރ. މުޢިއްޒު ޕާކިސްތާނަށް ވަޑައިގެންނެވީ އިއްޔެ ހަވީރުގެ ވަގުތެއްގައެވެ. މި ދަތުރުފުޅަކީ ޕާކިސްތާނުގެ ބޮޑުވަޒީރު މުޙައްމަދު ޝެހްބާޒް ޝަރީފްގެ ދަޢުވަތަކަށް ކުރައްވާ ރަސްމީ ދަތުރުފުޅެކެވެ.

މިއީ ވޭތުވެދިޔަ 10 އަހަރު ދުވަހުގެ ތެރޭގައި ރާއްޖޭގެ ރައީސުލްޖުމްހޫރިއްޔާއަކު ޕާކިސްތާނަށް ކުރައްވާ ފުރަތަމަ ފުރަމާނަ ދަތުރުފުޅުކަން ފާހަގަކޮށްލެވެއެވެ.

މިއަދުގެ ރަސްމިއްޔާތުގައި ރައީސް ޑރ. މުޢިއްޒަށް ރަސްމީކޮށް މަރުޙަބާ ދެންނެވުމަށްފަހު، ދެ ޤައުމުގެ ދެމެދުގައި އޮތް ޒަމާންވީ އަޚުވަންތަ ގުޅުމުގެ ރަމްޒެއްގެ ގޮތުން، ބޮޑުވަޒީރުގެ ރަސްމީ ގެކޮޅުގެ ގޯތިތެރޭގައި ދެ ލީޑަރުން ވަނީ ގަހެއް އިންދަވައިދެއްވާފައެވެ.

ރައީސް ޑރ. މުޢިއްޒުގެ މި ދަތުރުފުޅުގެ ރަސްމީ ހަރަކާތްތައް މިއަދު ފެށިގެން ކުރިއަށްދާއިރު، ދެ ޤައުމުގެ ދެމެދުގައި ގުޅުން ބަދަހިކުރުމުގެ ގޮތުން މުހިންމު އެއްބަސްވުންތަކެއްގައި ސޮއިކުރުމަށް ވަނީ ހަމަޖެހިފައެވެ. އޭގެ ތެރޭގައި ޞިއްޙީ ދާއިރާއާއި، އިޤްތިޞާދީ ދާއިރާގެ އިތުރުން ބޭސްވެރިކަމުގެ ދާއިރާއިން ގުޅުން ބަދަހިކުރުމުގެ މުހިންމު ފަހުމުނާމާތަކެއް ހިމެނެއެވެ.

މީގެއިތުރުން، ދެ ޤައުމުގެ ދެމެދުގައި ވިޔަފާރިއާއި އިންވެސްޓްމަންޓްގެ ފުރުޞަތުތައް ފަހިކުރުމުގެ މަޤްޞަދުގައި ބާއްވާ ޚާއްޞަ "އިންވެސްޓްމަންޓް ފޯރަމް" މާދަމާ ކުރިއަށްގެންދިއުމަށް ވަނީ ތާވަލުކުރެވިފައެވެ. މި ދަތުރުފުޅުގެ ސަބަބުން ދެ ޤައުމުގެ ދެމެދުގައި އޮތް އެކުވެރި ގުޅުން އިތުރަށް ބަދަހިވެގެންދާނެ ކަމަށް ބެލެވެއެވެ.