ޕްރިމިއާ ލީގް: ކޭންގެ ދެ ގޯލުން ޓޮޓެންހަމްއިން ނޮޓިންހަމްގެ މައްޗަށް ކުރި ހޯދައިފި

ޕްރިމިއާ ލީގުގައި ހެރީ ކޭންގެ ދެ ގޯލުން ޓޮޓެންހަމް ހޮޓްސްޕާސް އިން ނޮޓިންހަމް ފޮރެސްޓުގެ މައްޗަށް 0-2 ގެ ނަތީޖާއަކުން ކުރި ހޯދައިފިއެވެ.

މި މެޗުގައި ކޭން ޖެހި ދެ ގޯލާއި އެކު އޭނާގެ ކެރިއަރުގައި މިހާތަނަށް ލީގުގައި ޖެހި ގޯލުގެ އަދަދު ވަނީ 200 އަށް އަރާފައެވެ. އެގޮތުން އޭނާ އިނގިރޭސި ޕްރިމިއާ ލީގުގައި ޖެހި 186 ގޯލާއި ދެ ވަނަ ޑިވިޝަން (ޗެމްޕިއަންޝިޕް)ގައި ޖެހި ނުވަ ގޯލާއި ލީގު ވަން (ތިން ވަނަ ޑިވިޝަން)ގައި ޖެހި ފަސް ގޯލު ޖަހާފައިވެއެވެ. ޕްރިމިއާ ލީގުގެ ތާރީހުގައި ކޭން އަށްވުރެ ގިނައިން ގޯލް ޖަހާފައިވަނީ ވޭން ރޫނީ އަދި އެލަން ޝިއަރާއެވެ.

ނޮޓިންހަމްގެ ދަނޑުގައި ކުޅުނު މެޗު ފެށިގެން ފަސް ވަނަ މިނަޓުގައި ކޭން ވަނީ ޓޮޓެންހަމްއަށް ލީޑު ނަގައިދީފައެވެ. މެޗުގެ ފުރަތަމަ ހާފުގައި ޓޮޓެންހަމްއިން އިތުުރު ގޯލެއް ޖެހުމަށް މަސައްކަތް ކުރި ނަމަވެސް އެކަން ވަނީ ކާމިޔާބު ވާގޮތް ނުވެފައެވެ. ދެ ޓީމުގެ ފަރާތުންވެސް އެއްވަރެއްގެ ކުޅުމެއް ފެނިގެންދިޔަ މި ހާފުގެ ކުޅުން ނިމުނީ 0-1 އިން ޓޮޓެންހަމް ކުރީގަ އޮވެގެންނެވެ.

ދެވަނަ ހާފުގައި ޓޮޓެންހަމްއިން ވަނީ ކުޅުން ރަނގަޅު ކޮށްފައެވެ. އެގޮތުން މެޗުގެ 56 ވަނަ މިނަޓުގައި އެ ޓީމަށް ވަނީ ޕެނަލްޓީއެއް ލިބިފައެވެ. ނަމަވެސް ކޭން ފޮނުވާލި ޕެނަލްޓީ ނޮޓިންހަމްގެ ގޯލްކީޕަރު ޑީން ހެންޑަސަން ވަނީ މަތަކޮށްފައެވެ. ޕެނަލްޓީ ހިފެހެއްޓުމަށްފަހު ނޮޓިންހަމްއިން ވަނީ ނަތީޖާ ހަމަހަމަ ކުރުމަށް މަސައްކަތް ކޮށްފައެވެ. ނަމަވެސް ކޭން ވަނީ މެޗުގެ 81 ވަނަ މިނިޓްގައި ޓޮޓެންހަމަށް ދެ ވަނަ ގޯލެއް ޖަހައިދީ ޓޮޓެންހަމްއަށް ތިން ޕޮއިންޓު ކަށަވަރުކޮށްދީފައެވެ.

މިއާއިއެކު ޓޮޓެންހަމް އޮތީ ލީގު ތާވަލުގެ ތިން ވަނައިގަ އެވެ. އެއް ވަނައިގައި އޮތް އާސެނަލަށް ހަތަރު މެޗުން 12 ޕޮއިންޓް ލިބިފައިވާއިރު، ދެ ވަނައިގައި އޮތް މެންޗެސްޓާ ސިޓީ، ތިން ވަނައިގައި އޮތް ޓޮޓެންހަމް އަދި ހަތަރެއްގައި އޮތް ބްރައިޓަން އަށް ވަނީ ހަތަރު މެޗުން 10 ޕޮއިންޓް ލިބިފަ އެވެ.

ދެން ޓޮޓެންހަމްއިން ލީގުގައި ބުދަ ދުވަހުގެ ރޭ ނިކުންނާނީ ވެސްޓް ހަމްއާއި ދެކޮޅަށެވެ.