ޕްރިމިއާ ލީގް: ލިވަޕޫލުން ބޯންމައުތު ކޮޅަށް ނުވަ ގޯލު

ޕްރިމިއާ ލީގުގައި ލިވަޕޫލުން ބޯންމައުތު ކޮޅަށް ނުވަ ގޯލު ޖަހައި އެ ޓީމު ބަލިކޮށްފިއެވެ.

ލިވަޕޫލުން މި ސީޒަނުގެ ލީގުގައި މި މެޗުގެ ކުރިން ކުޅުން ތިން މެޗުންވެސް މޮޅުވާ ގޮތް ވަނީ ނުވަފައެވެ. އެގޮތުން ކްރިސްޓަލް ޕެލެސް އަދި ފުލަމް އަތުން އެއްވަރުވެ ވާދަވެރި މެންޗެސްޓާ ޔުނައިޓެޑު އަތުން އެ ޓީމު ވަނީ ބަލިވެފައެވެ. ނަމަވެސް މިރޭގެ މެޗުގައި ލިވަޕޫލުގެ ފަރާތުން ފެނިގެން ގޮސްފައިވަނީ ތަފާތު މޮޅު ކުޅުމެކެވެ.

މެޗަށްފަހު ވާހަކަ ދައްކަމުން ލިވަޕޫލުގެ ކޯޗު ބުނެފައިވަނީ ލީގުގައި ފެނިގެންދިޔަ ދައް ފެށުމާއި އެކު އޭނާގެ ޓީމުން ދޭން ބޭނުންވި ވަރުގަދަ ޖަވާބު ދެވިގެން ގޮސްފައިވާ ކަމަށެވެ.

މިރޭގެ މެޗުގައި ލިވަޕޫލުން ލީޑު ނަގައިފައިވަނީ މެޗުގެ ތިންވަނަ މިނަޓުގައި ލުއިސް ޑިއާޒް ގެ ގޯލަކުންނެވެ. އޭގެ ތިން މިނަޓު ފަހުން ލިވަޕޫލުގެ ދެވަނަ ގޯލު ޖަހައިދިނީ ހާވޭ އެލިއަޓެވެ. ލިވަޕޫލުގެ ތިންވަނަ ގޯލު އެ ޓީމަށް ކާމިޔާބު ކޮށްދިނީ މެޗުގެ 28 ވަނަ މިނަޓޫގައި އާނޯލްޑެވެ. ފުރަތަމަ ހާފު ނިމުމުގެ ކުރިން ލިވަޕޫލުން ވަނީ ފަމީނޯ އަދި ވެން ޑައިކުގެ ގޯލު ތަކުން ޖުމްލަ 5 ގޯލުގެ ލީޑެއް ނަގާފައެވެ.

މެޗުގެ އެންމެ ތަފާތު ކުޅުމެއް ދެއްކި ފަމީނޯ ވަނީ މެޗުގައި ލިވަޕޫލުން ފުރަތަމަ ޖެހި ތިން ގޯލު ޖެހުމުގައިވެސް އެހީތެރިވެ ދީފައެވެ. ފާހަގަ ކޮށްލެވޭ ގޮތުގައި މިއީ ލިވަޕޫލުން އެ ޓީމުގެ ތާރީހުގައިވެސް މެޗެއްގެ ފުރަތަމަ ހާފުގައި 5 ގޯލު ކާމިޔާބު ކުރި ފުރަތަމަ ފަހަރެވެ.

ލިވަޕޫލުން ދެވެނަ ހާފުވެސް ފެށީ ވަރުގަދަ ކޮށެވެ، އެގޮތުން ދެވަނަ ހާފުގެ ފުރަތަމަ މިނަޓުގައި ލިވަޕޫލުގެ އާނޯލްޑް ފޮނުވާލި ބޯޅަ ބޯންމައުތުގެ ގޯލަށް ވަނީ އެ ޓީމުގެ މެފަމް ގައިގައި ޖެހި ބައިކޮޅަށެވެ. އަނެއްކާވެސް މެޗުގައި ފެނިގެން ދިޔައީ ފަމީނޯގެ ގޯލެކެވެ. އެއަށްފަހު އެ ޓީމާއި އަލަށް ގުޅުނު ކަވާލޯގެ ގޯލެއް މެޗުގެ 80 ވަނަ މިނަޓުގައި ފެނިގެން ގޮސްފައި ވެއެވެ. މެޗުގައި ލިވަޕޫލުން ޖެހި ނުވަ ވަނަ ގޯލު އޭގެ ފަސްމިނަޓު ފަހުން ކާމިޔާބު ކޮށްދިނީ މެޗުގެ ފުރަތަމަ ގޯލުވެސް ކާމިޔާބު ކޮށްދިން ލުއިސް ޑިއާޒް އެވެ.

މި މޮޅާއި އެކު ލިވަޕޫލު ވަނީ ތާވަލުގެ 8 ވަނަ އަށް ޖެހިލާފައެވެ. ދެން ލިވަޕޫލުން ލީގުގައި އަންނަ ބުރާސްފަތި ދުވަހުގެ ރޭ ނިކުންނާނީ ނިއުކާސަލް ޔުނައިޓެޑާއި ދެކޮޅަށެވެ.