ސިނާއީ ބޭނުންތަކަށް ހުޅުމާލެ ދެވަނަ ފިޔަވަހިން ބިން ވިއްކަން ހުޅުވާލައިފި

ހުޅުމާލޭގެ ދެވަނަ ފިޔަވަހިން، ސިނާއީ ބޭނުމަށް ބީލަމުގެ އުސޫލުން ބިން ވިއްކަން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުވާލައިފިއެވެ.

އެޗްޑީސީން ކުރި އިއުލާނެއްގައި ބުނީ، ބީލަމުގެ އުސޫލުން ބިން ވިއްކުމަށް ހަމަޖެހިފައިވަނީ ދެވަނަ ފިޔަވަހީގެ "އިންޓަގްރޭޓެޑް ހަބް" ގެ ގޮތުގައި ތަރައްގީ ކުރުމަށް ހަމަޖެހިފައިވާ ސަރަހައްދުން ކަމަށެވެ.

ބީލަން ފެށޭ އަގަކީ އަކަފޫޓަކަށް 7،500 ރުފިޔާ ކަމަށްވާއިރު، މި ބިންތައް ވިއްކުމަށްޓަކައި އެ ކޯޕަރޭޝަނުން އުސޫލުތަކެއް ވަނީ ކަނޑައަޅާފައެވެ. އޭގެ ތެރޭގައި ހިމެނެނީ އުމުރުން 18 އަހަރު ފުރިފައިވާ ދިވެހި ރައްޔިތެއްކަމުގައި ވުން ނުވަތަ ރާއްޖޭގައި ރަޖިސްޓްރީކޮށްފައިވާ، 100 އިންސައްތަ ދިވެހިންގެ ހިއްސާ އޮންނަ ކުންފުންޏެއްކަމުގައިވުން ކަމަށް އެޗްޑީސީން ހާމަކުރެއެވެ.

ބިން ވިއްކުން ދެ މަރުހަލާއަކަށް ބަހާލައިގެން އެޗްޑީސީން ކުރިއަށްގެންދާއިރު، އޭގެ ތެރޭގައި ހިމެނެނީ:

1) މަރުހަލާ 1: ޕޯޓަލް މެދުވެރިކޮށް ޝައުގުވެރިވެލައްވާ ބިމަށް އެކްސްޕްރެޝަން އޮފް އިންޓަރެސްޓް (އީއޯއީ) ހުށަހެޅުން

2) މަރުހަލާ 2: އެއްފަރާތަކަށް ވުރެ ގިނަ ފަރާތްތަކުން އީއޯއީ ހުށަހަޅާފައިވާނަމަ އެބިމަކަށް ބިޑް ކުރުން

އެޗްޑީސީން ބުނީ، މިކަމަށް އެދި ހުށަހެޅުމަށް ހަމަޖެހިފައިވަނީ އޮންލައިން ޕޯޓަލް (https://bids.hdc.mv/) މެދުވެރިކޮށްކަމަށާއި، އިއުލާނާއި އެއްގޮތަށް ބީލަން ހުށަހެޅުމުގެ ފުރުސަތު ހުޅުވާލާފައިވާކަމަށެވެ.