ފޯޑަންގެ ހެޓްރިކާއެކު ސިޓީން އޭއީކޭ އެތެންސް ބަލިކޮށްފި

ޔުއެފާ ޗެމްޕިއަންސްލީގްގައި ރޭ ގްރީސްގެ އޭއީކޭ އެތެންސް އާއި އިނގިރޭސިވިލާތުގެ މެންޗެސްޓަރ ސިޓީ ބައްދަލުކުރިމެޗް ސިޓީ ކާމިޔާބުކޮށްފިއެވެ.

މެންޗެސްޓަރ ސިޓީގެ އިއްތިހާދު ސްޓޭޑިއަމްގައި ކުޅުނު މިމެޗް ސިޓީ ކާމިޔާބުކުރީ 5-1 ގެ ނަތީޖާއިންނެވެ. މިމެޗްގައި އެންމެ ފާހަގަކުރެވިގެން ދިޔައީ، ފިލް ފޯޑަން އެވެ. މި މެޗްގައި އޭނާ ވަނީ ހެޓްރިކް ހަދާފައެވެ.

މެޗްގައި މެންޗެސްޓަރ ސިޓީއަށް ގޯލް ހުޅުވާލަދިނީ، ޒުވާން ކުޅުންތެރިޔާ ރީކޯ ލުވިސް ތަނަވަސްކޮށްދިން ފުރުސަތެއްގައި، 12 ވަނަ މިނެޓް ތެރޭގައި އެންޑަސަންއެވެ. ދެވަނަ ލަނޑު 34 ވަނަ މިނެޓް ތެރޭގައި ފޯޑެން ކާމިޔާބުކޮށްދިން އިރު، ފުރަތަމަ ހާފް ނިމުނީ 2-0 ގެ ނަތީޖާއިން ސިޓީ ކުރީގައި އޮވެގެންނެވެ. ދެވަނަ ހާފް ފަށައިގެން އޭއީކޭގެ ޕިލިއޯސް ވަނީ ލަނޑެއް ޖަހއި އުއްމީދު އާކޮށްދީފައެވެ. ނަމަވެސް، އޭގެ ފަސް މިނެޓު ފަހުން ރަޔާން ޗެރްކީ ޖެހި ލަނޑާއެކު ސިޓީން ވަނީ އަލުން ލީޑު ފުޅާކޮށްފައެވެ.

މެޗްގައި ފެނިގެންދިޔަ އަނެއް ދެ ލަނޑު ފޯޑެން ކާމިޔާބުކޮށްދިން އިރު، މިއީ 2024 ވަނަ އަހަރުގެ އޭޕްރީލް މަހަށްފަހު އޭނާ މެޗެއްގައި ތިން ލަނޑު ހަމަކުރި ފުރަތަމަ ފަހަރެވެ.