ޓީޗަރުންގެ ރިޓަޔާމެންޓް އަދި ޕެންޝަން ފައިސާގެ ކަންބޮޑުވުން މި އަހަރު ހައްލުވާނެ: ރައީސް ޑރ.މުއިއްޒު
ޓީޗަރުންގެ ރިޓަޔާމެންޓް އަދި ޕެންޝަން ފައިސާގެ ކަންބޮޑުވުން މި އަހަރު ހައްލުކުރައްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މިފަދައިން ވިދާޅުވީ ރޭ ސަލްޓަން ޕާކުގައި ކުރިއަށްދިޔަ "އަހާ" ފޯރަމް ގެ ދެވަނަ ޕްރޮގްރާމްގައި، މަހުން މަހަށް ލިބޭ ޕެންޝަނާ އެކު ރިޓަޔަރ ކުރާ ޕެންޝަން ލިބޭނެ ދުވަހެއް ސާފުކޮށްދޭން އެދޭ ކަމަށް ޓީޗަރަކު ދެންނެވުމާއި ގުޅިގެންނެވެ. އަދި މި ބަދަލު ދާއިމީ ގޮތަކަށް ހަމަޖެހިގެންދާނީ ކޮންއިރަކުންތޯ ވެސް ވަނީ ސުވާލުކޮށްފައެވެ.
މި ސުވާލަށް ޖަވާބުދެއްވަމުން ރައީސް ޑރ.މުއިއްޒު ވިދާޅުވީ އެކަމަށް މި އަހަރުގެ ތެރޭގައި ހައްލެއް ގެނެސް ދެއްވާނެ ކަމަށެވެ.
"އެއް އަހަރު.މިހިނގާ 2024 ގައި، އެކަމަށް ކުރަން ޖެހޭ މަސައްކަތްކޮށް،ރަނގަޅު ހައްލެއް 2025 ފެށޭއިރަށް ގެނެސްދޭނަން."
ރައީސް ޑރ.މުއިއްޒު ވިދާޅުވިއެވެ.
މީގެ ކުރިން، ރައީސްގެ ޖަވާބު ޕްރޮގްރާމުގައި ވެސް ޖަވާބުދެއްވަމުން ރައީސް ޑރ.މުއިއްޒު ވަނީ 55 އަހަރާ 65 އަހަރާ ދޭތެރޭ ރިޓަޔަރމަންޓަށްދާ ފަރާތްތަކަށް އެލަވަންސެއް ތަޢާރަފްކުރެއްވުމަކީ އެމަނިކުފާނުގެ ރިޔާސީ ވައުދުފުޅު ތަކުގެ ތެރޭގައި ހިމެނޭ ކަމެއް ވިދާޅުވެފައެވެ. އަދި ރައީސް ޑރ.މުއިއްޒު ވިދާޅުވީ މިކަމާއި ގުޅޭ އިދާރީ މަސައްކަތް ރައީސް އޮފީހުގެ ލީގަލް ޓީމާއި އެޓަރނީ ޖެނެރަލްގެ އޮފީހާ ގުޅިގެން ފައްޓާފައިވާ ކަމަށް ވެސް އެމަނިކުފާނު ވަނީ ވިދާޅުވެފައެވެ.
މިގޮތުން ރައީސް ޑރ.މުއިއްޒު ވިދާޅުވީ މިހާރު ކުރިއަށް ދަނީ މަޖިލީހަށް ފޮނުވަންޖެހޭ އިސްލާހްތައް ހުރުމުން އެކަމަށް ބޭނުންވާ އިދާރީ އަދި ޤާނޫނީ މަސައްކަތްތައް ކަމަށެވެ.
އާލީ ރިޓަޔާމަންޓުގެ ތެރެއިން ވަޒީފާއިން ވަކިވާ ޓީޗަރުންނަށް މަހުން މަހަށް ދެމުން އައި ޕެންޝަން ފައިސާ ހުއްޓާލީ 2022 ވަަނަ އަހަރުގެ މޭއި މަހުގެ ތެރޭގައި ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައެވެ. މިކަމާއި ގުޅިގެން ކަންބޮޑުވުން ފާޅުކޮށް، ރައީސް ޞާލިހަށް ޓީޗަރުން ޕެޓިޝަނެއް ހުށަހަޅައި ބައްދަލު ކުރުމަށް މަސައްކަތްކޮށްފައިވާއިރު، ރައީސް ޑރ.މުއިއްޒު ރިޔާސީ ކެމްޕެއިންގެ ތެރެއިންނާއި، ވެރިކަމަށް ވަޑައިގެންނެވި ފަހުން ވެސް އެ ޝަކުވާ ވަނީ ހުށައަޅާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
