ޗެލްސީއަތުން މެންޗެސްޓަރ ޔުނައިޓެޑް ބަލިވެ، ކެރިކްގެ މުސްތަގްބަލާމެދު ސުވާލު އުފެދިއްޖެ

އިނގިރޭސި ޕްރިމިއާލީގްގައި ރޭ ޗެލްސީއަތުން މެންޗެސްޓަރ ޔުނައިޓެޑް ބަލިވެ، އެޓީމްގެ ކޯޗް މައިކަލް ކެރިކްގެ މުސްތަޤްބަލާމެދު ސުވާލު އުފެދިއްޖެއެވެ.

ލީގްގައި ޗެލްސީ އާއި މެންޗެސްޓަރ ޔުނައިޓެޑް ބައްދަލުކުރިމެޗުން ޔުނައިޓެޑް ބަލިވީ، 2-0 ގެ ނަތީޖާއިންނެވެ. މި ބައްޔާއެކު ޔުނައިޓެޑަށް މޮޅެއް ނުލިބި ނިންމާލި މެޗުތަކުގެ އަދަދު ވަނީ ނުވަޔަކަށް އަރާފައެވެ. މިއީ ވޭތުވެދިޔަ 40 އަހަރު ތެރޭގައި އެ ޓީމުގެ ނަތީޖާތައް މިހާ ދަށަށް ދިޔަ ފުރަތަމަ ފަހަރެވެ. ރޭގެ މެޗުގެ ނަތީޖާގެ އިތުރުން ޔުނައިޓެޑަށް ކުރިމަތިވި އެންމެ ބޮޑު ގޮންޖެހުމަކީ މެޗުގެ ފަހުކޮޅު އެ ޓީމުގެ ޑިފެންޑަރު ލިސަންދްރޯ މާޓިނޭޒަށް ދެއްކި ރަތް ކާޑެވެ.

މެޗުގެ ފުރަތަމަ ހާފުގައި ޔުނައިޓެޑުން ރަނގަޅު ކުޅުމެއް ދައްކައި ލަނޑު ޖަހާނެ ފުރުސަތުތަކެއް ތަނަވަސްކުރިއެވެ. ޚާއްޞަކޮށް ޓީމާ ގުޅުނު ކެޕްޓަން ބްރޫނޯ ފެނާންޑޭޒާއި އަމަދު ޑިއާލޯއަށް ލިބުނު ފުރުސަތުތައް ފާހަގަކޮށްލެވެއެވެ. ނަމަވެސް ޗެލްސީގެ ކީޕަރު މައިކް ޕެންޑާސް ވަނީ އެ ހަމަލާތައް ހުށިޔާރުކަމާއެކު ދިފާއުކޮށްފައެވެ.

ޗެލްސީން މެޗުގެ ލީޑު ނެގީ ދެވަނަ ހާފު ފެށިގެން މާގިނަ އިރުތަކެއް ނުވަނީސް މޯގަން ރޮޖާސް ކާމިޔާބުކުރި ހިތްގައިމު ލަނޑުންނެވެ. އޭގެ ކުޑައިރުކޮޅެއް ފަހުން، ޔުނައިޓެޑުގެ އޭރިއާ ތެރެއިން މާޓިނޭޒް ކުރި ފައުލަކަށް ވީ.އޭ.އާރް ބެލުމަށްފަހު ޕެނަލްޓީއެއް ދީ، އޭނާއަށް ދެވަނަ ރީނދޫ ކާޑަކާއެކު ރަތް ކާޑު ދެއްކިއެވެ. މި ޕެނަލްޓީ ކާމިޔާބުކޮށް ޗެލްސީގެ ދެވަނަ ލަނޑު ޖަހައިދިނީ ކޯލް ޕާމާއެވެ.

މި ނަތީޖާއާއެކު ޔުނައިޓެޑް މިހާރު އޮތީ ރެލިގޭޝަން ޒޯނަށްވުރެ އެންމެ ޕޮއިންޓެއް ކުރީގައެވެ. މެޗަށްފަހު ވާހަކަދައްކަމުން ކެރިކް ބުނީ ނަތީޖާ ގޯސްވި ނަމަވެސް ކުޅުންތެރިންގެ މަސައްކަތާމެދު ހިތްހަމަޖެހޭ ކަމަށެވެ. މި މޮޅާއެކު ޗެލްސީ ވަނީ ތާވަލުގެ ހަތަރުވަނައަށް ކުރިއަށް ޖެހިލާފައެވެ.