ރިސޯޓް ލީގު 2023: ފަސޭހަކަމާއި އެކު ކުރުނބާ ބަލިކޮށް ޕަޓީނާ ސެމީ ފައިނަލަށް!

ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ނޯތު މާލޭ ޒޯނުގެ ކުއާޓާ ފައިނަލުގެ ތިންވަނަ މެޗުގައި މިއަދުގެ ހަވީރު 4-1 ގެ ނަތީޖާއަކުން ކުރުނބާ ބަލިކޮށް ޕަޓީނާ އިން މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފިއެވެ.

ގުރޫޕް އޭގެ އެއްވަނަ ޓީމުގެ ގޮތުގައި ޕަޓީނާ އިން ކުއާޓާ ފައިނަލުގެ ޖާގައެއް ކަށަވަރުކުރި އިރު ކުރުނބާ އިން ކުއާޓާގެ ފުރުސަތު ހޯދީ ގުރޫޕް ޑީގެ ދެ ވަނަ ޓީމުގެ ގޮތުގައެވެ.

މެޗު ފަށައިގެން ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި މެޗުގައި ފުރަތަަމަ ލަނޑުޖަހައި ކުރިހޯދީ ޕަޓީނާ އިންނެވެ. އެގޮތުން ފުރަތަމަ ހާފުގެ 08 ވަނަ މިނެޓުގައި އެޓީމުން ލަނޑެއް ކާމިޔާބުކޮށް މެޗުގެ ލީޑު ހޯދިއިރު، މިލަނޑު އެޓީމަށް ކާމިޔާބުކޮށްދިނީ އެޓީމުގެ އިބްރާހިމް ވަޖީހު އެވެ.

މިއީ އެޓީމުގޭ ކުޅުންތެރިއަކު ތިރިތިރިން ގޯލު ކުރިމައްޗަށް ހުރަސްކޮށްދިން ބޯޅައެއް ކުރުނބާގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ އެއްފަހަރުން ޖަހައި ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި ފުރަތަަމަ ލަނޑު ޖެހިތާ މިނެޓެއް ވެސް ނުވަނީސް އެޓީމުން ވަނީ އިތުރު ލަނޑެއް ކާމިޔާބުކޮށް ލީޑު ފުޅާކޮށްދީފައެވެ. މިއީ ކުރުނބާގެ ފަހަތުން ހެދުނު ގޯހެއްގެ ފައިދާ ނަގައި ޕަޓީނާގެ ކެޕްޓަން އިބްރާހިމް އަފްލާހް ކާމިޔާބުކުރި ލަނޑެކެވެ.

މި މެޗުގައި ޕަޓީނާ އިން ކާމިޔާބުކުރި ތިންވަނަ ލަނޑު ފުރަތަަމަ ހާފުގެ އެންމެ ފަހު މިނެޓްގައި ކާމިޔާބުކޮށްދިނީ އެޓީމުގެ ހުސެއިން ނިޔާޒު އެވެ. މިއީ އެޓީމުން އުފެއްދި ކައުންޓާ އެޓޭކެއްގައި އެޓީމުގެ ކުޅުންތެރިއަކު ގޯލު ކުރިމައްޗަށް ހުރަސްކޮށްދިން ބޯޅައެއް ގޯލު ކުރިމަތީގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ޕަޓީނާ ކުރީގައި އޮވެގެންނެވެ.

ދެވަނަ ހާފުގައި ކުރުނބާ އިން އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކުރި އެވެ. ނަތީޖާއެއްގެ ގޮތުން ދެވަނަ ހާފު ފެށިގެން ފަސް ވަނަ މިނެޓުގައި އެޓީމުން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ. މި ލަނޑު އެޓީމަށް ކާމިޔާބުކޮށްދިނީ އަލީ ހަމްމާދު އެވެ. ނަމަވެސް އޭގެ ތިން މިނެޓު ފަހުން ޕަޓީނާ އިން އެޓީމުގެ ހަތަރުވަނަ ލަނޑު ކާމިޔާބުކޮށް ސެމީ ފައިނަލުގެ ޖާގައެއް ކަށަވަރުކުރި އެވެ.

މިލަނޑު އެޓީމަށް ކާމިޔާބުކޮށްދިނީ އެޓީމުގެ ކެޕްޓަން އިބްރާހިމް އަފްލާހް އެވެ. މިއީ ދެވަނަ ހާފުގައި ކުރުނބާގެ ކުޅުންތެރިން ކުރި ހަވަނަ ފައުލާ އެކު އެޓީމަށް ލިބުނު ދުރު ޕެނަލްޓީ ތިރިތިރިން ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ ވެސް މި މެޗުގައި މޮޅު ކުޅުމެއް ދެއްކި ޕަޓީނާގެ ކެޕްޓަން އިބްރާހިމް އަފްލާހް އެވެ.