އުރީދޫ ނޭޝަންސްއާ ގުޅިގެން ބޭއްވި ޕީއެމްއެންސީ މޯލްޑިވްސް ފޯލްގެ ގަދަ ތިން ޓީމު ސަރަޙައްދީ މުބާރާތުން ޖާގަ ހޯދައިފި

އުރީދޫ ނޭޝަނާ ގުޅިގެން ބޭއްވި ޕަބްޖީ މޮބައިލް ނޭޝަނަލް ޗެމްޕިއަންޝިޕް (ޕީއެމްއެންސީ) 2026 މޯލްޑިވްސް ފޯލްގެ ޗެމްޕިއަންކަމާއި ރަނަރއަޕް މަޤާމުތައް ސިންޑިކޭޓް އެލްއެންއެން އެސްޑީއެމްޒެޑް އަދި ޑީސީއެމް ޑީއެމްޓީ ހޯދައި ޕަބްޖީ މޮބައިލް ސައުތު އޭޝިއާ ރީޖަނަލް ޗެމްޕިއަންޝިޕް 2026 އިން ޖާގަ ކަށަވަރުކޮށްފިއެވެ.

އުރީދޫ ނޭޝަން ޓައިޓްލް ސްޕޮންސަރުކުރި މި މުބާރާތުގެ ނޭޝަނަލް ފައިނަލް ކުރިއަށް ގެންގޮސްފައިވަނީ އޮގަސްޓު 14 އަދި 15 ގައި މާލޭ ޔޫތު ހަބްގައި ކަމަށް އުރީދޫ މޯލްޑިވްސްއިން ބުނެފައިވެއެވެ. ރާއްޖޭގެ އެންމެ ވާދަވެރި 16 ޕަބްޖީ މޮބައިލް ޓީމު ބައިވެރިވި ފައިނަލް ބުރުގައި ދެ ދުވަހެއްގެ ތެރޭ 10 މެޗު ކުޅެފައިވެއެވެ.

ފޯރިގަދަ ވާދައަކަށްފަހު އެއްވަނަ ޙާޞިލްކުރީ ސިންޑިކޭޓެވެ. ފަސްޓް ރަނަރއަޕް ލިބުނީ އެލްއެންއެން އެސްޑީއެމްޒެޑަށެވެ. ތިންވަނައަށް ދިޔައީ ޑީސީއެމް ޑީއެމްޓީއެވެ. މި ތިން ޓީމަށް ވެސް ސައުތު އޭޝިއާ ރީޖަނަލް ޗެމްޕިއަންޝިޕުގައި ރާއްޖެ ތަމްސީލުކުރުމުގެ ފުރުޞަތު ލިބިފައިވެއެވެ.

"އުރީދޫ ނޭޝަންގެ އަމާޒަކީ މިއީ. ރާއްޖޭގެ ޒުވާން އީސްޕޯޓްސް އެތުލީޓުންނަށް ވާދަކޮށް ކުރިއަރައި ބައިނަލްއަޤުވާމީ ފެންވަރުގައި ހުނަރު ސާބިތުކޮށް ބޮޑެތި މައިޒާންތަކުގައި ރާއްޖެ ތަމްސީލުކުރުމުގެ ފުރުޞަތު ހޯދައިދިނުން. ރާއްޖޭގެ ތިން ޓީމެއް ސައުތު އޭޝިއާ ރީޖަނަލް ޗެމްޕިއަންޝިޕަށް ހޮވުމަކީ މުޅި ދިވެހި އީސްޕޯޓްސް އާއިލާއަށްވެސް ލިބުނު ފަޚުރެއް. ސިންޑިކޭޓް އެލްއެންއެން އެސްޑީއެމްޒެޑް އަދި ޑީސީއެމް ޑީއެމްޓީއަށް މަރުޙަބާ ކިޔައި ސަރަޙައްދީ ފެންވަރުގައި ރާއްޖެ ތަމްސީލުކުރުމުގައި ކާމިޔާބީއަށް އެދެން" މި ކާމިޔާބީއާ ގުޅޭ ގޮތުން އުރީދޫ މޯލްޑިވްސްގެ ޗީފް ކޮމާޝަލް އޮފިސަރު ޙުސައިން ނިޔާޒް ވިދާޅުވިއެވެ.

އުރީދޫ މޯލްޑިވްސްއިން ބުނި ގޮތުގައި އުރީދޫ ނޭޝަން މެދުވެރިކޮށް ރާއްޖޭގެ ގޭމިން އަދި އީސްޕޯޓްސް ދާއިރާ ކުރިއެރުވުމަށް ސިލްސިލާ ގޮތެއްގައި އެ ކުންފުނިން ދަނީ އިންވެސްޓުކުރަމުންނެވެ. މިއީ 'ޑިޖިޓަލް މޯލްޑިވްސް' ތަޞައްވުރުގެ ދަށުން ދިވެހި ޒުވާން ހުނަރުވެރިންގެ ފެންވަރު މަތިކޮށް ބައިނަލްއަޤުވާމީ ފުރުޞަތުތައް ފަހިކޮށްދިނުމުގެ ގޮތުން ކުރިއަށް ގެންދާ ހަރަކާތެކެވެ.