އުމުރުން ދުވަސްވީ މީހުން ސްކޭމްތަކުން ރައްކާތެރިކުރުމަށް އުރީދޫއާއި ފުލުހުން ސެޝަނެއް ބާއްވައިފި

އުރީދޫ މޯލްޑިވްސްއާއި ދިވެހި ފުލުހުންގެ ޚިދުމަތް ގުޅިގެން މާލެ އަދި ހުޅުމާލޭގެ އިސްރަށްވެހިންގެ ނާދީގައި ދޮށީ ޢުމުރުގެ މީހުންނަށް ޑިޖިޓަލް ރައްކާތެރިކަމާއި ސްކޭމްތައް ދެނެގަތުމާ ގުޅޭ ސެޝަނެއް ބާއްވައިފިއެވެ.

އުރީދޫއިން ބުނީ މި ޕްރޮގްރާމްގެ މައިގަނޑު އެއް ބައެއްގެ ގޮތުގައި ބައިވެރިންނަށް އާންމުކޮށް ހިންގާ ތަފާތު ބާވަތްތަކުގެ ސްކޭމްތައް ތަޢާރަފުކޮށްދިން ކަމަށެވެ. އޭގެ ތެރޭގައި މަކަރުވެރި ކޯލްތަކާއި މެސެޖުތައް ފިޝިން ލިންކުތައް އެހެން މީހެއް ކަމަށް ހެދިގެން އޮޅުވައިލުން އަދި މާލީ ނުވަތަ ޒާތީ މަޢުލޫމާތު ހޯދުމަށް ކުރާ މަސައްކަތްތައް ހިމެނެއެވެ.

ޕާސްވޯޑާއި އޯޓީޕީއާއި ބޭންކިން މަޢުލޫމާތު ފަދަ ސިއްރު ތަފުސީލުތައް ހިމާޔަތްކުރާނެ ގޮތާއި ޝައްކުކުރެވޭ މުޢާމަލާތެއް ފާހަގަވެއްޖެ ނަމަ ޢަމަލުކުރާނެ ގޮތްތައް ވެސް ސެޝަނުގައި ބައިވެރިންނަށް ކިޔައިދީފައިވެއެވެ.

ފުލުހުންގެ ޚިދުމަތުގެ މަންދޫބުން ވެސް މި ޕްރޮގްރާމްގައި ބައިވެރިވެ ޝައްކުކުރެވޭ ޙަރަކާތްތައް ދެނެގަންނާނެ ގޮތުގެ ޢަމަލީ އިރުޝާދު ދީފައިވެއެވެ. ހަމައެއާ އެކު ސްމާޓްފޯނާއި ޑިޖިޓަލް ޚިދުމަތްތައް ރައްކާތެރިކަމާ އެކު ބޭނުންކުރާނެ ގޮތް ދައްކައިދީ ބައިވެރިންނަށް ސުވާލުކޮށް ޢަމަލީ ގޮތުން ތަޖުރިބާ ކުރުމުގެ ފުރުޞަތު ވެސް ފަހިކޮށްދީފައިވެއެވެ.

އުރީދޫއިން ބުނީ 2018 ވަނަ އަހަރުން ފެށިގެން އިސްރަށްވެހިންގެ ނާދީއާ ގުޅިގެން ދޮށީ ޢުމުރުގެ މީހުންނަށް އަމާޒުކޮށް ތަފާތު ޙަރަކާތްތައް ހިންގަމުން އަންނަ ކަމަށެވެ. މި ފަހުގެ ޕްރޮގްރާމަކީ އެ ގުޅުމުގެ ތެރެއިން ކުރިއަށް ގެންދިޔަ ސެޝަނެއް ކަމަށާއި އެ ކުންފުނީގެ އަމާޒަކީ ޑިޖިޓަލް ހޭލުންތެރިކަން ފުޅާކޮށް ޓެކްނޮލޮޖީގެ ފައިދާ ރައްކާތެރިކަމާ އެކު ހުރިހާ އެންމެންނަށް ލިބޭނެ މާޙައުލެއް ބިނާކުރުން ކަމަށް ވެސް އެ ކުންފުނިން ބުނެފައިވެއެވެ.