މޮރޮކޯގެ ކުޅުންތެރިންނާއި އެމީހުންގެ މަންމައިން، ރާމާމަކުނާއި އަޅައި ކިޔައިފި

ގަތަރުގައި މިހާރު ކުރިއަށްދާ ވޯލްޑްކަޕްގައި، ޕޯޗުގަލް ޓީމު ބަލިކުރުމަށްފަހު، އެކަމުގެ އުފާ ފާޅުކުރުމުގެ ގޮތުން މޮރޮކޯގެ ކުޅުންތެރިއަކު އޭނާގެ މަންމަ ގައިގައި ބައްދައިގެން ހުރި ގޮތާއި ރާމާމަކުނާއި އެއްގޮތް ކުރުމުން ޑެންމާކް ގެ ޓީވީ ޗެނަލަކަށް ގިނަ ބައެއްގެ ނުރުހުން އަމާޒުވެއްޖެއެވެ.

މުބާރާތް ފެށުނީއްސުރެ ވެސް މޮރޮކޯ ޓީމުގެ ކުޅުންތެރިން ދިޔައީ އެމީހުންގެ އަމަލު ތަކުން ވަރަށް ގިނަ ބައެއްގެ ތައުރީފާއި ލޯބި ހޯދަމުންނެވެ. ޚާއްސަކޮށް، ކޮންމެ މެޗަކަށްފަހު ބައެއް ކުޅުންތެރިން އެމީހުންގެ މަންމަކައިރިއަށް ގޮސް، ލިބުނު ކާމިޔާބީ މަންމަ އާއި އެކު ފާހަގަކުރާ ކުރުމަކީ ހުޅަނގުގެ ގިނަ ގައުމުތަކުގެ މީހުންގެވެސް ސަމާލުކަން ލިބިގެންދިޔަ ކަމެކެވެ.

އެގޮތުން، ކުއާޓާ ފައިނަލް ގައި ޕޯޗުގަލް ބަލިކުރުމަށްފަހު އެކަމުގެ އުފާ ފައުޅުކުރުމަށް ޓީމުގެ ކުޅުންތެރިން އެމީހުންގެ މަންމައިންނާއި ދަރިން ވަނީ ދަނޑުމައްޗަށް ގެނެސް، އެ އުފަލުގައި އެމީހުން ބައިވެރި ކޮށްފައެވެ.

އަދި އޭގެތެރެއިން، އެ ކުޅުންތެރިން އެމީހުންގެ މަންމައިން ގައިގައި ލޯބިން ބައްދާލާ މަންޒަރުތައް ވެސް ކެމެރާތަކަށް އަރާފައިވާއިރު، ޑެންމާކުގެ ޓީވީ 2 ނިޔުސް، ގެނެސްދިން ޕްރޮގްރާމެއް ގައި އެ މަންޒަރާއި، ރާމާމަކުނެއް އެ މަކުނުގެ ދަރިންގައިގައި ބައްދައިގެން ތިބި މަންޒަރާއި އެއްގޮތްކޮށް އަޅައިކިޔައިފައިވެއެވެ.

އެގޮތުން، ރާމާމަކުނުތައްވެސް ހޫނުކަން ލިބިގަތުމަށް އެމީހުންގެ މައިންގައިގައި އެފަދައިން ބައްދާ ކަމަށާ، އެ މަކުނު ތަކާއި މޮރޮކޯ ޓީމުގެ ކުޅުންތެރިންނާއި ހުރި އެއްގޮތް ކަމަކީ އެކަތި ގަނޑެއްގެ ގޮތުގައި ތިބުން ކަމަށްބުނެ، އެ ޕްރެސެންޓަރުން ވަނީ ހެމުން މޮރޮކޯ ޓީމުގެ ކުޅުންތެރިންނަށް މަލާމާތް ކޮށްފައެވެ.

މިކަމާއި ގުޅިގެން، އެ ޓީވީ ޗެނަލުން މަޢާފަށް އެދިފައިވާއިރު, މަޢާފަށް އެދުމުން އެކަން ފޫނުބެއްދޭނެކަމަށް ގިނަ ބަޔަކު ވަނީ ބުނެފައެވެ. އަދި އެމީހުން ފާޑުކިޔައިފައި އެވަނީ ހަމައެކަނި މޮރޮކޯއަށް ނޫން ކަމަށާ، އެ ފާޑުކީ މުޅި އިސްލާމީ މުޖުތަމަޢުއަށް ކަމަށްވެސް މީހަކު ބުނެފައިވެއެވެ.