އިމިގްރޭޝަނުން އަނެއްކާވެސް ވޯކިން އިންޓަވިއުއެއް، 70 ވަޒީފާގެ ފުރުސަތު
ލިޔުންތެރިޔާ
އަހުމަދު ހަމީދު އާދަމް
މޯލްޑިވްސް އިމިގްރޭޝަނަށް ގިނަ އަދަދެއްގެ މުވައްޒިފުން ހޯދަން ވޯކިން އިންޓަވިއުއެއް ކުރިއަށް ގެންދަން ނިންމައިފި އެވެ.
އެ އިދާރާއިން މިއަދު ބުނީ ދެވަނަ ވޯކިން އިންޓަވިއުއެއް ކުރިއަށް ގެންދަން ނިންމާފައިވާ ކަމަށާ މިއީ އެ އިދާރާއަށް އެސިސްޓަންޓް އިމިގްރޭޝަން އޮފިސަރު ހޯދުމަށް ކުރިއަށް ގެންދާ އިންޓަވިއުއެއް ކަމަށެވެ. މި ފަހަރު އެސިސްޓަންޓް އިމިގްރޭޝަން އޮފިސަރުގެ މަގާމަށް 70 މީހަކު ނަގާނެ އެވެ.
ވޯކިން އިންޓަވިއު އޮންނާނީ އަންނަ މަހުގެ ފުރަތަމަ ދުވަހު ސޮލާހުއްދީން ސުކޫލުގަ އެވެ.
މި މަގާމުގެ އަސާސީ މުސާރައިގެ ގޮތުގައި 6500 ރުފިޔާ އަދި ސާވިސް އެލަވަންސްގެ ގޮތުގައި 1500 ރުފިޔާ ލިބޭނެ އެވެ. އަދި ބޭސިކް ޓްރެެއިން ފުރިހަމަ ކުރުމުން ސްޕެޝަލް ސާވިސް އެލަވަންސްގެ ގޮތުގައި މުސާރައިގެ 35 ޕަސެންޓް ލިބޭނެ އެވެ.
މަގާމުގެ މައިގަނޑުގެ މަސްއޫލިއްޔަތަކީ;
* އެއާޕޯޓްގެ ބޯޑާ ކޮންޓްރޯލްގެ މަސައްކަތް ކުރުން
* ޕާސްޕޯޓާއި ޓްރެވަލް ޑޮކިއުމަންޓްރީ ހިދުމަތް ދިނުމުގެ މަސައްކަތް
* ސީޕޯޓް ސެކްޝަންގެ މަސައްކަތް ކުރުން
* ވިޒާ ސެކްޝަންގެ މަސައްކަތްތައް
* އޮފީހަށް ދިމާވާ ހާއްސަ ހާލަތާއި ގުޅިގެން ކުރިއަށް ގެންދާ ހާއްސަ މަސައްކަތްތަކުގައި ބައިވެރިވުން
އިމިގްރޭޝަނުން ބުނި ގޮތުގައި މި ވަޒީފާއަށް ކުރިމަތިލާ މީހަކީ ސާނަވީ ނުވަތަ އެއާ އެއްފެންވަރުގެ އިމްތިހާނަކުން ދެ މާއްދާއިން ދަށްވެގެން ޑީ ގުރޭޑް ލިބިފައިވުމާއެކު ސެކަންޑަރީ ސުކޫލް ނުވަތަ ހަޔާ ސެކަންޑަރީ ސްކޫލް ސެޓިފިކެޓް އިމްތިހާބުގައި ދިވެހި މާއްދާއިން ދަށްވެގެން ސީ ގުރޭޑް ލިބިފައިވާ މީހަކަށް ވާން ޖެހެ އެވެ. ނޫނީ ގައުމީ ސަނަދުތަކުގެ އޮނިގަނޑުގެ ލެވެލް ތިނެއްގެ ސެޓިފެކްޓް ތިނެއް ހާސިލުކޮށްފައިވާ މީހަކަށް ވާން ޖެހެ އެވެ.
މީގެ ކުރީންވެސް އިމިގްރޭޝަނުން ބޭއްވި ވޯކިން އިންޓަވިއުއަށް ބޮޑު ތަރުހީބެއް ލިބުނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
