މިފްކޯއަށް ބޭރުގެ ސީއީއޯއަކު ހޯދަނީ
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)ގެ ޗީފް އެގްޒެކެޓިވް ސީއީއޯގެ މަޤާމަށް ބޭރު މީހެއް ހޯދުމަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން ހުޅުވާލައިފިއެވެ.
ޕީސީބީން މިއަދު ކުރި އިއުލާނުގައި ބުނެފައިވަނީ މަސްވެރިކަމުގެ ދާއިރާގައި މަސައްކަތް ކުރައްވާ, ހުނަރުވެރި އަދި ދެމެހެއްޓެނިވިގޮތެއްގައި މަސައްކަތްކުރުމަށް ޝައުގުވެރިކަން ހުންނަ ފަރާތެއް ހޯދަމުން ދާކަމަށެވެ.
މިފްކޯގެ ސީއީއޯކަމަށް ކުރިމަތިލާން ހުޅުވާލާފައިވަނީ، އަންނަ ޖުލައި މަހުގެ 15 ވަނަ ދުވަހުގެ މެންދުރު 14:00 ގެ ނިޔަލަށެވެ.
ޕީސީބީއިން ވަނީ، އެ މަޤާމަށް ކުރިމަތިލާން ޝައުގުވެރިވާ ފަރާތްތައް، ސުންގަޑި ހަމަ ވުމުގެ ކުރިން ސީވީއާއި، ކަވާ ލެޓަރ އަދި ތައުލީމީ ސެޓްފިކޭޓްގެ އިތުރުން ދާއިރާގައި މަސައްކަތް ކޮށްފައިވާ ކަމުގެ ލިޔުން ޕީސީބީއަށް މެއިލް ކުރެއްވުމަށް އެދިފައެވެ.
މިފްކޯއަކީ ސަރުކާރުގެ އެންމެ ބޮޑު ވިޔަފާރި ކުންފުނި ކަމަށްވާ، އެސްޓީއޯގެ ސަބްސިޑަރީ ކުންފުންޏެއްގެ ގޮތުގައި އޮންނަ ކުންފުންޏެކެވެ. މިފްކޯގެ ސީއީއޯގެ މަޤާމުގައި އެންމެ ފަހުން ހުންނެވީ އަހުމަދު ސަމާހު ރަޝީދެވެ. މިދިޔަ މަހުގެ ތެރޭގައި ޕީސީބީއިން ވަނީ، ސަމާހު އެ މަގާމުން ވަކިކޮށް، ފިޝަރީޒް މިނިސްޓްރީގެ ސްޓޭޓަކަށް އައްޔަނު ކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
