ރާއްޖޭގައި 16 އަހަރުން ދަށުގެ ކުދިންނަށް މީސް މީޑިއާގެ ބައެއް އެޕްތައް މަނާކުރަނީ ކުރަނީ

ރާއްޖޭގައި 16 އަހަރުން ދަށުގެ ކުދިންނަށް މީސް މީޑިއާގެ ބައެއް އެޕްލިކޭޝަންތައް މަނާކުރުމަށް ނިންމަވާފައިވާކަން ރައީސް ޑރ. މުޙައްމަދު މުޢިއްޒު އިއުލާން ކުރައްވައިފިއެވެ.

ރައީސުލްޖުމްހޫރިއްޔާ މިއަދު ބޭއްވެވި ނޫސްވެރިންގެ ބައްދަލުވުން ފައްޓަވަމުން އެމަނިކުފާނު ވިދާޅުވީ، މީސްމީޑިއާގެ އަވާގައި ޒުވާން ޖީލު ޖެހުމުގެ ސަބަބުން، ވަރަށް ނުރަނގަޅު ކަންކަމުގެ ތެރެއަށް އެ ޒުވާނުން ހުށަހެޅިފައިވާ ކަމަށެވެ. އަދި އެކަމަކީ ހަމައެކަނި ރާއްޖެއަށް ޚާއްސަ ކަމެއް ނޫން ކަމަށާ މުޅި ދުނިޔޭގައިވެސް އެއީ ބޮޑު މައްސަލައެއް ކަމަށެވެ.

”ސައިބާ ބުލީން މިއީ ވަރަށް ނުރައްކާތެރި ކަމެއް. ޒުވާން ކުދިން ، ތުއްތު ކުދިން ވަނީ މިކަމުގެ ތެރެއަށް ގޮސްފައި. މުޅި ދުނިޔޭގައިވެސް. ހަމައެގޮތަށް، އޮންލައިން ގުރޫމިން އަކީވެސް އެކަމުގެ ސަބަބުން އަންނަ ވަރަށް ނުރައްކާތެރި ކަމެއް. ވަރަށް ހާމްފުލް ކޮންޓެންޓްއަށް ޒުވާންކުދިން އެބަ އެކްސްޕޯސްވޭ.

ރައީސް ޑރ. މުޙައްމަދު މުޢިއްޒު

އެހެންކަމުން ޒުވާނުން އެކަންކަމުން ސަލާމަތްކުރުމަށް މަސައްކަތްތަކެއް ކުރުމަކީ ކޮންމެހެންވެސް ކުރަންޖެހިފައިވާ ކަމެއް ކަމަށް ރައީސް ވިދާޅުވިއެވެ. އަދި ރައްޔިތުންނާ، މުވައްސަސާތަކާއި ގުޅިގެން އެކަން ކުރުމަކީ، ސަރުކާރުގެ ޒިންމާއެއް ކަމަށްވެސް އެމަނިކުފާނު ވިދާޅުވިއެވެ.

އެހެންވީމާ ކުރިއަށް އޮތްތަނުގައި ކަމާބެހޭ ފަރާތްތަކާ، މި ދެންނެވީ ސިވިލްސޮސައިޓީ އަދި ކަމާބެހޭ ޖަމިއްޔާ ޖަމާޢަތްތަކާ މަޝްވަރާކޮށް، އާއްމު ރައްޔިތުންގެވެސް ޚިޔާލާ މަޝްވަރާއާއެކީގައި އަޅުގަނޑުމެން ކަމާގުޅޭ ގާނޫނުތަކާއި ކުރަންޖެހޭ އެހެނިހެން ކަންކަން ކުރާނަން. ސޯޝަލް މީޑިއާގެ ކަނޑައެޅޭ ވަކިވަކި އެޕްތަކެއް 16 އަހަރުން ދަށުގެ ޒުވާނުންނަށް ބޭނުން ނުކުރެވޭ ގޮތަށް ކަނަޑައެޅުމަށް އަޅަންޖެހޭ ފިޔަވަޅުތައް އެޅުމަށް ގަސްތުކުރަން.

ރައީސް ޑރ. މުޙައްމަދު މުޢިއްޒު

އެގޮތުން ފިޔަވަޅުތައް އެޅުމުގައި، މިހާރުވެސް މިފަދަ ގާނޫނަކަށް އަމަލުކޮށް 16 އަހަރުން ދަށަށް މީސްމީޑިއާ މަނާކޮށްފައިވާ ގައުމެއް ކަމަށްވާ އޮސްޓްރޭލިޔާ ނަމޫނާއަކަށް ބައްލަވާނެ ކަމަށް ރައީސް ވިދާޅުވިއެވެ. ރައީސް ވިދާޅުވިގޮތިގައި، މި މައްސަލަ ހައްލު ކުރުމަށް އޮސްޓްރޭލިޔާއިން އަޅާފައިވާ ފިޔަވަޅުތަކަކީ ރަނގަޅު މިންގަނޑު ކަމަށް ދެކެވަޑައިގަންނަވާ ކަމަށެވެ.

”އެހެންވީމާ އޮސްޓްރޭލިޔާއިން އަޅާފައިވާ ފިޔަވަޅުތަކުގެ އަލީގައި، އަޅަންޖެހޭ ފިޔަވަޅުތައް އެޅުމަށް، ގާނޫނަށް ގެންނަންޖެހޭ ބަދަލު ކަމުގައި ވިޔަސް، އަދި ސޯޝަލް މީޑިއާގެ އެޕްތައް ހިންގާ ކުންފުނިތަކާ މުޢާމަލާތް ކުރުމުގައި ވިޔަސް، އޮސްޓްރޭލިޔާގެ މިންގަނޑުތައް ބޭނުން ކުރެވޭނެ ގޮތެއް، ރާއްޖޭގައި ތަޢާރަފް ކުރެވޭނެ ގޮތެއް ހެދުމަށް ކުރަންޖެހޭ މަސައްކަތް ކުރިއަށް ގެންދަން ގަސްތުކުރަން“

ރައީސް ވިދާޅުވީ ގިނަވެގެން އަހަރެއްހާ ދުވަސް ތެރޭގައި، އެފަދަ ގާނޫނެއް އެކުލަވާލައި، 16 އަހަރުން ދަށުގެ ކުދިންނަށް މީސްމީޑިއާ މަނާކުރެވިގެންދާނެ ކަމަށެވެ.

ރައީސް އިތުރަށް ވިދާޅުވީ، 16 އަހަރުން ދަށަށް މީސްމީޑިއާ މަނާ ކުރުމަކީ ޑިޖިޓަލައުޒޭޝަންއާ ދުރަސް ދިޔުން ނޫން ކަމަށާ ސަރުކާރުގެ ސިޔާސަތަކީ 2.0 ކަމަށެވެ.

ނަމަވެސް ފިޔަވަޅުތައް އަޅަނީ ނުރައްކާތެރި ކޮންޓެންޓް ތަކުން ޒުވާން ކުދިން ސަލާމަތްކުރުމަށް ކަމަށް އެމަނިކުފާނު ވިދާޅުވިއެވެ. އަދި އުއްމީދަކީ މި އަހަރު ތެރޭގައި ގާނޫނަށް އަމަލުކުރަން ފެށުން ކަމަށެވެ.