ޕްރިމިއާ ލީގް: ސައުތެމްޓަން އަތުން ޔުނައިޓެޑަށް ހަނި މޮޅެއް

ޕްރިމިއާ ލީގުގައި މެންޗެސްޓާ ޔުނައިޓެޑުން ސައުތެމްޓަންއާއި ދެކޮޅަށް ކުޅެ ހަނި ގޮތަކަށް އެ ޓީމު ބަލިކޮށްފިއެވެ.

ސައުތެމްޓަންގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ފެނިގެން ގޮސްފައިވަނީ އާދައިގެ ކުޅުމެކެވެ. ޔުނައިޓެޑުން ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް ސައުތެމްޓަންގެ ގޯލަށް ނުރައްކާ ކުރެވޭ ވަރުގެ ފުރުސަތެއް ޔުނައިޓެޑަށް އުފެއްދިފައެއް ނުވެއެވެ.

މެޗުގެ ފުރަތަމަ ހާފު ނިމިގެން ގޮސްފައިވަނީ 0-0 ގެ ނަތީޖާއަކުން ދެ ޓީމު އެއްވަރުވެފައި އޮވެގެންނެވެ.

ޔުނައިޓެޑުން ދެވަނަ ހާފު ފަށައިފައިވަނީ ވަރުގަދަ ކޮށެވެ. އެގޮތުން ފުލުފުލުގައި ހަމަލާތައް އުފައްދާ، މެޗުގެ 55 ވަނަ މިނަޓުގައި ޔުނައިޓެޑުން ވަނީ ލީޑު ނަގާފައެވެ. ޔުނައިޓެޑުގެ ޑަލޮޓް ނަގައިދިން ހުރަހަކުން މި ގޯލު އެ ޓީމަށް ކާމިޔާބު ކޮށްދީފައިވަނީ ބްރޫނޯ ފަނާންޑޭޒްއެވެ.

ޔުނައިޓެޑުގެ ގޯލާއި އެކު ސައުތެމްޓަނުން ވަނީ ކުޅުން ރަނގަޅުކޮށް ގިނަ ހަމަލާތަކެއް އުފައްދާފައެވެ. ނަމަވެސް ޔުނައިޓެޑުގެ ގޯލް ކީޕަރު ޑެހެއާ އަދި ޑިފެންސް ލައިނުން ވަނީ ސައުތެމްޓަނުގެ ހަމަލާތައް ދިފާއު ކޮށްފައެވެ. ފާހަގަ ކޮށްލެވޭ ގޮތުގައި މިއީ އަމިއްލަ ދަނޑު ނޫން ދަނޑެއްގައި ޔުނައިޓެޑުން އެޕްރީލް މަހަށްފަހު މޮޅުވި ފުރަތަމަ މެޗެވެ.

މި މެޗުގައި ސްޕެއިންގެ ރެއާލް މެޑްރިޑް ދޫކޮށް ޔުނައިޓެޑާއި ގުޅުނު ކަސެމީރޯ ވަނީ ފުރަތަމަ ފަހަރަށް ޔުނައިޓެޑުގެ ޖާޒީގައި ފެނިގެން ގޮސްފައެވެ.

ލީގުގައި މިހާތަނަށް ކުޅުނު 4 މެޗުން 2 މެޗުން ބަލިވެ 2 މެޗު ކާމިޔާބުކޮށް ޔުނައިޓެ މިވަގުތު އޮތީ ޕްރިމިއާ ލީގު ތާވަލުގެ ހަވަނައިގައެވެ. ދެން ލީގުގައި ޔުނައިޓެޑުން އަންނަ މަހުގެ ފުރަތަމަ ދުވަހުގެ ރޭ ނިކުންނާނީ ލެސްޓާ ސިޓީއާއި ދެކޮޅަށެވެ.