ރިސޯޓް ލީގު 2023: އާހިލްގެ ހެޓްރިކާއެކު ކުރުނބާ އިން ކުއާޓާގެ އުންމީދު ދަމަހައްޓައިފި!

ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތް 2023 ގެ ނޯތު މާލޭ ޒޯނުގައި މިއަދު ހަވީރު ކުޅެވުނު ފުރަތަމަ މެޗުގައި ގުރޫޕް "ޑީ" ގައި 1-5 ގެ ނަތީޖާއަކުން ބޮޑުހިތި ބަލިކޮށް ކުރުނބާ އިން ކުއާޓާ ފައިނަލުގެ އުންމީދު ދަމަހައްޓައިފި އެވެ.

މި މެޗުގެ ފުރަތަަމަ ފަސް މިނެޓު ތެރޭގައި ލަނޑުޖަހާނެ ހުސް ތިން ފުރުސަތެއް ކުރުނބާ އިން ހޯދިއިރު އޭގެ ތެރެއިން އެއް ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ. ފުރަތަަމަ ހާފުގައި ކުރުނބާގެ ފަރާތުން މޮޅު ކުޅުމެއް ފެނިގެންދިޔަ މިމެޗުގައި އެޓީމުގެ ފުރަތަަމަ ލަނޑު 07 ވަނަ މިނެޓުގައި އަބްދުﷲ އާހިލް އަލީ ކާމިޔާބުކޮށްދިން އިރު އޭގެ ހަތަރު މިނެޓު ފަހުން އާހިލް ވަނީ އިތުރު ލަނޑެއް ކާމިޔާބު އެޓީމުގެ ލީޑު ފުޅާކޮށްދީފައެވެ.

މިމެޗުގައި ކުރުނބާގެ ތިންވަނަ ލަނޑު ފުރަތަަމަ ހާފު ނިމެން ދެ މިނިޓަށްވެފައި ވަނިކޮށް ކާމިޔާބުކޮށްދިނީ ޝައިބާން އަބްދުފ ރަޝީދު އެވެ. މިއީ ބޮޑުހިތި ގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއަކު މުޅިން ހުސްކޮށްލާފައި ޖައްސާލި ބޯޅައެއް ގޯލުގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ކުރުނބާ ކުރީގައި އޮވެގެންނެވެ.

ދެވަނަ ހާފު ފެށިގެން ދެވަނަ މިނެޓުގައި ބޮޑުހިތި އިން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ ކެޕްޓަން އަހުމަދު މިސްބާހް އެވެ. މިއީ އެޓީމުގެ ކުޅުންތެރިއަކު ފޮނުވާލި ހަމަލާއެއް ގޯލުގެ ދަނޑިގައި ޖެހިފައި ބޭރަށް ނިކުތް ވަގުތު ޕެނަލްޓީ އޭރިއާ ބޭރުގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ކުރުނބާ އިން މި މެޗުގައި ކާމިޔާބުކުރި ހަތަރުވަނަ ލަނޑު ދެވަަނަ ހާފުގެ ހަވަނަ މިނެޓުގައި ކާމިޔާބުކޮށްދިނީ އެޓީމުގެ މުހައްމަދު އިމްތިޔާޒު އެވެ. މިއީ ބޮޑުހިތި ހާފުގެ މެދަށްވުރެ މެދުގޮނގާއި ކައިރީގައި ހުރި ފޮނުވާލި ބާރު ހަމަލާ ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުގައި މޮޅުކުޅުމެއް ދެއްކި އަބްދުﷲ އާހިލް އަލީ މެޗުގެ ފަހު މިނެޓްގައި އިތުރު ލަނޑެއް ކާމިޔާބުކޮށް މި މެޗުގައި އޭނާގެ ހެޓްރިކް ފުރިހަމަކޮށްފައެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ އެފްސީ އާހިލް އެވެ.

މި މެޗުން ލިބުނު ތިން ޕޮއިންޓާއެކު އެކު ދެ މެޗު ކުޅެގެން ކުރުނބާ އަށް ތިން ޕޮއިންޓް ލިބިފައިވާއިރު، މިވަގުތު އެޓީމު އޮތީ މި ގުރޫޕްގެ ދެވަނައިގައެވެ. އަދި މިރޭގެ މެޗުން ބަލިވި ބޮޑުހިތި ކުޅުނު ދެ މެޗުން ވެސް ބަލިވެފައިވާއިރު، މިވަގުތު އެޓީމު އޮތީ ހަތަރު ޓީމު ހިމެނޭ މި ގުރޫޕްގެ ފުލުގައެވެ.

ރިސޯޓް ލީގު 2023 ގެ ނޯތު މާލޭ ޒޯނުގައި މިއަހަރު 17 ޓީމެއް ބައިވެރިވެފައި ވާއިރު، މި ޒޯނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ހަތަރު ގުރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ރަގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭގޮތަށެވެ.

މި ޒޯނުގެ ހުރިހާ މެޗެއްވެސް ވަން އެންޑް އޮންލީ ރީތިރަށުގައި ކުޅުމަށް ހަމަޖެހިފައިވާއިރު، ގުރޫޕް "އޭ" ގައި ފަސް ޓީމު ހިމެނޭއިރު، އަނެއް ތިން ގުރޫޕްގެ ތެރެއިިން ކޮންމެ ގުރޫޕެއްގައި ހިމެނެނީ ހަތަރު ޓީމެވެ.