ރައީސް މުޢިއްޒު ޕާކިސްތާނަށް ފުރާވަޑައިގެންފި؛ މިއީ ދިހަ އަހަރަށްފަހު ދިވެހި ރައީސަކު ކުރާ ފުރަތަމަ ދަތުރު

ޕާކިސްތާނުގެ ބޮޑުވަޒީރުގެ ދަޢުވަތަކަށް، ރައީސް ޑޮކްޓަރ މުޙައްމަދު މުޢިއްޒު ތިން ދުވަހުގެ ފުރަމާނަ ދަތުރުފުޅެއްގައި މިއަދު ހެނދުނު އެ ޤައުމަށް ފުރާވަޑައިގެންފިއެވެ.

ރައީސް މުޢިއްޒަށް ދަޢުވަތު ދީފައިވަނީ ޕާކިސްތާނުގެ ބޮޑުވަޒީރު މުޙައްމަދު ޝެހްބާޒް ޝަރީފެވެ. މި މަހުގެ 22 އަށް ދެމިގެންދާ މި ދަތުރުފުޅުގައި ރައީސް، ޕާކިސްތާނުގެ ރައީސް އާޞިފް ޢަލީ ޒަރުދާރީ، ބޮޑުވަޒީރު ޝެހްބާޒް ޝަރީފް އަދި އެ ޤައުމުގެ އެހެން އިސްވެރިންނާ ބައްދަލުކުރައްވާނެއެވެ.

ދެ ޤައުމުގެ ދެމެދުގައި އޮތް ގާތް ގުޅުން އިތުރަށް ވަރުގަދަކުރުމަށް ރައީސާއި ބޮޑުވަޒީރު ޝެހްބާޒް ޝަރީފްގެ ދެމެދުގައި ރަސްމީ ވާހަކަދެއްކުންތައް ބާއްވާނެއެވެ. އެ ވާހަކަދެއްކުންތަކުގެ ފަހުން، އެކި ދާއިރާތަކުގައި އެއްބާރުލުން އިތުރުކުރުމާ ބެހޭ ގިނަ ފަހުމުނާމާތަކެއް ބަދަލުކުރުމުގެ ރަސްމިއްޔާތުގައި ދެ ލީޑަރުން ބައިވެރިވާނެއެވެ.

މި ދަތުރުފުޅުގައި ރައީސްގެ އަރިހުގައި ފަސްޓް ލޭޑީ ސާޖިދާ މުޙައްމަދު، ވަޒީރުންގެ މަޖިލީހުގެ މެންބަރުން އަދި ސަރުކާރުގެ އިސްވެރިން ހިމެނޭ ވަފުދެއް ބައިވެރިވެވަޑައިގެންފައިވެއެވެ.

މިއީ ފާއިތުވި ދިހަ އަހަރުގެ ތެރޭގައި ދިވެހި ރައީސަކު ޕާކިސްތާނަށް ކުރައްވާ ފުރަތަމަ ދަތުރުފުޅެވެ. ރައީސް މުޢިއްޒުގެ ޚާރިޖީ ސިޔާސަތު ބިނާކުރައްވާފައިވަނީ "މޯލްޑިވްސް ފަސްޓް" ޝިޢާރުގެ މަތީގައި ކަމަށާއި، އެ ސިޔާސަތުގެ ދަށުން އަވައްޓެރި ޤައުމުތަކާ ގާތް ގުޅުން ބެހެއްޓުމަށް ރައީސް އިސްކަންދެއްވަމުން ގެންދަވާނެ ކަމަށް ރައީސް އޮފީހުން ބުނެއެވެ.

ރާއްޖެއާއި ޕާކިސްތާނާ ދެމެދު ޚާރިޖީ ގުޅުން ޤާއިމުކުރީ 26 ޖުލައި 1966 ގައެވެ.