ދެ ޤައުމުގެ ވިޔަފާރިވެރިންގެ ބައްދަލުވުމުގެ ސަބަބުން އިންވެސްޓްމަންޓްގެ ފުރުޞަތުތައް ހުޅުވިގެންދާނެ: ޕާކިސްތާނު ބޮޑުވަޒީރުގެ ނައިބު

ދިވެހިރާއްޖެއާއި ޕާކިސްތާނުގެ ވިޔަފާރިވެރިން ސީދާ ބައްދަލުކޮށް ކުރާ މަޝްވަރާތަކުގެ ސަބަބުން، ވިޔަފާރިއާއި އިންވެސްޓްމަންޓްގެ އައު ފުރުޞަތުތައް ހުޅުވިގެންދާނެ ކަމަށް ޕާކިސްތާނުގެ ބޮޑުވަޒީރުގެ ނައިބު އަދި ޚާރިޖީ ވަޒީރު ސެނެޓަރ މުޙައްމަދު އިސްޙާޤު ދާރު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހާރު ޕާކިސްތާނަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން، މިއަދު އިސްލާމްއާބާދުގައި އެމަނިކުފާނުގެ އަރިހަށް ކުރެއްވި އިޙުތިރާމުގެ ޒިޔާރަތެއްގައެވެ.

ޕާކިސްތާނުގެ ފޮރިން މިނިސްޓްރީން "އެކްސް" ގައި ކޮށްފައިވާ ޕޯސްޓެއްގައި ބަޔާންކޮށްފައިވާ ގޮތުގައި، މި ބައްދަލުކުރެއްވުމުގައި ބޮޑުވަޒީރުގެ ނައިބު ވަނީ ޕާކިސްތާނުގެ ރައީސް އާޞިފް ޢަލީ ޒަރްދާރީ އަދި ބޮޑުވަޒީރު މުޙައްމަދު ޝެހްބާޒް ޝަރީފްގެ ފަރާތްޕުޅުން ރައީސް ޑރ. މުޢިއްޒަށް ހެޔޮއެދުންތައް އަރިސްކުރައްވައި، ރައީސްގެ ދެކަނބަލުންނަށާއި ދިވެހި ވަފުދަށް ޕާކިސްތާނުން ހޫނު މަރުޙަބާއެއް ދަންނަވާފައެވެ.

މި ބައްދަލުކުރެއްވުމުގައި ވާހަކަފުޅު ދައްކަވަމުން، ރާއްޖެއާއި ޕާކިސްތާނާ ދެމެދު އޮތް ޒަމާންވީ އަޚުވަންތަ ގުޅުން އިތުރަށް ބަދަހިކުރުމަށް ޕާކިސްތާނުން އަބަދުވެސް މަސައްކަތްކުރާނެ ކަމުގެ ޔަޤީންކަން އިސްޙާޤު ދާރު ދެއްވިއެވެ. އަދި ދެ ޤައުމުގެ ދެމެދުގައި އޮތް ގުޅުން، ޚާއްޞަކޮށް ވިޔަފާރިއާއި، އިންވެސްޓްމަންޓް، ތަޢުލީމު، މޫސުމަށް އަންނަ ބަދަލުތައް އަދި ފަތުރުވެރިކަމުގެ ދާއިރާއިން ފުޅާކުރުމުގެ މުހިންމުކަމުގެ މައްޗަށް އެމަނިކުފާނު އަލިއަޅުއްވާލެއްވިއެވެ.

މީގެއިތުރުން، "މޯލްޑިވްސް-ޕާކިސްތާން ބިޒްނަސް ފޯރަމް" ގައި ރާއްޖޭގެ ވިޔަފާރިވެރިންގެ ވަފުދުން ބައިވެރިވާތީ އެކަމަށް މަރުޙަބާ ވިދާޅުވަމުން، ދެ ޤައުމުގެ ވިޔަފާރިވެރިންގެ މެދުގައި (ބީ2ބީ) ކުރެވޭ މުޢާމަލާތްތަކުގެ ސަބަބުން، ވިޔަފާރިއާއި އިންވެސްޓްމަންޓްގެ ދާއިރާއިން އަމަލީ ގޮތުން ފައިދާހުރި ނަތީޖާތަކެއް ނެރެވޭނެ ކަމަށް އުންމީދު ކުރައްވާ ކަމަށްވެސް އެމަނިކުފާނު ވިދާޅުވިއެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، އެމަނިކުފާނަށާއި ދިވެހި ވަފުދަށް ޕާކިސްތާނު ސަރުކާރުން ކިޔާފައިވާ ހޫނު މަރުޙަބާއާއި އަދާކުރެއްވި މެހުމާންދާރީއަށްޓަކައި އިޚްލާޞްތެރިކަމާއެކު ޝުކުރު އަދާކުރައްވާފައެވެ. އަދި ދިވެހިރާއްޖެއިން އަބަދުވެސް އެދެނީ ޕާކިސްތާނާއެކު އޮތް ގާތް ގުޅުން އިތުރަށް ބަދަހިކޮށް، ދެ ޤައުމަށްވެސް ފައިދާހުރި އައު ދާއިރާތަކުން ގުޅުން ބަދަހިކުރުމަށް ކަމުގައި ރައީސުލްޖުމްހޫރިއްޔާ ވިދާޅުވިއެވެ.