ސްޕެއަރ ޕާޓްސް ލިބި، އައްޑޫ ސީޕީއެސްގެ 1 ޖެންސެޓުގެ މައްސަލަ މާދަމާ ހައްލުކުރެވޭނެ: ފެނަކަ
ސްޕެއަރ ޕާޓްސް ލިބި، އައްޑޫސިޓީގެ ގުޅިފައިވާ ރަށްތަކަށް ކަރަންޓު ދިނުމަށް ގާއިމުކޮށްފައިވާ ސީޕީއެސްގެ 1 ޖެންސެޓުގެ މައްސަލަ މާދަމާ ހައްލުކުރެވޭނެކަމަށް ފެނަކަ ކޯޕަރޭޝަން ލިމިޓެޑުން ބުނެފިއެވެ.
އައްޑޫ ސިޓީގެ ގުޅިފައިވާ ރަށްތަކަށް ކަރަންޓު ފޯރުކޮށްދޭ ޖެންސެޓުތަކަށް ދިމާވި މައްސަލައާއި ގުޅިގެން ފެނަކައިން ނެރުނު ނޫސް ބަޔާނެއްގައި ބުނީ، މިކަމާއި ގުޅިގެން އެ ސިޓީގައި ދެމުންގެންދާ ކަރަންޓުގެ ހިދުމަތަށް ބުރޫ އަރާފައިވާކަމަށެވެ.
މި މައްސަލަ ހައްލުކުރުމަށްޓަކައި ޖެންސެޓުތަކަށް ބޭނުންވާ ސްޕެއަރ ޕާޓްސް ހޯދުމުގެ މަސައްކަތް މިހާރުވެސް ކުރަމުންދާކަމަށާއި، މިގޮތުން ސްޕެއަރ ޕާޓްސް ލިބި، 1 ޖެން ސެޓުގެ މައްސަލަ މާދަމާ ހައްލުކުރެވޭނެކަމަށް ފެނަކައިން ބުނެއެވެ.
ސްޕެއަރ ޕާޓްސް ލިބުނުހާ އަވަހަކަށް، ދެން ހުރި ޖެންސްޓުތައް ހައްލުކުރުމުގެ މަސައްކަތް ކުރެވޭނެކަން ފާހަގަކޮށް ފެނަކައިން ބުނީ، މި މައްސަލަ ހައްލު ކުރެވެންދެން ކަރަންޓު ލޯޑު ހިފެއްޓުމަކަށްޓަކައި، ގުޅިފައިވާ ރަށްތަކުގެ އެކި ސަރަހައްދުތަކުން، އެކުލަވާލެވޭ ތާވަލާއި އެއްގޮތަށް ކަރަންޓު ކެނޑުމަށް ހަމަޖެހިފައިވާކަމަށެވެ.
މީގެ އިތުރުންވެސް އެކޯޕަރޭޝަނުން ބުނީ، މިކަމުގެ ސަބަބުން އައްޑޫ ސިޓީގެ ގުޅިފައިވާ ރަށްތަކުގެ ރައްޔިތުންނަށް ދިމާވާނެ ދަތިތަކަށް މައާފަށް އެދޭކަމަށާއި، މި މައްސަލަ ވީހާވެސް އަވަހަށް ހައްލުކޮށް ކަރަންޓުގެ ހިދުމަތް އާއްމު ހާލަތަކަށް ގެނައުމަށްޓަކައި، ފެނަކަ ޓީމުން މެދުނުކެނޑި މަސައްކަތް ކުރަމުންދާނެކަމުގެ ޔަގީންކަން އަރުވާކަމަށެވެ.
މިއާއިއެކު، ފެނަކައިން ވަނީ މިފަދަ ދަނޑިވަޅުތަކުގައި ރައްޔިތުންގެ ފަރާތުން ދޭ އެއްބާރުލުމަށް ޝުކުރު އަދާކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
