ވޯލްޑްކަޕުގައި ބިރުގަންނަ ޓީމެއް ނެތް، ސަޕޯޓަރުން ހާސްނުވޭ: މެސީ

މިފަހަރުގެ ވޯލްޑްކަޕުގައި އާޖެންޓީނާއިން ޖެހިލުންވާ ވަރުގެ ޓީމެއް ނެތް ކަމަށާއި ސަޕޯޓަރުން ވީހާވެސް މައިތިރިވެ، ހާސްނުވުމަށް ޓީމުގެ ކެޕްޓަން ލިއޮނަލް މެސީ ބުނެފިއެވެ.

ކޮޕާ އެމެރިކާގެ އެންމެ ފަހުގެ ޗެމްޕިއަން އާޖެންޓީނާއަށް އެންމެ ފަހުން ވޯލްޑްކަޕް ކާމިޔާބުކުރެވުނީ 1986 ގައެވެ. މިފަހަރުގެ ވޯލްޑްކަޕާއި ކުރިމަތިލިއިރު އެންމެފަހުން އާޖެންޓީނާއިން ކުޅުނު 35 މެޗުން ބަލިވެފައެއް ނުވެއެވެ. އެންމެ ފަހުން އެ ޓީމު ބަލިވީ 2019 ގައެވެ.

ގަތަރުގައި ބާއްވާ ވޯލްޑްކަޕުގައި އާޖެންޓީނާ ހިމެނިފައިވަނީ ގްރޫޕް ސީ ގައެވެ. މި ގްރޫޕުގައި އާޖެންޓީނާ އާއެކު ހިމެނެނީ ޕޮލޭންޑާއި މެކްސިކޯގެ އިތުރުން ސައުދީ އަރަބިއްޔާ އެވެ.

ވަރުގަދަ ފޯމެއްގައި އޮތް އާޖެންޓީނާ މި މުބާރާތާއި ކުރިމަތިލާއިރު އެންމެ ބޮޑު ޕްރެޝަރެއް ކުރިމަތިވާނެ އެއް ކުޅުންތެރިއަކީ މެސީ އެވެ. އެެއީ މި މުބާރާތަކީ އޭނާގެ އެންމެ ފަހު ވޯލްޑްކަޕަށް ވުމެވެ.

މީޑިއާއަށް ދިން އިންޓަވިއު އެއްގައި ވާހަކަދައްކަމުން މެސީ ބުނީ ސަޕޯޓަރުންގެ ބޮޑެތި އުއްމީދުތަކެއް ހުންނާނެކަން އެނގޭ ކަމަށާއި މިއީ ފަސޭހަ މުބާރާތަކަށް ނުވާނެ ކަމަށެވެ. އަދި އާޖެންޓީނާ ޓީމެކޭ އެއްގޮތަށް އެހެން ޓީމުތަކުން ވެސް މުބާރާތާ ކުރިމަތިލާނީ ބޮޑެތި އުއްމީދުތަކާއެކު ކަމަށާއި އެހެން ނަމަވެސް އާޖެންޓީނާއަށް އެއްވެސް ހާސްކަމެއް ނެތް ކަމަށެވެ.

އެންމެފަހުން 2018 ވަނަ އަހަރު ބޭއްވި ވޯލްޑްކަޕުގައި އާޖެންޓީނާގެ ފުރަތަމަ މެޗުން ވަނީ އައިސްލޭންޑް އާއި ވާދަކޮށް 1-1 އިން އެއްވަރުވެފައެވެ. މި މެޗުގައި މެސީ ގެ ޕެނަލްޓީއެއް ބޭކާރުވިއިރު މުބާރާތުން އާޖެންޓީނާ ކެޓީ ގަދަ 16 ގައި ޗެމްޕިއަންކަން ހޯދި ފްރާންސް އަތުންނެވެ.

މެސީ ބުނީ މާޒީގައި ކަން ހިނގާފައިވާ ގޮތަށް ބަލާއިރު މުބާރާތް ފަށާ މެޗަކީ މުހިއްމު މެޗެއް ކަމަށެވެ. މުބާރާތުގައި އާޖެންޓީނާގެ ފުރަތަމަ މެޗުގައި ނޮވެމްބަރު 22 ގައި ބައްދަލުކުރާނީ ސައުދީ އަރަބިއްޔާ އާއި ދެކޮޅަށެވެެ. މެސީ ބުނީ މި މެޗުން މޮޅުވުމަކީ މުޅި ޓީމަށްވެސް މުހިއްމު ކަމަށެވެ.