ކެފޭ ބާބެރާގެ ފުރަތަމަ އައުޓްލެޓް ހުޅުމާލޭގައި ހުޅުވައިފި

އިޓަލީގެ މަޝްހޫރު ކޮފީ ބްރޭންޑެއް ކަމުގައިވާ ކެފޭ ބާބެރާގެ ރާއްޖޭގެ ފުރަތަމަ އައުޓްލެޓް ހުޅުމާލޭގައި ހުންނަ މެންހެޓަން ގްރޭންޑް ހޮޓެލްގައި ސޮފްޓް އޯޕެނިންގެއް ބާއްވައި ހުޅުވައިފިއެވެ.

މިކަމަށްޓަކައި ބޭއްވި ހަފްލާގައި އެ ހޮޓެލްގެ ޑައިރެކްޓާ އޮފް އޮޕަރޭޝަންސް ޕެނެގިއޮޓިސް ކެލެންޒިސް ވަނީ ކެފޭ ބާބެރާ އާއި އެ ތަނުން ލިބެން ހުންނާނެ ޚިދުމަތްތައް ތަޢާރަފްކޮށްދީފައެވެ.

ޝަރަފުވެރި މެހެމާނެއްގެ ގޮތުގައި ރަސްމީކޮށް އައުޓްލެޓް ހުޅުއްވައިދެއްވީ ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑައިރެކްޓަރު ބްރިގޭޑިއާ ޖެނެރަލް (ރިޓަޔާޑް) ޢަލީ ޒުހައިރެވެ. ވޯލްޑް އޮފް ބިޒްނަސް ޕްރައިވެޓް ލިމިޓެޑުގެ މެނޭޖިން ޑައިރެކްޓަރު ނަޢީމް އާއި އެ ކުންފުނީގެ ޑައިރެކްޓަރުން ވެސް މި ހުޅުވުމުގެ ރަސްމިއްޔާތުގައި ބައިވެރިވެފައިވެއެވެ.

މެންހެޓަން ގްރޭންޑް ހޮޓެލްގެ ގްރައުންޑް ފްލޯ ލޮބީގައި ޤާއިމުކޮށްފައިވާ މި ކެފޭއިން ހޫނު އަދި ފިނި ކޮފީގެ ބާވަތްތަކާއި ޕޭސްޓްރީ އާއި ލުއި ކެއުންތައް ލިބެން ހުންނާނޭކަމަށް ކެފޭއިން ބުނެއެވެ.

ހޮޓެލުގެ މެހެމާނުންނާއި ހުޅުމާލޭގެ ރައްޔިތުންނަށާއި ޒިޔާރަތްކުރާ ފަރާތްތަކަށް ވެސް ޚިދުމަތް ލިބޭ ގޮތަށް ފަރުމާކޮށްފައިވާ މި ކެފޭ ވެފައިވަނީ މެންހެޓަން ގްރޭންޑް ހޮޓެލުން ކެއިން ބުއިމަށް ފޯރުކޮށްދޭ ޚިދުމަތްތަކުގެ ތެރެއަށް އިތުރުވި ބައެއް ކަމުގައެވެ.

ސޮފްޓް އޯޕެނިންއާ އެކު ކެފޭ ބާބެރާ ކޮންމެ ދުވަހަކު ހެނދުނު 7:30 އިން ރޭގަނޑު 11:30 އަށް ޚިދުމަތް ދެމުން ގެންދިއުމަށް ވަނީ ނިންމާފައެވެ.