ހުޅުމާލޭ މަގުމަތީގެ ރައްކާތެރިކަން ކަށަވަރުކުރުމަށް މަގުތަކުގައި ސްޕީޑް ބްރޭކަރުތައް ހަރުކުރަނީ

ހުޅުމާލޭގެ މަގުމަތީގެ ސަލާމަތާއި ރައްކާތެރިކަން ކަށަވަރުކޮށް، އެކްސިޑެންޓުތައް މަދުކުރުމަށްޓަކައި ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން މަގުތަކުގައި އައު ސްޕީޑް ބްރޭކަރުތައް ހަރުކޮށް ކުރިން ހުރި ބްރޭކަރުތައް މަރާމާތުކުރުމުގެ މަސައްކަތް ފަށައިފިއެވެ.

އެޗްޑީސީން ބުނި ގޮތުގައި މި މަސައްކަތް ކުރިއަށް ގެންދަނީ ދިވެހި ފުލުހުންގެ ޚިދުމަތުގެ ފަންނީ ލަފައާ އެއްގޮތްވާ ގޮތުގެ މަތިންނެވެ. އެގޮތުން، މި މަހުގެ 8 ވަނަ ދުވަހުން ފެށިގެން މި މަސައްކަތް ފަށާފައިވާއިރު، ބަންޕަރުތައް އަޅަމުންދަނީ ފުލުހުންގެ ދިރާސާތަކުން އެކްސިޑެންޓު ގިނައިން ހިނގާކަމަށް ފާހަގަކުރެވިފައިވާ ސަރަޙައްދުތަކުގައެވެ.

މިފަހަރު އަޅަމުން ގެންދަނީ ހުޅުމާލޭގެ މަގުތައް ފުރަތަމަ ހެދިއިރު ވެސް ބޭނުންކުރި ފަދަ ފެންވަރު ރަނގަޅު ސްޕީޑް ބްރޭކަރު ނުވަތަ ތާރު ބަންޕަރުތަކެކެވެ. މީގެއިތުރުން، މަގުމަތީގެ ނިޝާންތައް ހަރުކުރުމުގެ މަސައްކަތް ވެސް ވަނީ ކުރުމަށް ނިންމާފައިވާކަމަށްވެސް އެޗްޑީސީން ބުންޏެވެ.

އެޗްޑީސީން ބުނީ މި މަސައްކަތްތަކުގެ މައިގަނޑު މަޤްޞަދަކީ ދުއްވާ ފަރާތްތަކަށާއި ހިނގާބިނގާވެ އުޅޭ ފަރާތްތަކަށް ރައްކާތެރި މާޙައުލެއް ޤާއިމުކޮށްދިނުމެވެ. އަދި ހުޅުމާލެއަކީ އަމާން އަދި ރައްކާތެރި ވެށްޓަކަށް ހެދުމަށްޓަކައި އެ ކޯޕަރޭޝަނުން މެދުނުކެނޑި މަސައްކަތް ކުރަމުންދާނެ ކަމަށް ވެސް ބަޔާންކޮށްފައިވެއެވެ.

މީގެކުރިން ވެސް ހުޅުމާލޭގައި އެޅި ބަންޕަރުތަކުގެ ސަބަބުން އެކްސިޑެންޓުތައް 70 އިންސައްތައާއި 80 އިންސައްތައާ ދެމެދުގެ މިންވަރަކަށް ދަށްވިކަމަށް ފުލުހުންގެ ތަފާސްހިސާބުތަކުން ދައްކައެވެ. ނަމަވެސް، އެ ބަންޕަރުތަކުގެ ޑިޒައިނާއި ބޭނުންކުރި ތަކެއްޗާ ގުޅޭގޮތުން ޢާންމުންގެ ޝަކުވާތަކެއް ހުރުމުން ފަހުން ވަނީ އެ ތަކެތި ނަގާފައެވެ.