ރާއްޖޭގައި ޕޭޕަލް ބޭނުންކުރާ މީހުންގެ އަދަދު 4،800 އަށްވުރެ މައްޗަށް އަރައިފި
ދިވެހިރާއްޖޭގައި ޕޭޕަލްގެ ހިދުމަތް ބޭނުންކުރާ މީހުންގެ އަދަދު 4،800 އަށްވުރެ މައްޗަށް އަރައިފިއެވެ.
މިކަން އެނގިފައިވަނީ، އިކޮނޮމިކް މިނިސްޓްރީއިން ސޯޝަލް މީޑިއާ މެދުވެރިކޮށް މިއަދު ހިއްސާކުރި ތަފާސްހިސާބުތަކުންނެވެ.
އެގޮތުން، މިމަހުގެ 1 ވަނަ ދުވަހާ ހަމައަށް ބޭރު ޤައުމުތަކުން ރާއްޖޭގެ ޕޭޕަލް އެކައުންޓްތަކަށް 100،000 އަށްވުރެ ގިނަ އެމެރިކާ ޑޮލަރު ޖަމާވެފައިވާކަމަށް އިކޮނޮމިކް މިނިސްޓްރީއިން ނެރުނު ތަފާސްހިސާބުތަކުން ދައްކައެވެ.
ޕޭޕަލްގެ ސަބަބުން ކުރިން ރާއްޖެއިން ބައިނަލްއަޤްވާމީ ބާޒާރުން ފައިސާ ހޯދުމުގައި ދިމާވި ދަތިތަކަށް ނިމުމެއް އައިސް، ދިވެހި އުފެއްދުންތަކާއި ހިދުމަތްތައް ބޭރުގެ ފަރާތްތަކަށް ވިއްކުމަށް މިހާރު ވަނީ ފުރުސަތުތައް ހުޅުވިފައެވެ.
ޕޭޕަލްއަކީ ދުނިޔޭގެ އެކި ކަންކޮޅުތަކުގައި އޮންލައިންކޮށް ރައްކާތެރިކަމާއެކު ފައިސާގެ މުއާމަލާތްތައް ކުރުމަށް ބޭނުންކުރާ އެންމެ މަގުބޫލު އަދި އިތުބާރު ހިފޭ އެއް ޑިޖިޓަލް ޕޭމަންޓް ޕްލެޓްފޯމެވެ. ދިވެހިރާއްޖޭގައި މި ހިދުމަތް ފޯރުކޮށްދެނީ އުރީދޫ ފިންޓެކްގެ ޑިޖިޓަލް ވޮލެޓް ކަމަށްވާ "އެމް-ފައިސާ" މެދުވެރިކޮށެވެ.
އެމް-ފައިސާ އެޕްލިކޭޝަންގައި ޕޭޕަލް އެކައުންޓް ލިންކުކޮށްލުމުން، ރާއްޖޭގެ ކޮންމެ ތަނެއްގައި ހުރެގެންވެސް ބޭރުގެ ފަރާތްތަކުން ފޮނުވާ ފައިސާ ފަސޭހަކަމާއެކު އެމް-ފައިސާ ވޮލެޓަށް ޖަމާކޮށް، އަދި ޕޭޕަލް މެދުވެރިކޮށް ބައިނަލްއަޤްވާމީ ވިޔަފާރީގެ މުއާމަލާތްތައް ހިންގުމުގެ މަގު ވަނީ ފަހިވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް