ގަތަރު ވޯލްޑްކަޕުގެ އަގު ވައްޓާލަން ހުޅަނގުގެ މީޑިއާތަކެއް ފޫގަޅައިފި

ގަތަރަކީ ވޯލްޑްކަޕް ބާއްވަން އެންމެ އެކަށީގެންނުވާ ތަން ކަމަށް ބުނެ ހުޅަނގުގެ ބޮޑެތި މީޑިއާތަކުން މުބާރާތުގެ އަގު ވައްޓާލުމަށް ފޫގަޅައިފިއެވެ.

މުބާރާތާ ގުޅޭގޮތުން އެ މީޑިއާތަކުން ވަނީ ގަތަރުން އެއް ޖިންސުން ގުޅުން ހިންގުމާ ދެކޮޅަށާއި ދަނޑު އެތެރޭގައި ބަނގުރާ ބޭނުން ނުކުރެވޭނެކަމަށް އަންގާފައެވެ.

މިކަން ބޮޑުވެ ހުޅަނގުގެ މީޑިއާތަކުން ނުރުހުން ފާޅުކުރުމާ ގުޅިގެން ފީފާގެ ރައީސް އިންފަންޓީނޯ ވަނީ ފާޅުކަންބޮޑު ގޮތެެއްގައި މުޅި ޔޫރަޕަށް ބަހުގެ ހަމަލާ އަމާޒުކޮށްފައެވެ. އަދި އެ އުސޫލުތަކަކީ ކުރީގެ ވޯލްޑްކަޕް ތަކުގައިވެސް ބޭނުންކުރި އުސޫލު ކަމަށާއި ވަކި ބަދަލެއް އެކަމަށް ނާންނަ ކަމަށެވެ.

އޭގެ ފަހުން މުބާރާތުގެ ހުޅުވުމުގެ ރަސްމިއްޔާތު ވެސް ހުޅަނގުގެ ބައެއް މީޑިއާތަކުން ލައިވް ނުކުރެއެވެ. އެކަމާއި ގުޅިގެން ގިނަ ބައެއްގެ ފާޑުކިޔުންތަކެއް ވަނީ އެ މީޑިއާތަކަށް އަމާޒުވެފައެވެ.

ހުޅުވުމުގެ ރަސްމިއްޔާތުގައި ގުރުއާނުގެ އާޔަތްތަކެއް ހިމަނާފައިވެއެވެ. އަދި އެމެރިކާގެ ނުފޫޒުގަދަ އެކްޓަރ މޯގަން ފްރީމަން ވެސް ބައިވެރިވިއެވެ. އެ ރަސްމިއްޔާތަށް ފަހު ހުޅަނގުގެ މީޑިއާތަކުން ސިފަކުރީ އެއީ މުބާރާތުގެ ތާރީހުގައި ވެސް ފެނުނު އެންމެ ފެންވަރު ދަށް ރަސްމިއްޔާތު ކަމަށް ބުނެފައެވެ. ނަމަވެސް މަންޒަރު ފެންނަނީ ދިމާ އިދިކޮޅަށެވެ. މުޅި ސޯޝަލް މީޑިއާ ވަނީ ގަތަރަށް ތައުރީފުގެ ބަސްތަކުން އޮއްސާލާފައެވެ.

އަދި ފުރަތަމަ މެޗުން ގަތަރު ބަލިވުމުން ވެސް ފާޑުކިޔާފައިވެއެވެ. މީގެން އެއްވެސް ކަމަކަށް ގަތަރުން ރައްދެއް ނުދެއެވެ. އަދި ހުޅަނގުގެ މީޑިއާތަކުގެ އެއްވެސް ކަމަކަށް ފަރުވާލެއް ނެތެވެ.