އައިއޭސީން ފައިސާގެ އެހީ ބަލައިގަތުން ވަގުތީ ގޮތުން މެދުކަނޑާލައިފި

ބައިނަލްއަޤްވާމީ ފެންވަރުގައި އިންސާނިއްޔަތަށް ހިދުމަތްކުރަމުން އަންނަ ޖަމިއްޔާއެއްކަމަށްވާ އިންޓަރނޭޝަނަލް އެއިޑް ކެމްޕެއިނުގެ ޕްރޮޖެކްޓްތަކަށް ފައިސާގެ އެހީ ބަލައިގަތުން ވަގުތީގޮތުން މެދުކަނޑާލައިފިއެވެ.

މިކަމާ ގުޅޭގޮތުން އައިއޭސީން ނެރުނު ބަޔާނެއްގައި ބުނީ، އެޖަމިއްޔާގެ މަސައްކަތްތައް އިތުރަށް ތަރައްޤީކޮށް ފުރިހަމަ ކުރުމަށްޓަކައި ވަގުތީގޮތުން އަޅާ ފިޔަވަޅެއްގެ ގޮތުން މިވަގުތަށް ފައިސާ ބަލައިގަތުން ހުއްޓާލާފައިވާ ކަމަށެވެ.

އައިއޭސީން ބުނީ ވަގުތީގޮތުން ފައިސާ ބަލައިގަތުން ހުއްޓާލި ނަމަވެސް އެޖަމިއްޔާއިން ކުރިއަށްގެންދާ މަޝްރޫޢުތަކާއި އެހެނިހެން ކަންކަން ކުރިއަށްދާބނޭ ކަމަށެވެ.އައިއޭސީން ވަނީ ފައިސާ ބަލައިގަތުން ހުއްޓާލުމާ ގުޅިގެން ކުރިމަތިވެދާނެ ދަތިތަކަށް މައާފަށް އެދިފައެވެ.

އައިއޭސީން ބުނީ ކުރިއަށް އޮތް ނޮވެމްބަރުމަހުން ފެށިގެން ކުރިއެކޭ އެއްގޮތަށް އެހީގެ ގޮތުގައި ފައިސާ ބަލައިގަތުން ކުރިއަށްދާނޭ ކަމަށެވެ.

ދުނިޔޭގެ އެކި ކަންކޮޅުތަކުގައި ހާލުގައި ޖެހިފައިވާ މުސްލިމް މުޖުތަމައުއަށް އިންސާނީ އެހީތެރިކަން ފޯރުކޮށްދިނުމަށް އައިއޭސީން އަންނަނީ ނަމޫނާ މަސައްކަތްތަކެއް ކުރަމުންނެވެ.

މީގެ ތެރެއިންވެސް އެންމެ ފާހަގަކޮށްލެވެނީ ޔަހޫދީ ސިފައިންގެ އުދުވާންތަކުގެ ސަބަބުން ހާލުގައި ޖެހިފައިވާ ފަލަސްތީނުގެ މުސްލިމުންނަށް އައިއޭސީން ދެމުންގެންދާ އެހީތެރިކަމެވެ.

އައިއޭސީން ގެންދަނީ އެފްރިކާ އަދި އޭޝިއާގެ ޤައުމުތަކުގައި ހާލުގައި ދިރިއުޅެމުންދާ މުސްލިމުންނަށް ތަފާތު އެކި ދާއިރާތަކުން އެހީތެރިކަން ދެމުންނެވެ. މީގެ ތެރޭގައި ފެންވަޅު ބިނާކުރުމާއި، މިސްކިތްތަކުގެ އިތުރުން ސްކޫލްތައް ބިނާކުރުމަށް ކުރިއަށްގެންދާ މަޝްރޫއުތައް ފާހަގަކޮށްލެވެއެވެ.