ބޭރު ފައިސާ މާރުކުރުމުގެ ނަމުގައި ހިންގާ ސްކޭމްތައް އިތުރުވެއްޖެ

ބޭރު ފައިސާ މާރުކުރުމުގެ ނަމުގައި މަކަރާއި ހީލަތުން ފައިސާ ހޯދަމުންދާ މައްސަލަތައް އިތުރުވަމުންދާތީ، އެކަމަށް އާންމުން ސަމާލުވުމަށް މޯލްޑިވްސް ޕޮލިސް ސާވިސް އިން މިއަދު އިލްތިމާސްކޮށްފި އެވެ.

ދިވެހި ފުލުހުންގެ ހިދުމަތުން އާންމުކޮށްފައިވާ ސްކޭމް މައްސަލަތަކުގެ ތަފާސްހިސާބުތަކަށް ބަލާއިރު، މިދިޔަ މަހުގެ 25 އިން ފެށިގެން 31 ގެ ނިޔަލަށް ހުށަހެޅުނު ސްކޭމްގެ މައްސަލަތަކުގެ ތެރޭގައި އެންމެ ގިނައީ ފައިސާ މާރުކުރުމުގެ ނަމުގައި ހިންގާފައިވާ މުއާމަލާތްތަކެވެ. އެގޮތުން އެ މުއްދަތުގައި ރިޕޯޓުކުރި ޖުމްލަ 32 މައްސަލައިގެ ތެރެއިން 17 މައްސަލައަކީ ބޭރު ފައިސާ މާރުކުރުމާ ގުޅޭ މައްސަލަތަކެވެ.

ފުލުހުން ވިދާޅުވީ މިދިޔަ ހަފުތާގައި ރިޕޯޓުކުރި މި މައްސަލަތަކުގައި އާންމުންގެ އަތުން ޖުމްލަ 737،695 ރުފިޔާ ގެއްލިފައިވާ ކަމަށެވެ. އަދި އޭގެ ތެރެއިން ފުލުހުންނަށް އަނބުރާ ހޯދިފައިވަނީ 144،558 ރުފިޔާ ކަމަށް ވެސް ހާމަކޮށްފައިވެ އެވެ.

ފައިސާ މާރުކުރުމުގެ މައްސަލަތަކުގެ އިތުރުން، އީ-ކޮމާސްއާ ގުޅުންހުރި ހަ މައްސަލައަކާއި، އިންވެސްޓްމަންޓް ސްކޭމްގެ ހަތަރު މައްސަލައެއް ފާއިތުވި ހަފުތާގައި ރިޕޯޓުކޮށްފައިވެ އެވެ. އަދި އޮޅުވާލައިގެން އެހެން މީހެއްގެ ނަމުގައި ފައިސާ ހޯދުމުގެ މައްސަލައަކާއި، އެހެނިހެން ބާވަތުގެ ސްކޭމްގެ ހަތަރު މައްސަލައެއް ވެސް ފުލުހުންނަށް ވަނީ ހުށަހަޅާފަ އެވެ.

މިފަދަ ސްކޭމްތައް ހިންގުމަށްޓަކައި އެކި ކަހަލަ އޮންލައިން ޕްލެޓްފޯމްތައް ބޭނުންކުރަމުންދާ ކަން ފާހަގަކުރައްވައި ފުލުހުން ވިދާޅުވީ، މަކަރާއި ހީލަތް ހަދާ ފަރާތްތަކުން އައިބޭ، ޓިކްޓޮކް، ފޭސްބުކް މާކެޓްޕްލޭސް ފަދަ ވަސީލަތްތަކުގެ އިތުރުން ފިޝިން ލިންކުތަކާއި ފޯނު ކޯލް މެދުވެރިކޮށް ވެސް މީހުންނަށް އޮޅުވާލަމުންދާ ކަމަށެވެ.

އެހެންކަމުން، ބޭރު ފައިސާ މާރުކުރާ ރޭޓު އާދަޔާ ހިލާފަށް ރަނގަޅު ނަމަ އެއީ ސްކޭމަކަށް ވެދާނެތީ އެކަމަށް ސަމާލުވުމަށް ފުލުހުން ވަނީ ނަސޭހަތްތެރިވެފަ އެވެ. އަދި އެއްވެސް ފަރާތަކަށް ފައިސާ ޖަމާކުރުމުގެ ކުރިން، މާރުކުރާ ފަރާތުން ފޮނުވަންޖެހޭ ފައިސާ އެކައުންޓަށް ލިބިއްޖެތޯ ޔަގީންކުރުމަށާއި، މުއާމަލާތްކުރަނީ ކާކުކަން ސާފުކޮށް ކަށަވަރުނުވާ ނަމަ އެއްވެސް މިންވަރަކަށް ފައިސާ ނުފޮނުވުމަށް ފުލުހުން ވަނީ އާންމު ރައްޔިތުންނަށް އިލްތިމާސްކޮށްފަ އެވެ.