މިފަހަރުވެސް އިޓަލީއަށް ވަރލްޑްކަޕުން ޖާގައެއް ނުލިބުނު

ބޮސްނިއާ އަތުން ބަލިވެ، ވިދިވިދިގެން ތިންވަނަ ފަހަރަށް ވަރލްޑްކަޕަށް ކޮލިފައިނުވެ އިޓަލީ ކަޓައިފިއެވެ.

ވަރލްޑްކަޕް ތަށި ހަތަރު ފަހަރަށް ހޯދާފައިވާ އިޓަލީ ރޭ ބޮސްނިއާއަތުން ބަލިވީ ޕެނަލްޓީ ޖަހައިގެންނެވެ. ޕެނަލްޓީ ޖަހައިގެން މެޗްގެ ނަތީޖާ ނެރެފައިވަނީ މެޗްގެ ފުރިހަމަ ވަގުތު ހަމަވިއިރު ދެޓީމް  1-1 ގެ ނަތީޖާއިން އެއްވަރުވެފައި އޮތުމުންނެވެ.

ފޯރިގަދަ ކުޅުމެއް ފެނިގެންދިޔަ މިމެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީވެސް އިޓަލީއެވެ. އެއީ 15 ވަނަ މިނެޓް ތެރޭގައި މޮއިސް ކީން ކާމިޔާބުކޮށްދިން ލަނޑުންނެވެ. އިޓަލީން ލީޑް ނަގާފައިވަނިކޮށް، މެޗްގެ އޮއިވަރު ބަދަލުވީ، ފުރަތަމަ ހާފު ނިމުމުގެ ކުރިން އިޓަލީގެ ސެންޓަރ ބެކް އެލެސަންދްރޯ ބަސްޓޯނީއަށް ދެއްކި ރަތްކާޑާ ގުޅިގެންނެވެ. ބަސްޓޯނީ ދަނޑުން ފޮނުވާލުމުން މެޗްގެ ބޮޑުބައި އިޓަލީން ކުޅުނީ 10 ކުޅުންތެރިންނާއެކުގައެވެ.

މެޗްގައި ބޮސްނިއާއަށް އެއްވަރުކޮށްދިނީ ފަހުހާފްގައި ބަދަލު ކުޅުންތެރިއެއްގެ ގޮތުގައި ކުޅެންނިކުތް ހަރިސް ތަބަކޮވިޗް ކާމިޔާބުކޮށްދިން ލަނޑުންނެވެ. މެޗުގެ ފުރިހަމަ ވަގުތު އެއްވަރުވުމުން ކުޅުނު އިތުރު ވަގުތުގެ ދެ ހާފުގައިވެސް ނަތީޖާއަށް ބަދަލެއް ނައުމުން ނަތީޖާ ނެރުނީ ޕެނަލްޓީ ޖަހައިގެންނެވެ.

ޕެނަލްޓީ ޖަހައިގެން ބޮސްނިއާ މެޗް ކާމިޔާބުކުރީ 1-4 ގެ ނަތީޖާއިންނެވެ. ޕެނަލްޓީ ޝޫޓްއައުޓްގައި އިޓަލީގެ ޕިއޯ އެސްޕޮސިޓޯ އާއި ބްރަޔަން ކްރިސްޓަންޓޭގެ ޕެނަލްޓީ ނާކާމިޔާބުވިއިރު، ބޮސްނިއާ މޮޅުވީ، އެމެރިކާއަށް އުފަން އެސްމިރް ބަޖްރަކްޓަރެވިޗް ޖެހި ޕެނަލްޓީންނެވެ.

މެޗަށްފަހު މީޑިއާ އާ ވާހަކަދައްކަމުން އިޓަލީގެ ކޯޗު ޖެނާރޯ ގަޓޫސޯ ބުނީ، "މުބާރާތަށް ކޮލިފައިނުވުމުން އެންމެންގެ ކިބައިން މައާފަށް އެދޭ" ކަމަށެވެ. އަދި އޭނާގެ މުސްތަގުބަލާ ބެހޭގޮތުން ވާހަކަދެއްކުމަށްވުރެ، މިވަގުތު މުހިންމީ ވޯލްޑް ކަޕަށް ނުދެވުނުކަމުގެ ހިތާމަ ކަމަށްވެސް އޭނާ ބުންޏެވެ.

މެޗަށްފަހު ވާހަކަދައްކަމުން އިޓަލީގެ ޑިފެންޑަރު ލިއޮނާޑޯ ސްޕިނަޒޯލާ ބުނީ، މުބާރާތުން ބޭރުވިކަން އަދިވެސް ގަބޫލުކުރަން ދަތި ކަމަށާއި، މިއީ އެންމެންނަށްވެސް ލިބުނު ވަރަށް ބޮޑު މާޔޫސްކަމެއް ކަމަށެވެ. އަދި ވޯލްޑް ކަޕެއްގައި އިޓަލީ ކުޅޭތަން ދުވަހަކު ނުދެކޭ ކުޑަކުދިން ތިބިކަމީ އޭނާ ހިތާމަކުރާ ކަމަށްވެސް ބުންޏެވެ.

މީގެ ކުރިން ބޭއްވި ދެ ވޯލްޑް ކަޕްގެ ކޮލިފައިން ޕްލޭއޮފްގައި އިޓަލީއަށް ވަރލްޑްކަޕް ގެއްލުނީ، ސްވިޑަން އަދި ނޯތު މެސެޑޯނިއާ އަތުން ބަލިވުމުންނެވެ. އިޓަލީން ވަރލްޑްކަޕް ތަށި އުފުލާލާފައިވަނީ، 1934، 1938، 1982 އަދި 2006 ވަނަ އަހަރެވެ. އޭގެ ކުރިން އިޓަލީއަށް ވަރލްޑްކަޕް ގެއްލިފައިވަނީ، 1958 ވަނަ އަހަރެވެ.

ޕްލޭ އޯފް މެޗްތަކަށް ބަލާއިރު، ސްވިޑަން، ތުރުކީ އަދި ޗެކް ރިޕަބްލިކް ވަނީ ވޯލްޑް ކަޕުން ޖާގަ ހޯދާފައެވެ. ސްވިޑަން އިން ޕޮލެންޑް 3-2 އިން ބަލިކުރިއިރު، ތުރުކީން ކޮސޯވޯ ބަލިކުރީ 1-0 ނަތީޖާއިންނެވެ.. ޗެކް ރިޕަބްލިކް ކޮލިފައިވީ ޕެނަލްޓީ ޖަހައިގެންނެވެ.