އިސްރާއީލުގެ ރައްޔިތުންނަށް އެއްވެސް ޕްރޮޖެކްޓަކުން އެއްވެސް ތަނެއް ގަނެ، ވިއްކައި، ކުއްޔަކަށް ނުހޯދޭނެ: ރައީސް މުޢިއްޒު

އިސްރާއީލުގެ ރައްޔިތުންނަށް އެއްވެސް ޕްރޮޖެކްޓަކުން އެއްވެސް ތަނެއް ގަނެ، ވިއްކާ، ކުއްޔަކަށް ނުހޯދޭނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު މިހެން ވިދާޅުވެފައިވަނީ، ރައީސް އޮފީހުން ބާއްވާ "ދަ ޕްލަސް" ޕްރޮގްރާމުގައި މިއަދު ވާހަކަދައްކަވަމުންނެވެ.

އެމަނިކުފާނު ވިދާޅުވީ، ކުޑަ ދުވަސްކޮޅެއްގެ ތެރޭގައި "ރިއަލް އެސްޓޭޓް" ގާނޫނެއް ސަރުކާރުން އެކުލަވައިލާނެ ކަމަށާއި ވަކި އެއް ގައުމެއްގެ ނަސްލަކަށް ނިސްބަތްވާ މީހުން ވަކި އިންސައްތައަކަށް ލިމިޓް ކުރައްވާނެ ކަމަށެވެ.

އަޅުގަނޑުމެން ރިއަލް އެސްޓޭޓްއާ ބެހޭ ގާނުނެއް ތައާރަފްކުރުން އޮތީ ކުޑަ ދުވަސްކޮޅެއްގެ ތެރޭގަ. ވަކި އެއް ގައުމެއްގެ ނަސްލަކަށް ނިސްބަތްވާ މީހުން އިނގޭތޯ، އެ ވަކި އިންސައްތައަކަށް ލިމިޓްކުރާނަން. އަޅުގަނޑުމެން ކަނޑައަޅާފައިވަނީ، އެއްވެސް ގައުމެއްގެ ރައްޔިތުން އެންމެ ގިނަ ވެގެން 25 އިންސައްތައަށޭ ތިބެވޭނީ، އިނގޭތޯ. އެއަށްވުރެ ގިނައިން ވަކި ގައުމެއްގެ ރައްޔިތުންނަކަށް ނުތިބެވޭނެ. ރައީސް މުޢިއްޒު ވިދާޅުވިއެވެ.

އެމަނިކުފާނު މީގެ އިތުރުން ވިދާޅުވީ، އަމުދުން އިސްރާއީލުގެ ރައްޔިތުންނަކަށް ރަސްމާލޭގައި ނުތިބެވޭނެ ކަމަށާއި އެ ގައުމުގެ ރައްޔިތުންނަށް އެއްވެސް ޕްރޮޖެކްޓަކުން އެއްވެސް ތަނެއް ގަނެ، ވިއްކާ، ކުއްޔަކަށް ނުހޯދޭނެ ކަމަށެވެ.

އިސްރާއީލުގެ ރައްޔިތުންނަކަށެއް މި ޕްރޮޖެކްޓްގެ ތެރެއިން އަދި ކުރިއަށް އޮތްތާ އެހެން އެއްވެސް ޕްރޮޖެކްޓަކުން ވެސް މިތަނުން އެއްވެސް ޕްރޮޕަޓީއެއް ގަނެ، ވިއްކާ، ކުއްޔަށް ހޯދައި، މިކަހަލަ އެއްވެސް ކަމެއް ނުކުރެވޭނެ. ގާނޫނުގެ ތެރެއިން އަޅުގަނޑުމެން އެކަން ބަންދުކުރާނަން.

ރައީސް މުޢިއްޒު ހަމައެއާކު، ދިވެހީންނަށް އެއްވެސް ލިމިޓެއް ނޯންނާނެ ކަމަށާއި ރަސްމާލޭގެ ހުރިހާ ޕްރޮޕަޓީއެއް ވެސް ދިވެހީން ބޭނުންވާނަމަ ގަންނަން ފުރުސަތު އޮންނާނެ ކަމަށް ވަނީ ފާހަގަކޮށްފައެވެ. އަދި އެމަނިކުފާނު ވަނީ، ދިވެހީންގެ ތެރެއިން މެދުފަންތި އަދި އެޔަށްވުރެ މަތިން ވެސް އާމްދަނީ ލިބޭ ފަރާތްތަކަށް ރަސްމާލެއިން ޕްރޮޕަޓީތައް ގަނެވޭނެ ވަރަށް އެމީހުންނަށް އާމްދަނީ ލިބޭކަން ފާހަގަކޮށްފައެވެ. އީގަލް ހިލްސްއިން ރަސްމާލޭގައި ތަރައްގީކުރާ ޕްރޮޕަޓީތަކުގެ ތެރެއިން، 1000 އަކަފޫޓުގެ ޕްރޮޕަޓީއެއް ލިބެނީ 600،000 ޑޮލަރަށެވެ.

ސަރުކާރުން ކުރިއަށްގެންދާ މި މަޝްރޫޢުގެ އެއްބަސްވުމުގައި މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ޢަބްދުالله މުއްޠަލިބު އަދި އީގަލް ހިލްސްގެ ޗެއާމަން މުޙައްމަދު އަލާއްބާރު ސޮއިކުރައްވާފައިވާއިރު، މި މަޝްރޫޢުގެ އެކި ފިޔަވަހިތަކުގެ އަންދާޒާ އަގު 20 ބިލިއަން ޑޮލަރުގެ އަދަދަކަށް އަރައެވެ.

މި މަޝްރޫޢުން 54،000 އަށް ވުރެ ގިނަ ވަޒީފާ އުފެދި، އަހަރަކު 2 ބިލިއަން ޑޮލަރުގެ ފަތުރުވެރިކަމުގެ އާމްދަނީއެއް ލިބޭނެ ކަމަށް ސަރުކާރުން ލަފާކުރެއެވެ.