ނަޒާހަތްތެރިކަމާއެކު މަސައްކަތްކޮށްދެއްވާ ، މަގާމުގެ ކުރިއެރުން ދޭއިރު ސިޔާސީ ކުލައަކަށް ނުބަލާނަން: މާރިޔާ
ކަސްޓަމްސް ސާވިސްގެ މުވައްޒަފުން ނަޒާހަތްތެރިކަމާއެކު މަސައްކަތްކޮށްދެއްވުމަށާއި މަގާމުގެ ކުރިއެރުން ދޭއިރު ސިޔާސީ ކުލައަށް ނުބައްލަވާނެ ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
ކަސްޓަމްސްގެ 129 ވަނަ އަހަރީ ދުވަހުގެ ހަރަކާތް ފެށުމުގެ ގޮތުން މިއަދު ހެނދުނު ބޭއްވި ދިދަ ނެގުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރު މާރިޔާ ވިދާޅުވީ ކަސްޓަމްސްގެ މަގާމްގެ ކުރިއެރުން މިދިޔަ ސަރުކާރުން ސިޔާސީ ކުލައަށް ބަލައިގެން ދިން ކަމުގެ ޝަކުވާ ލިބޭ ކަމަށެވެ. އަދި މި ސަރުކާރުން ކަސްޓަމްސްގެ މަގާމްގެ ކުރިއެރުން ދޭނީ ސިޔާސީ ކުލައަށް ބެލުމެއް ނެތި ކަމަށް ވިދާޅުވިއެވެ.
އެހެންކަމުން ހުރިހާ މުވައްޒަފުންވެސް އިހުލާސްތެރިކަމާއި ނަޒާހަތްތެރިކަމާއެކު މަސައްކަތްކުރުމަށް މާރިޔާ އިލްތިމާސްކުރެއްވިއެވެ. މާރިޔާ ވިދާޅުވީ ކަސްޓަމްސްގެ މަސައްކަތް ފެށިގެން އައިއިރު ކަސްޓަމްސްއަކީ ހަމައެކަނި މުދާ ދޫކުރާތަނެއްގެ ގޮތުގައި ރައްޔިތުން ދެކެމުންއައި ކަމަށެވެ. އެހެންނަމަވެސް މިހާރު ކަސްޓަމްސްއަކީ އެއަށް ވުރެބޮޑު ޒިންމާތަކެއް މަތިކޮށްފައިވާ ތަނެއް ކަމަށް ވިދާޅުވިއެވެ.
އެގޮތުން މަސްތުވާތަކެއްޗަށް ހުޅުވިފައިވާ ދޮރުތައް ބަންދުކުރުމުގައި ކަސްޓަމްސްގެ ވަރަށް ބޮޑު ޒިންމާއެއް އޮންނަކަން ފާހަގަކުރައްވައި މާރިޔާ ވިދާޅުވީ އެ ޒިންމާ އަދާކުރުމުގައި، ކަސްޓަމްސްގެ މުވައްޒަފުންނަށް ކުރިމަތިވެފައިވާ ގިނަ ގޮންޖެހުންތަކާއެކު ވެސް ރައީސް ސޯލިހު ކޮރަޕްޝަނާ ދެކޮޅަށް ގެންގުޅުއްވާ ޒީރޯ ޓޮލެރެންސް ތަންފީޒު ކުރަންޖެހޭ ކަމަށެވެ.
މިރަސްމިއްޔާތުގައި ގައުމީ ދިދަ ނަންގަވައިދެއްވީ ޑިފެންސް މިނިސްޓަރު މާރިޔާ އަހުމަދު ދީދީއެވެ. އަދި ކަސްޓަމްސްގެ ދިދަ ނަންގަވައިދެއްވީ ކޮމިޝަނާ ޖެނެރަލް އޮފް ކަސްޓަމްސް އަހުމަދު ނުއުމާނެވެ. މިރަސްމިއްޔާތުގައި ކަސްޓަމްސްގެ ގިނަ އަދަދެއްގެ މުވައްޒަފުން ބައިވެރިވިއެވެ.
މީގެއިތުރުން ކަސްޓަމުން ވަނީ އަހަރީ ދުވަހާއި ގުޅިގެން ގިނަ ހަރަކާތްތަކެއްވެސް ހިންގަން ރަވަފައެވެ. އެގޮތުން ކަސްޓަމްސްގެ ތާރީޚު ދައްކުވައިދޭ މައުރަޒަކާއި ''ކަސްޓަމްސް ނައިޓް'' ގެ ނަމުގައި މުނިފޫހި ފިލުވުމުގެ ހަފުލާއެއް ވެސް ބޭއްވުމަށް ހަމަޖެހިފައިވެއެވެ. އަދި ކުރިއަށް އޮތް ފަސް އަހަރު ދުވަހަށް އެކުލަވައިލި ''ސްޓްރެޓެޖިކް ޕްލޭން'' ލޯންޗްކުރުމުގެ އިތުރުން ކަސްޓަމުގެ މުވައްޒަފުންނާއި އާއިލާތަކަށް ހާއްސަކޮށްގެން ''ކަސްޓަމްސް ރަން 2019'' ގެ ނަމުގައި ދުވުމެއް ބޭއްވުމަށް ވަނީ ހަމަޖެހިފައެވެ.
ކަސްޓަމްސްގެ ހިދުމަތް ރާއްޖޭގައި ފެށީ 18 ޖުލައި 1890 ގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
