ޖަޕާނުގައި ކްރިކެޓް އާލާކުރަނީ

ބޭސްބޯޅަ އިންތިހާއަށް މަގުބޫލު، އަދި ކްރިކެޓްގެ ނަންވެސް މާ ބޮޑަށް އެނގިފައިނުވާ ޖަޕާނުން މިވަނީ އެ ގައުމުގެ ތާރީޚުގައިވެސް ކުޅިވަރުގެ ދާއިރާއިން ނުފެންނަ ފަދަ ޚާއްޞަ ދެ ހަފުތާއަކަށް ތައްޔާރުވާން ފަށާފައެވެ.ކްރިކެޓްގެ މަގުބޫލުކަން ކުޑަ ޖަޕާނުގައި ކްރިކެޓް އާލާކޮށް، ކްރިކެޓާއި މެދު އޮންނަ ޝައުގުވެރިކަން އިތުރުކުރުމުގެ މަސައްކަތްތަކެއް ފަށައިފިއެވެ.

ދުނިޔޭގެ ކްރިކެޓްގެ އެންމެ ބޮޑެތި ނަންތައް، އޭގެ ތެރޭގައި ކްރިކެޓްގެ ގަދަފަދަ އިންޑިއާ ހިމެނޭ ގޮތަށް، ކުރިއަށް އޮތް ހަފުތާގައި ޖަޕާނަށް ޒިޔާރަތްކުރުމަށް ވަނީ ހަމަޖެހިފައެވެ. މިއާއެކު، ސަރަޙައްދީ ކޮލިފައިން މެޗެއް މަދުން ނަމަވެސް ބާއްވަމުން އައި ޖަޕާން ވެގެންދާނީ ސަރަހައްދީ ފެންވަރު ކްރިކެޓްގެ މުހިންމު މަރުކަޒަކަށެވެ.މި ފުރުސަތު ލިބިގެންދިޔައީ ސިޔާސީ އަދި ޚާރިޖީ ގުޅުންތަކުގެ ތެރެއިންނާއި، ކޯޕަރޭޓް ސްޕޮންސަރުންގެ އެހީތެރިކަމާއެކު، ޖަޕާން ކްރިކެޓް އެސޯސިއޭޝަން (ޖޭސީއޭ) އިން މި ކުޅިވަރު އާލާކުރުމަށް ގިނަ އަހަރުތަކެއް ވަންދެން ކުރި މަސައްކަތުގެ ނަތީޖާއެއްގެ ގޮތުންނެވެ.

ޖޭސީއޭ އިން ވަނީ ދުނިޔޭގެ ޓްވެންޓީ ޓްވެންޓީ ޗެމްޕިއަން އިންޑިއާގެ ގައުމީ ޓީމު ސާނޯގައި ޖަޕާނާ ދެކޮޅަށް ކުޅުމަށް އެއްބަސްކުރުވައި ބޮޑު ކާމިޔާބީއެއް ހޯދާފައެވެ. މިއީ އައިސީސީގެ އެސޯސިއޭޓް މެމްބަރެއްގެ ގޮތުގައިވާ ޖަޕާން، އައިސީސީގެ ފުރިހަމަ މެމްބަރު ގައުމަކާ ދެކޮޅަށް ކުޅޭ ފުރަތަމަ ފަހަރެވެ.

މުޅި ޖަޕާނުގައިވެސް ހުންނަނީ 16 ކްރިކެޓް ދަނޑެވެ. އެ ގައުމުގެ އަންހެން ޓީމު ދުނިޔޭގެ ރޭންކިންގގެ 39 ވަނައިގައި އޮތްއިރު، ފިރިހެން ޓީމު އޮތީ އެއަށްވުރެ ދެ ދަރަޖަ ފަހަތުގައެވެ.

"އެކަކު މެޗަކުން ނުވަތަ މުބާރާތަކުން އެކަނި ހުރިހާ ކަމެއް ބަދަލެއް ނުވާނެ. އަދި ކުއްލިއަކަށް ޖަޕާނުގައި ބޭސްބޯޅަ ނުވަތަ ފުޓުބޯޅަ ފަދައިން ކްރިކެޓް މަގުބޫލުވެގެންދާނެ ކަމަކަށް އަހަރެމެން ގަބޫލެއް ނުކުރަން،" މިޔާޖީ ރޮއިޓާސްއަށް ވިދާޅުވިއެވެ.

ޖޭސީއޭ އިން ވަނީ ސާނޯގައި ޓްވެންޓީ ޓްވެންޓީ އިންޓަނޭޝަނަލް މެޗެއް ކުޅުމަށް އިންޑިއާގެ ކްރިކެޓް ބޯޑު އެއްބަސްކުރުވުމަށް އަހަރަކަށްވުރެ ގިނަ ދުވަހު މަސައްކަތްކޮށްފައެވެ. މި މަސައްކަތަށް ބޮޑު ކުރިއެރުމެއް ލިބުނީ ޖަޕާނު ސަރުކާރުން މިކަމުގެ ތެރެއަށް ވަނުމުންނެވެ.

މި އަހަރުގެ ކުރީކޮޅު އިންޑިއާއަށް ކުރެއްވި ޒިޔާރަތެއްގައި، ޖަޕާނުގެ ޚާރިޖީ ވަޒީރު ތޮޝިމިޓްސު މޮޓޭގީ ވަނީ އިންޑިއާގެ ޚާރިޖީ ވަޒީރު ސުބްރަމަންޔަމް ޖައިޝަންކަރަށް ޖޭސީއޭގެ ކްރިކެޓް ޖާޒީއެއް ހަދިޔާކުރައްވާފައެވެ. ރައްދުގައި ޖައިޝަންކަރު ވަނީ އިންޑިއާގެ ކްރިކެޓް ކުޅުންތެރިން ސޮއިކޮށްފައިވާ ބެޓެއް ހަދިޔާކުރައްވާފައެވެ. އެއަށްފަހު، ޖަޕާނުގެ ބޮޑުވަޒީރު ސަނާއޭ ތަކާޗީ، ޖުލައި މަހު ނިއު ދިއްލީގައި އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވައި، ދެ ގައުމުގެ ސިޔާސީ ގުޅުމަށް 75 އަހަރު ފުރުން ފާހަގަކުރުމުގެ ގޮތުން "ސުޒުކީ ކަޕް" ގެ ނަމުގައި ކްރިކެޓް މެޗެއް ބޭއްވުމަށް އެއްބަސްވެވަޑައިގެންނެވިއެވެ.އޭޝިއަން ގޭމްސް މުބާރާތަށް ޖޭސީއޭ އިން ސާނޯ އިންޓަނޭޝަނަލް ކްރިކެޓް ގްރައުންޑް ހުށަހެޅި ނަމަވެސް، އިންތިޒާމުކުރާ ފަރާތްތަކުން ނިންމީ ލޮޖިސްޓިކް މައްސަލަތަކުން ރައްކާތެރިވުމަށް ނަގޯޔާގެ ބޭސްބޯޅަ ދަނޑެއް ކްރިކެޓް ދަނޑަކަށް ބަދަލުކޮށްގެން ބޭނުންކުރުމަށެވެ.