މެންޗަސްޓާ ޔުނައިޓެޑުގެ ކޯޗުކަމަށް ޕޮޗެޓީނޯ އައްޔަނުކުރުމަށް ތައްޔާރުވަނީ

މެންޗަސްޓާ ޔުނައިޓެޑުގެ މިހާރުގެ ކޯޗު މައިކަލް ކެރިކް މަގާމުން ވަކިކުރުމަށް ނިންމައިފިނަމަ، އެ ކްލަބުގެ އާ ކޯޗަކަށް ޕޮޗެޓީނޯ އައްޔަނުކުރުމުގެ މަސައްކަތް ޔުނައިޓެޑުން ފަށައިފިއެވެ.

އެގޮތުން، ޔުނައިޓެޑުން އެންމެ ފަހަށް ކުޅުނު 15 މެޗުގެ ތެރެއިން މިހާތަނަށް އެންމެ 3 މެޗުން މޮޅުވެފައިވާއިރު، ކްލަބުގެ އިސްވެރިން އަންނަނީ، ކެރިކްގެ ބަދަލުގައި ޓީމާ ހަވާލުވާން އެންމެ އެކެށީގެންވާ ކޯޗަކީ އާޖެންޓީނާއަށް އުފަން ޕޮޗެޓީނޯ ކަމަށް ނިންމައި އޭނާ ކޯޗުގެ މަގާމަށް އައްޔަނުކުރުމަށް ތައްޔާރުވަމުންނެވެ.

މިހާރު ޔުނައިޓެޑުން ވަނީ، ޕޮޗެޓީނޯގެ އޭޖެންޓުންނާއެކު އެއްބަސްވުމުގެ ކަންކަން ނިމުމާ ގާތަށް ގޮސްފައެވެ. ނަމަވެސް، އެމެރިކާގެ ފުޓްބޯޅަ ފެޑެރޭޝަނާއެކު އަދި އެއްވެސް މަޝްވަރާއެއް ކުރެވިފައެއް ނުވެއެވެ. ޕޮޗެޓީނޯ އެމެރިކާގެ ގައުމީ ޓީމުގެ ކޯޗުކަމުގެ މަގާމުން ވަކިވާނަމަ، ކޮންޓްރެކްޓް އުވާލުމުގެ ފީއެއްގެ ގޮތުގައި 10 މިލިއަން ޑޮލަރު އެމެރިކާ ފުޓްބޯޅަ ފެޑެރޭޝަނަށް ދައްކަންޖެހޭނެއެވެ. މީގެއިތުރުން، ޕޮޗެޓީނޯއާއެކު އޭނާގެ އޮފިޝަލް ކޯޗިން ސްޓާފުން ވެސް ޔުނައިޓޭޑަށް ގެންދިއުމަށް ހަމަޖެހިފައިވާތީ އިތުރު ހަރަދުތަކެއް ހިނގާނެ ކަމަށް ލަފާކުރެވެއެވެ.

އުމުރުން 54 އަހަރުގެ ޕޮޗެޓީނޯއަކީ، މީގެ ކުރިންވެސް އިނގިރޭސިވިލާތުގެ ޓޮޓެންހަމް އާއި ޗެލްސީއަށް ކޯޗުކަން ކޮށްދީފައިވާ، ޕްރްމިއާ ލީގުގެ ތަޖުރިބާ ބޮޑު ކޯޗެކެވެ. ޓޮޓެންހަމްގައި ހޭދަކުރި ދުވަސްވަރު އެ ޓީމު 2019 ވަނަ އަހަރުގެ ޗެމްޕިއަންސް ލީގުގެ ފައިނަލަށް ގެންގޮސްދިން ޕޮޗެޓީނޯ ވަނީ، ފްރާންސްފެ ޕެރިސް ސެން ޖާމަން (ޕީއެސްޖީ) އާއެކު ލީގު ޗެމްޕިއަންކަން ވެސް ހޯދާފައެވެ. ޔުނިޓެޑްގެ ކޯޗުކަމާ ހަވާލުވުމަކީ، ޕޮޗެޓީނޯ ވެސް ވަރަށް ކުރީއްސުރެ ކުރަމުން އަންނަ އުންމީދެކެވެ.

އެމެރިކާގެ ގައުމީ ޓީމާއެކު 2030 ވަނަ އަހަރުގެ ވޯލްޑް ކަޕުގެ ނިޔަލަށް އެއްބަސްވުމެއް އޮތް ޕޮޗެޓީނޯ ވަނީ، އެމެރިކާ ޓީމާއެކު ކުޅުނު 35 މެޗުގެ ތެރެއިން 21 މެޗުން މޮޅުވެފައެވެ. އަދި އެންމެ ފަހުން ބޭއްވި ވޯލްޑް ކަޕުގައި އެމެރިކާ ގަދަ 16 އަށް އޭނާ ގެންގޮސްދިނެވެ. އެގޮތުން، މިހާރު އޭނާ ތައްޔާރުވަމުން ދަނީ، އިންޓަނޭޝަނަލް ބްރޭކްގައި ހެއިޓީއާ ދެކޮޅަށް އެމެރިކާ ކުޅޭ ދެ މެޗަށެވެ.

މި ސީޒަނުގެ ޕްރެމިއާ ލީގުގައި ޔުނައިޓެޑަށް އެންމެ އެކަށީގެންވާ ނަތީޖާއެއް ނެރެވިފައިނުވާއިރު، ލީގުގެ ފުރަތަމަ 10 މެޗުގެ ތެރެއިން އެ ޓީމަށް މޮޅުވެވުނީ އެންމެ މެޗަކުންނެވެ. ކްލަބުގެ ހާލަތު ގޯސްވެފައިވާ މި ދަނޑިވަޅުގައި، ޔުނައިޓެޑްގެ ޗީފް އެގްޒެކެޓިވް އޯމާ ބެރާޑާ އާއި ޑައިރެކްޓަރ އޮފް ފުޓްބޯޅަ ޖޭސަން ވިލްކޮކްސް ވަނީ، ކްލަބުގެ ހިއްސާދާރު ސާ ޖިމް ރެޓްކްލިފްއާ ބައްދަލުކުރުމަށް މޮނާކޯއަށް ފުރާފައެވެ. މި ބައްދަލުވުމުގައި މައިކަލް ކެރިކް މަގާމުގައި ބެހެއްޓުމާ މެދު ގޮތެއް ނިންމައި، ކޯޗުކަމަށް ބަދަލެއް ގެނައުމުގެ ފަހުގެ މަޝްވަރާތައް ކުރިއަށްދާނެ ކަމަށް ބެލެވެއެވެ.