އުޅަނދުތަކުގެ އަދަދު ކަނޑައެޅުމަށް ހުރި ގޮންޖެހުންތައް ހައްލު ކުރުމަށް ގަވާއިދަށް ބަދަލެއް!
ލިޔުންތެރިޔާ
ޚަދީޖާ އަރުފާ
ސިޓީ އަދި ރަށު ކައުންސިލުތަކުން ރަށްރަށުގައި ދުއްވޭނެ އުޅަނދުތަކުގެ އަދަދު ކަނޑައެޅުމުގައި، ކުރިމަތިވެފައިވާ ގޮންޖެހުމަށް އެކަށީގެންވާ ޙައްލެއް ހޯދައިދިނުމަށް ދިވެހިރާއްޖޭގެ އެކި ސަރަހައްދުތަކަށް އުޅަނދުގެ އަދަދު ކަނޑައެޅުމާ، އުޅަނދުތަކުގެ އަދަދު ކަނޑައަޅާ ފަރާތްތަކުން އަމަލުކުރަންޖެހޭ ގަވާޢިދަށް ބަދަލު ގެންނަން ސަރުކާރުން ނިންމައިފިއެވެ.
މި ބަދަލު ގެންނަން ނިންމި ސަބަބާއި ގުޅޭތުން މަޢުލޫމާތު ދެމުން ޓްރާންސްޕޯޓް މިނިސްޓްރީން ބުނީ، "އެއްގަމު ދަތުރުފަތުރުގެ ގާނޫނު"ގެ ދަށުން އެކުލަވައިލައިފައިވާ، ގަވާއިދު، "އެއްގަމު އުޅަނދު ރެޖިސްޓާރ ކޮށްދޭނެ އަދަދާއި، އުޅަނދު ބޭނުންކުރެވޭނެ މުއްދަތު ކަނޑައެޅުމުގެ ގަވާއިދު"ގެ 7 ވަނަ މާއްދާގައި ބަޔާން ކޮށްފައިވާ އުޅަނދުތަކުގެ އަދަދު ކަނޑައެޅުމަށް ޓަކައި ހަދަންޖެހޭ އެސެސްމަންޓުގެ އަސާސީ މިންގަނޑުތަކާއި ގުޅިގެން، ސިޓީ އަދި ރަށު ކައުންސިލުތަކަށް އެ ގަވާއިދު ތަންފީޒުކުރުމުގައި ވަރަށް ބޮޑެތި ގޮންޖެހުންތަކެއް ކުރިމަތިލާން ޖެހުން ކަމަށެވެ.
އެހެންކަމުން، ސިޓީ އަދި ރަށު ކައުންސިލުތަކުން ރަށްރަށުގައި ދުއްވޭނެ އުޅަނދުތަކުގެ އަދަދު ކަނޑައެޅުމުގައި، ކުރިމަތިވެފައިވާ އެ ގޮންޖެހުމަށް އެކަށީގެންވާ ޙައްލެއް ހޯދައިދިނުމަށް، އެ ގަވާއިދަށް ބަދަލުގެނެސް، ކުރިޔަށްއޮތް 2 މަސް ދުވަހުގެ ތެރޭގައި ޢާންކުރުމަށް މަސައްކަތް ކުރަމުންދާ ކަމުގައި ޓްރާންސްޕޯޓް މިނިސްޓަރު މުހައްމަދު އަމީން ވަނީ ވިދާޅުވެފަ އެވެ.
އެއްގަމު ދުއްވާ އުޅަނދުފަހަރު ލިމިޓް ކަނޑައެޅުމަކީ ކައުންސިލް ތަކުގެ ޒިންމާއެކެވެ.
ޓްރާންސްޕޯޓް މިނިސްޓްރީން ގަވާއިދަށް މިފަދަ ބަދަލެއް ގެންނަން ނިންމާފައި މިވަނީ، މާލެސިޓީ ތޮއްޖެހުމުގެ މައްސަލަ ހައްލު ކުރުމަށް އެއްގަމު ދުއްވާ އުޅަނދުފަހަރުގެ އަދަދު 6 މަސް ދުވަސް ތެރޭ ލިމިޓް ކުރައްވާނެ ކަމަށް މާލެ ސިޓީގެ އައު މޭޔަރ އާދަމް އާޒިމް ވިދާޅުވެފައިވާ ދަނޑިވަޅެއްގަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
