ރިސޯޓް ލީގު 2023: ކާލްޓަން އާއި ރަސްފުށި އެއްވަރުވެ، ދެޓީމަށް ވެސް މުބާރާތް ނިމިއްޖެ!

ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ނޯތު މާލޭ ޒޯނުގައި މިއަދު ހަވީރު ކުޅެވުނު ދެވަަނަ މެޗުގައި ގުރޫޕް "ބީ" ގައި ރަސްފުށި އަދި ކާލްޓަން ވާދަކުރި މެޗު 2-2 ގެ ނަތީޖާއަކުން އެއްވަރުވެ ދެޓީމު ވެސް މުބާރާތުން ކަޓައިފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގައި ދެޓީމަށް ވެސް ލަނޑުޖަހާނެ ރަގަޅު ފުރުސަތުތަކެއް ލިބުނު ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެގެންނެވެ.

ދެވަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި މެޗުގައި ފުރަތަަމަ ލަނޑުޖަހައި ކުރިހޯދީ ރަސްފުށިންނެވެ. މި ލަނޑު ދެވަނަ ހާފު ފެށިގެން ތިންވަނަ މިނެޓުގައި ކާމިޔާބުކޮށްދިނީ އެޓީމުގެ ފިރުޝާން އަބްދުލް ހަންނާން އެވެ.

ކާލްޓަން އިން މެޗުގެ ނަތީޖާ އެއްވަރު ކުރީ ދެވަނަ ހާފުގެ 30 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ސިމްހާދު އިބްރާހީމް އެވެ. އަދި ޖެހިގެން އައި މިނެޓުގައި އެޓީމުގެ އައިސަން ޖަމްޝީދު ވަނީ ލަނޑެއް ކާމިޔާބުކޮށް މި މެޗުގައި ފުރަތަަމަ ފަހަރަށް އެޓީމަށް ލީޑު ހޯދައިދީފައެވެ.

ރަސްފުށިން ދެވަަނަ ފަހަރަށް މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 36 ވަނަ މިނެޓުގައި ކާމިޔާބުކޮށްދިނީ އެޓީމުގެ މުހައްމަދު ސައީދު އެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމް އެއްވަރުވެގެންނެވެ. އަދި މި މެޗުގެ މޭން އޮފް ދަ މެޗަކަށް ހޮވިފައިވަނީ ރަސްފުށި ޓީމުގެ ޖާޒީ ނަންބަރު 9 މުހައްމަދު ސައީދު އެވެ.

މި މެޗުން ލިބުނު އެއް ޕޮއިންޓާއެކު ތިން މެޗު ކުޅެގެން ކާލްޓަން އަށް ހަތަރު ޕޮއިންޓާއެކު ގުރޫގެ ތިން ވަނަ ލިބުނުއިރު، މި މެޗުން ލިބުނު އެއް ޕޮއިންޓާއެކު ތިން މެޗު ކުޅެގެން ރަސްފުއްޓަށް ލިބުނީ އެއް ޕޮއިންޓާއެކު ގްރޫޕްގެ ހަތަރު ވަނައެވެ.

މިގުރޫޕުން ބަނޑޮހާއި އެކު ހިލްޓަންއަށް މުބާރާތުގެ ކުއާޓާ ފައިނަލުން ފުރުސަތު ލިބުނުއިރު، މިދެޓީމަށް ވެސް ތިން މެޗު ކުޅެގެން ލިބިފައިވަނީ ހަ ޕޮއިންޓެވެ. ނަމަވެސް ލަނޑުގެ ތަފާތުން ބަނޑޮހަށް އެއްވަނަ ލިބުނުއިރު، ހިލްޓަންއަށް ލިބުނީ ގުރޫޕްގެ ދެވަނައެވެ.

ރިސޯޓް ލީގު 2023 ގެ ނޯތު މާލޭ ޒޯނުގައި މިއަހަރު 17 ޓީމެއް ބައިވެރިވެފައި ވާއިރު، މި ޒޯނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ހަތަރު ގުރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ރަގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭގޮތަށެވެ.

މި ޒޯނުގެ ހުރިހާ މެޗެއްވެސް ވަން އެންޑް އޮންލީ ރީތިރަށުގައި ކުޅުމަށް ހަމަޖެހިފައިވާއިރު، ގުރޫޕް "އޭ" ގައި ފަސް ޓީމު ހިމެނޭއިރު، އަނެއް ތިން ގުރޫޕްގެ ތެރެއިިން ކޮންމެ ގުރޫޕެއްގައި ހިމެނެނީ ހަތަރު ޓީމެވެ.