އުރީދޫގެ ސަބްސިޑަރީ ކުންފުނި، ޓެކްފިން މޯލްޑިވްސް އަށް އެމްއެމްއޭގެ ޕޭމަންޓް ސާވިސް ޕްރޮވައިޑާ ލައިސަންސް ލިބިއްޖެ

އުރީދޫ މޯލްޑިވްސްގެ ސަބްސިޑަރީ ކުންފުންޏެއް ކަމުގައިވާ ޓެކްފިން މޯލްޑިވްސް ޕްރައިވެޓް ލިމިޓެޑަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ޕޭމަންޓް ސަރވިސް ޕްރޮވައިޑަރ (ޕީއެސްޕީ) ލައިސަންސް ރަސްމީކޮށް ދޫކޮށްފިއެވެ.

މި ލައިސަންސްގެ ސަބަބުން، ޓެކްފިން މޯލްޑިވްސްއަށް ޕޭމަންޓް ޚިދުމަތްތައް ފޯރުކޮށްދޭ ކުންފުންޏެއްގެ ގޮތުގައި ޙަރަކާތްތެރިވުމުގެ ފުރުޞަތު ލިބި، ދިވެހި ރައްޔިތުންނަށް އައު އަދި ރައްކާތެރި ޑިޖިޓަލް މާލީ ޙައްލުތައް ފޯރުކޮށްދިނުމުގައި އެ ކުންފުނީގެ ދައުރު އިތުރަށް ފުޅާވެގެންދާނެއެވެ.

އުރީދޫއިން ހާމަކުރި ގޮތުގައި، މި އައު ލައިސަންސާ އެކު، ފުޅާ ދާއިރާއެއްގައި ބޭނުންކުރެވޭ އުރީދޫގެ ޑިޖިޓަލް ވޮލެޓް "އެމް-ފައިސާ" އާއި ރެމިޓެންސްގެ ޚިދުމަތްތައް މިހާރު ޓެކްފިން މޯލްޑިވްސްގެ ބެލުމުގެ ދަށުން ހިންގަމުން ގެންދެވޭނެއެވެ. މިއީ އުރީދޫ މޯލްޑިވްސްގެ ޑިޖިޓަލް މާލީ ޚިދުމަތްތައް އިތުރަށް ހަރުދަނާކޮށް، އެންމެ ޒަމާނީ ފިންޓެކް ޙައްލުތައް ފޯރުކޮށްދިނުމުގެ ކުންފުނީގެ ސްޓްރެޓެޖީއާ ގުޅިލާމެހިފައިވާ މުހިންމު ފިޔަވަޅެކެވެ.

އެމް-ފައިސާ ޕްލެޓްފޯމުގެ ޒަރީއާއިން، ރާއްޖޭގެ އެކި ކަންކޮޅުތަކުގައި މާލީ މުޢާމަލާތްތަކަށް އިންޤިލާބީ ބަދަލުތަކެއް ގެނެސް، ޚިދުމަތް ލިބިގަންނަ ފަރާތްތަކަށް ފައިސާ ދެއްކުމާއި، ފައިސާ ޓްރާންސްފަރ ކުރުމާއރުމާއި، ރެމިޓެންސްގެ ޚިދުމަތް ހޯދުމުގައި ލުއިފަސޭހަ އަދި ކަށަވަރު މަގެއް ވަނީ ތަނަވަސްވެފައެވެ.

އެމް-ފައިސާ މެދުވެރިކޮށް ބިލްތައް ދެއްކުމާއި، ޕެޓްރޯލް ސްޓޭޝަންތަކުގައި ޕޭމަންޓް ދެއްކުމާއި، ގިނަ ފިހާރަތަކާއި ކެފޭތަކުގައިވެސް ފައިސާގެ މުޢާމަލާތްތައް ކުރެވޭނެއެވެ. މީގެ އިތުރުން، ބަނޑޭރި ޕޭގެ ނިޒާމުގައިވެސް އެމް-ފައިސާ ވަނީ ހިމެނިފައެވެ.

މި ޚިދުމަތްތައް ޓެކްފިން މޯލްޑިވްސްގެ ދަށަށް ބަދަލުކޮށް، އުރީދޫއިން ދަނީ ޚިދުމަތް ލިބިގަންނަ ފަރާތްތަކުގެ ބޭނުންތައް ފުއްދައިދީ، ހަރުދަނާ ޑިޖިޓަލް މާލީ ނިޒާމެއް ޤާއިމުކުރުމުގެ ވަޢުދު އިތުރަށް ވަރުގަދަކުރަމުންނެވެ.