ވޯލްޑްކަޕަށް ސްޕެއިން އިން ގަތަރަށް ދިޔަ މީހެއް އީރާނުން ގެއްލިއްޖެ

ސްޕެއިންގެ މެޑްރިޑުން ވޯލްޑް ކަޕް ބާއްވާ ގަތަރަށް ފައިމަގުގައި ދަތުރުކުރަމުން ދިޔަ މީހަކު އީރާނުން ވީނުވީ ނޭނގި ގެއްލިފައިވާ ކަމަށް ރިޕޯޓުކޮށްފިއެވެ.

ސްޕެއިންގެ ރައްޔިތެއް ކަމަށްވާ ސެންޓިއާގޯ ސަންޗޭޒް ގެއްލުނުކަން އޭނާގެ އާއިލާއިން ކަށަވަރުކޮށްފައި ވާއިރު، ރިޕޯޓުތައް ބުނާގޮތުން އޭނާގެ ހަބަރެއް ނުވާތާ ތިން ހަފުތާ ވަނީ ވެފައެވެ.

"ސްޕެއިންގެ ފޮރިން މިނިސްޓްރީން އަހަރެމެންނަށް މައުލޫމާތު ދީފި އޭނަ އީރާނުގައި ހައްޔަރުކޮށްފައިވާ ކަމުގެ 99 އިންސައްތަ ކަށަވަރުވެފައިވާ ކަމަށް، އަހަރެމެން މިހާރު މި ޔަގީންކުރަނީ އޭނަ އީރާނުގައި ހުރިކަން، އެކަން ވަރަށް ގާތުން ބަލަން" ސަންޗޭޒްގެ މަންމަ މީޑިއާތަކުގައި ބުންނެވެ.

ސަންޗޭޒް މަންމަ ބުނީ އުއްމީދު ނުގެއްލޭ ކަމަށާއި ބުރާސްފަތި ދުވަހު ސްޕެއިން ފޮރިން މިނިސްޓްރީގެ އިސް އޮފިޝަލުންނާއި އާއިލާ ބައްދަލުކުރުމަށް ހަމަޖެހިފައިވާ ކަމަށެވެ.

ސްޕެއިންގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ އީރާނުގެ ތެހެރާނުގައި ތިބި އެ ގައުމުގެ އިސް އޮފިޝަލުންނާއެކު މަޝްވަރާ ބައްދަލުވުންތަކެއް ކުރިޔަށްދާ ކަމަށެވެ. ނަމަވެސް އިތުރު ތަފްސީލެއް ނުދެއެވެ.

އިރާގާއި އީރާނުގެ ބޯޑަރު ހުރަސްކުރިތާ އެއް ދުވަސް ފަހުން އޮކްޓޯބަރު މަހުގެ 2 ވަނަ ދުވަހު ސްޕެއިންގައި ދިރިއުޅޭ ސަންޗޭޒްގެ އާއިލާއަށް ގުޅުން ހުއްޓާލުމުން ސަންޗޭޒް އަށް ވި ގޮތަކާމެދު ބިރުވެރިކަން އެ އާއިލާއަށް އުފެދުނެވެ. އޭނާ ވަނީ އީރާނުގައި މުވާސަލާތު ކުރަން ދަތިވެދާނެ ކަމުގެ އިންޒާރު އާއިލާއަށް އޭގެ ކުރިން ދީފައެވެ.

އާންމުކޮށް ދަތުރުކުރާ ސަންޗޭޒް، އީރާނުގެ ވެރިރަށް ތެހެރާނަށް ދިއުމަށް ރާވާފައި ވަނިކޮށް ޓީވީ ސްޓޭޝަނަކުން އޭނާއާ އިންޓަވިއު ކުރަން ބޭނުންވި އެވެ. އޭނާގެ ކުރިއަށް އޮތް ފިޔަވަޅަކީ އީރާނުގެ ދެކުނުގައި އޮންނަ ބަނދަރެއް ކަމަށްވާ ބަންޑާރު އައްބާސް ގަތަރަށް ބޯޓެއްގައި އެރވުމެވެ. ނަމަވެސް ތެހެރާނަށް ދިއުމުގެ ކުރިން ވެސް އޭނާގެ އެއްވެސް ހިލަމެއް ނެތްކަމަށް އާއިލާއިން ބުނެއެވެ.

އޭނާ ގެއްލިގެން މައިންބަފައިން ރިޕޯޓް ކުރީ އޮކްޓޯބަރު މަހުގެ 17 ވަނަ ދުވަހު އެވެ.

މިއީ ސަންޗޭޒް އީރާނުގައި ހޭދަކުރި ފުރަތަމަ ފަހަރެއް ނޫނެވެ. މެޑްރިޑުން ސައުދީ އަރަބިއްޔާއަށް ދިއުމަށް 2019 ވަނަ އަހަރު ވެސް ފުޓުބޯޅަ ސަޕޯޓަރުން ވަނީ އެ ރާސްތާ ކަޑައްތުކޮށްފައެވެ.