ޑްރަގް ޓްރެފިކިންގެ ތުހުމަތުގައި ހައްޔަރުކުރި ތިން ޒުވާނުންގެ ބަންދަށް އިތުރު 10 ދުވަސް ޖަހައިފި

ދެ ކިލޯއާ ގާތް އަދަދެއްގެ މަސްތުވާތަކެއްޗާއި 230 ވޭޕް ކާޓްރިޖާއެކު ޑްރަގް ޓްރެފިކިންގެ ތުހުމަތުގައި މާލެއިން ހައްޔަރުކުރި ތިން ޒުވާނުންގެ ބަންދަސް އިތުރު 10 ދުވަސް ޖަހަން ކްރިމިނަލް ކޯޓުން އިއްޔެ ނިންމައިފިއެވެ.

ބަންދު މުއްދަތު އިތުރުކުރީ މަރިޔަމް އިޝާ އަޝްރަފް، ހުސައިން ޝާވިން އަދި މުހައްމަދު ނާހިލްގެ ބަންދަށެވެ. އެ ތިން މީހުންގެ މައްޗަށް ކުރެވިފައިވަނީ މަސްތުވާތަކެތި ގެންގުޅުމާއި ބޭނުންކުރުމުގެ އިތުރުން، އެ ތަކެތީގެ ވިޔަފާރިކޮށް ޓްރެފިކްކުރުމުގެ ތުހުމަތެވެ.

މި ތިން މީހުން ހައްޔަރުކުރެވުނީ މިދިޔަ މަހުގެ ތިން ވަނަ ދުވަހުއެވެ. އެ ދުވަހު އިޝާއާއި ޝާވިން 15 ދުވަހަށް ބަންދުކުރި އިރު، ނާހިލް ބަންދުކުރީ ފަސް ދުވަހަށެވެ. އެ މުއްދަތު ހަމަވުމުން، މިދިޔަ މަހުގެ އަށް ވަނަ ދުވަހު ނާހިލްގެ ބަންދަށް 10 ދުވަސް އިތުރުކުރިއެވެ. ދެން، މިދިޔަ މަހުގެ 19 ވަނަ ދުވަހު ތިން މީހުންގެ ބަންދަށް 30 ދުވަސް ޖެހިއެވެ.

ބަންދު އަމުރުތަކުން އެނގޭ ގޮތުގައި، ތުހުމަތުކުރެވޭ ކުށް އެ ތިން މީހުން ކުރިކަމަށް ތުހުމަތުކުރެވޭ މިންވަރުގެ ހެކި ހުށަހަޅާފައިވާތީ، އެ ތިން މީހުން ބަންދުގައި ބަހައްޓަން ނިންމާފައިވެއެވެ. އެ ހެކިތަކުގެ ތެރޭގައި ހާދިސާ ހިނގި ތަނަށް ދިޔަ ފުލުހުންގެ ބަޔާން، މަސްތުވާތަކެތީގެ ތަހުލީލު ނަތީޖާ، ސޯކޯ ރިޕޯޓު، ތަހުގީގަށް ދީފައިވާ ބަޔާން އަދި ކުޑަކަމުދާ ތަކެތީގެ ތަހުލީލު ރިޕޯޓު ހިމެނެއެވެ.

މި ތިން މީހުން ތިބި އެޕާޓްމެންޓުން ގިނަ އަދަދެއްގެ މަސްތުވާތަކެތި ފެނިފައިވާ ކަމަށާއި، ތިން މީހުންގެ ކުޑަކަމުދާ ތަކެތި މަސްތުވާތަކެއްޗަށް ޕޮޒިޓިވްވެފައިވާ ކަމަށް ވެސް ބަންދު އަމުރުތަކުގައި ބުނެފައިވެއެވެ.

ނާހިލްއާއި އިޝާގެ ބަންދު އަމުރުތަކުގައިވާ ގޮތުން، މަސްތުވާތަކެތި ފެނުނީ އެ ދެ މީހުން ދިރިއުޅޭ ތަނުން ނޫނެވެ. އިޝާއާއި ޝާވިންނަކީ ހައްޔަރާއި ބަންދުގެ ރެކޯޑު އޮތް ދެ މީހުން ކަމަށް ވެސް ބަންދު އަމުރުތަކުގައި ފާހަގަކޮށްފައިވެއެވެ. އޭނާގެ މައްޗަށް ކުރާ ތުހުމަތުތަކަށް ޝާވިން އިންކާރުކުރާ އިރު، ތިން މީހުން ވެސް ޝަރުތުތަކާއެކު ބަންދަށް ލުއިދިނުމަށް އެދިފައިވެއެވެ.

އެ އޮޕަރޭޝަނުގައި 1.7 ކިލޯގެ މަސްތުވާތަކެތި ކަމަށް ބެލެވޭ ތަކެތި ފެނުނު ކަމަށް ފުލުހުން ކުރިން ބުނެފައިވެއެވެ. އޭގެ އިތުރުން، މަސްތުވާތަކެތި އެކުލެވިގެންވާ ކަމަށް ބެލެވޭ 230 ވޭޕް ކާޓްރިޖް، 26 ފުޅި ވޭޕް ފްލޭވާ އަދި ބަނގުރާ ފުޅިއެއް ވެސް އެ ގެއިން ފެނުނު ކަމަށް ފުލުހުން ބުނެފައިވެއެވެ.