ގާލޯ މަނާ ބޭހަށް ޕޮސިޓިވް، ވޯލްޑްކަޕް ގެއްލުން ގާތް

ފީފާގެ އެންޓި ޑޯޕިން ގަވާއިދުތަކާއި ހިލާފަށް މަނާ ބޭސް ބޭނުންކުރިކަން ސާބިތުވުމުން މިފަހަރުގެ ވޯލްޑްކަޕުގައި ވާދަކުރާ ކޮސްޓަ ރިކާގެ ކުޅުންތެރިއެއް ފީފާ އިން ސަސްޕެންޑުކޮށްފި އެވެ.

ފީފާ އިން ވަގުތީ ގޮތުން ސަސްޕެންޑުކޮށްފައި ވަނީ ކޮސްޓަ ރިކާގެ ހުނަރުވެރި މިޑްފީލްޑަރ ކަމަށްވާ އޮލާންޑޯ ގާލޯ އެވެ. އުމުރުން 22 އަހަރުގެ ގާލޯ މަނާ ބޭހަށް ޕޮސިޓިވްވެފައި ވަނީ މިދިޔަ ސެޕްޓެމްބަރު މަހު ކުރިޔަށްދިޔަ ޓެސްޓުތަކެއް ގައި ކަމަށް ރިޕޯޓުތައް ބުނެއެވެ.

މިއީ ވޯލްޑްކަޕުގެ ކުރިން ކޮންމެ ގައުމެއްގެ ފެޑެރޭޝަނުން ވެސް ހަދަން ލާޒިމުކުރާ ޓެސްޓެކެވެ. އާންމުކޮށް މި ޓެސްޓުން މަނާ ބޭހަށް ޕޮސިޓިވްވަނީ މަދު ކުޅުންތެރިންތަކެކެވެ.

ރިޕޯޓުތައް ބުނާގޮތުން ގާލޯ ޕޮސިޓިވްވެފައި ވަނީ ސްޓެރޮއިޑް އަށެވެ. އެހެންކަމުން މިފަހަރުގެ ވޯލްޑްކަޕުގައި އޭނާއަށް ނުކުޅެވުމުގެ ފުރުސަތު ވަރަށް ބޮޑެވެ.

ފީފާގެ ތަރުޖަމާނު ރޮއިޓާސްއަށް ވިދާޅުވީ ފީފާގެ އެންޓި ޑޯޕިން ގަވާއިދުގައިވާ ގޮތުގެ މަތިން ކުޅުންތެރިޔާ އޯލަންޑޯ ގާލޯ ކަލްޑެރޯން ވަގުތީ ގޮތުން ސަސްޕެންޑްކޮށް އާދައިގެ މަތިން ފުރިހަމަކުރާ އުސޫލުތައް ފުރިހަމަކުރަމުން އަންނަ ކަމަށެވެ.

ވޯލްޑްކަޕުގައި ކޮސްޓަ ރިކާ ކުޅޭ ފުރަތަމަ މެޗުގައި ނޮވެމްބަރު 23 ވަނަ ދުވަހު ބައްދަލުކުރާނީ ސްޕެއިން އާއެވެ. މުބާރާތުގައި ކޮސްޓަ ރިކާ ހިމެނެނީ ގްރޫޕް އީ ގައެވެ. މި ގްރޫޕުގައި ކޮސްޓަ ރިކާ އާއި ސްޕެއިންގެ އިތުރުން ދެން ހިމެނެނީ ޖަރުމަނާއި ޖަޕާނެވެ.