ދިވެހި ގައުމުގެ ދެމިއޮތުމުގެ ބިނާވެގެންވަނީ އިސްލާމްދީނުގެ ތަރުބިއްޔަތާއި ރައްކާތެރިކަމުގެ މައްޗަށް: ރައީސް ޑރ.މުއިއްޒު
ލިޔުންތެރިޔާ
އަބްދުﷲ ހުސައިން
ދިވެހި ގައުމުގެ ދެމިއޮތުމުގެ އަސްލު ބިނާވެގެންވަނީ މާތްވެގެންވާ އިސްލާމްދީން އަޅުގަނޑުމެންނަށް ދޭ ތަރުބިއްޔަތާއި ރައްކާތެރިކަމުގެ މައްޗަށް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ، ދިވެހިރާއްޖެ އިސްލާމްވިތާ 900 އަހަރު ފުރުން ފާހަގަކުރުމުގެ ގޮތުން ބޭއްވި ޖަލްސާގައި ދެއްކެވި ވާހަކަފުޅުގައެވެ. ރައީސް ޑރ.މުއިއްޒު ވިދާޅުވީ، ދީން ދޭ އެންމެހައި ރައްކާތެރިކަމަކާ ހަމައަށް ވާސިލުވެވޭނީ ހިތުގެ އީމާންކަން ވަރުގަދަކޮށް، މާތް ﷲ ގެ ގަޟާގަދަރަށް ފުރިހަމައަށް އީމާންވެގެން ކަމަށެވެ. އަދި ނަފްސުތައް ތޯހިރުކޮށް، ހެޔޮ މަގުގައި ސާބިތުވެ ތިބެގެން ކޮންމެ ފަރުދަކުވެސް އިސްލާމީ ދިރިއުޅުމެއް ޚިޔާރުކުރަންޖެހޭ ކަމަށާއި، ގައުމީ ތަރައްގީގައި ދީނީ މުސްތަގުބަލު ކަނޑައަޅަންވީ ކޮންމެ ފަރުދަކާ ހަމައިން ފެށިގެން މުޅި ޖަމާއަތަށް ކަމަށް އެމަނިކުފާނު ފާހަގަކުރެއްވިއެވެ.
ރައީސްގެ ވާހަކަފުޅުގައި އިސްލާމީ ޝަރީއަތުގެ މައިގަނޑު ފަސް މަގުސަދު ހާސިލުވާ ގޮތަށް ކަންކަން ތަންފީޒުކުރުމުގެ މުހިންމުކަމުގެ މައްޗަށް އަލިއަޅުއްވާލެއްވިއެވެ. އެގޮތުން އެކަކު އަނެކަކަށް ހިތްހެޔޮ، އެއް ހަށިގަނޑެއް ފަދަ އެކުވެރި ބަޔަކަށް ވެވިއްޖެނަމަ، އެތެރެއާއި ބޭރުން އަންނަ އެއްވެސް ނުރައްކަލަކަށް ގައުމުގެ ސިޔާދަތާއި މިނިވަންކަން ގުޑުވައިނުލެވޭނެ ކަމަށް ވިދާޅުވިއެވެ.
ދިވެހި ތާރީޚަށް ބައްލަވާލައްވަމުން ރައީސް ވިދާޅުވީ، ދިވެހީންގެ ގައުމިއްޔަތުގެ މައި ޖަވާހިރަކީ އިސްލާމްދީން ކަމަށެވެ. އެގޮތުން އުތީމު މަހާރަދުން ޕޯޗުގީޒުންނާ ދެކޮޅަށް ކުރެއްވި ގައުމީ ޖިހާދަކީވެސް ދީން ސަލާމަތްކުރުމުގެ ރޫހާނީ ބިންގަލުގެ މަތީގައި ކުރެވުނު ކަމެއްކަން އެމަނިކުފާނު ހަނދާންކޮށްދެއްވިއެވެ. އަދި ޕޯޗުގީޒުން ގަދަކަމުން ދީން ބަދަލުކުރުވައި މަސްތުވާތަކެތި ދޭން އުޅުމުންވެސް ދިވެހިން އެކަމާ ދެކޮޅުހެދީ ސައްތައިން ސައްތަ އިސްލާމީ ވަހުދަތާއި ސަގާފީ ސިޔާދަތު އޮތުމުން ކަމަށް ވިދާޅުވިއެވެ.
ދިވެހީންގެ ހުނަރުވެރި ކާބަފައިން އަމިއްލަ އެތަކެއްޗެއް އަމިއްލަ އަތުން އުފައްދައިގެން ބިނާކުރި ދިރިއުޅުން ހޯދައިދިނީވެސް ހަމަ އިސްލާމްދީން
ރައީސް ޑރ.މުއިއްޒު
މީގެއިތުރުން، އިސްލާމްދީނަކީ އިންސާނާގެ ވިސްނުން ހެޔޮގޮތުގައި ބައްޓަންކޮށް، އިލްމު ހޯދުމަށާއި، ބުރަކޮށް މަސައްކަތްކޮށް އުފެއްދުންތެރި ބަޔަކަށް ވުމަށް ބާރުއަޅާ ޝާމިލު ދީނެއްކަން ރައީސް ފާހަގަކުރެއްވިއެވެ. އަދި ދިވެހިންގެ ޚާރިޖީ ގުޅުންތަކާއި، ފުދުންތެރި އިގުތިސާދަކާއި، ޒަކާތާއި ވަގުފު ފަދަ މާލީ އަދުލުވެރި ނިޒާމުތައް ބިނާވެފައިވަނީވެސް މާތްވެގެންވާ އިސްލާމްދީނުގެ ހަމަތަކުގެ މައްޗަށް ކަމުގައި އެމަނިކުފާނު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
