ހުޅުމާލޭ ފްލެޓްތަކުގެ ދެބައިކުޅަ އެއްބައި މީހުން ކުލި ނުދައްކާ: ޒުހައިރު
ލިޔުންތެރިޔާ
އަޙްމަދު އާހިލް ސަޢީދު
ހުޅުމާލެއިން ސޯޝަލް ހައުސިން ސްކީމްގެ ދަށުން ދޫކޮށްފައިވާ 12،000 އަށް ވުރެ ގިނަ ފްލެޓުގެ ތެރެއިން ފްލެޓުތަކުގައި ދިރިއުޅޭ ފަރާތްތަކުގެ ދެބައިކުޅަ އެއްބައި ކުލި ނުދައްކާ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރ އަލީ ޒުހައިރު ވިދާޅުވެއްޖެ އެވެ.
ދިވެހިރާއްޖޭގެ އަޑުގެ "އަހާށޭ ބުނާނަން" ޕްރޮގްރާމުގައި ވާހަކަދައްކަވަމުން ޒުހައިރު ވިދާޅުވީ، އެ ކުންފުނިން ބެލެހެއްޓުމާ ހަވާލުވެފައިވާ ފްލެޓުތަކުގެ ތެރެއިން 50 އިންސައްތަ ފްލެޓުގެ ކުލި ނުލިބޭ ކަމަށެވެ. ކުލި ނުދެއްކެނީ ތަފާތު ސަބަބުތަކާ ހެދި މާލީ ދަތިކަން ދިމާވެގެން ކަމަށް އޭނާ ފާހަގަކުރެއްވި އެވެ.
އަޅުގަނޑުމެންނަކީ 12،000 އަށް ވުރެ ގިނަ ފްލެޓު ބަލަހައްޓަމުންދާ ބައެއް. ކުލި ނުލިބޭ ޕަސެންޓޭޖަށް ބަލާކަމަށްވަންޏާމުން 50 ޕަސެންޓަކީ އެކި ކަހަލަ ކަންތައްތައް ދިމާވެގެން، އެ މީހުންނަށް މާލީ ހާލަތު ދިމާވެގެން ކުލި ނުދައްކާ އުޅޭ 50 ޕަސެންޓް.
ޒުހައިރު ވިދާޅުވިއެވެ.
ކުލި ނުދައްކާ ފަރާތްތަކުގެ ތެރޭގައި ފްލެޓަށް ބަދަލުވީއްސުރެ އެއްވެސް ފައިސާއެއް ނުދައްކާ ފަރާތްތަކާއި، ގަވާއިދުން ކުލި ނުދައްކާ ފަރާތްތައް ހިމެނެއެވެ. މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން މިދިޔަ އަހަރުގެ މެއި މަހު "ސަން" އަށް އެޗްޑީސީން ހިއްސާކުރި ތަފާސް ހިސާބުތައް ދައްކާ ގޮތުން، ކުލީގެ ގޮތުގައި ނުލިބި ހުރި ޖުމުލަ ފައިސާ 700 މިލިއަން ރުފިޔާ އަށް ވުރެ މައްޗަށް އަރައެވެ.
މި މައްސަލައިގައި ފިޔަވަޅެއްގެ ގޮތުން، ކުލި ނުދައްކާ ފަރާތްތަކަށް ކޮންމެ ތިން މަހަކުން "ޕޭމަންޓް އެޑްވައިސް" ނޯޓިސް ފޮނުވުން މިދިޔަ އަހަރު އެޗްޑީސީން ވަނީ ފަށައިފައެވެ. އޭގެ އިތުރުން، ފްލެޓުތައް ކުއްޔަށްދޭތޯ ބެލުމުގެ މަސައްކަތް ވެސް އެ ކުންފުނިން ކުރިއަށް ގެންދާ ކަމަށް ޒުހައިރު ވިދާޅުވިއެވެ.
ހިޔާ ފްލެޓުތަކުގެ ހުރިހާ ޔުނިޓަކަށް ޒިޔާރަތްކޮށް ބެލުމުގެ މަސައްކަތް ނިންމާލާފައިވާ ކަމަށާއި، ފްލެޓުގައި ބިދޭސީން ދިރިއުޅޭ ނަމަ އެ ކަން ހުއްޓައިލުމަށް ވެރިފަރާތަށް ސިޓީ މެދުވެރިކޮށް އަންގަމުންދާ ކަމަށް ވެސް އޭނާ ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
