ޑީއެންއާރު ބޭނުންކޮށްގެން 18 އަހަރު ފުރޭ ކޮންމެ މީހަކު ޕީއެންސީއަށް ވައްދަން އުޅޭ ވާހަކަ ދޮގުކޮށްފި
ލިޔުންތެރިޔާ
ޚަދީޖާ އަރުފާ
ޑީއެންއާރު ބޭނުންކޮށްގެން 18 އަހަރު ފުރޭ ކޮންމެ މީހަކު ޕީއެންސީއަށް ވައްދަން އުޅޭ ވާހަކަ, ހޯމް މިނިސްޓަރ އަލީ އިހްސާން ދޮގުކުރައްވައިފިއެވެ.
އެމްޑީޕީގެ ޑެިޕިޔުޓީ ޗެއަރ ޕާސަން އިބްރާޙީމް ވަހީދު އެކްސްގައި ކުރި ޕޯސްޓެއްގައި، އޭނާ ވަނީ، މިއަހަރު 18 އަހަރުފުރޭ ކުދިންގެ މައުލޫމާތު ޑީއެންއާރު އިން ހޯދައިގެން، ހޯމް މިނިސްޓަރ އިހުސާނުގެ ބެއްލެވުމުގެ ދަށުން އެކުދިންގެ ނަމުގައި ފޯމްތައް ފުރައި، 18 އަހަރު ވުމުން އިލެކްޝަންސް ކޮމިޝަނަށް ހުށައަޅަން ތައްޔާރުކޮށް ޕީއެންސީ އޮފީހުގައި ހުރިކަމަށް ތުހުމަތުކޮށްފައެވެ.
އެއަށް ރައްދު ދެއްވައި އިހްސާން އެކްސްގައި ކުރެއްވި ޕޯސްޓެއްގައި ވިދާޅުވީ، އެކަމަކީ ޚިޔާލަށްވެސް ނުގެންނަވާ ކަމެއް ކަމަށެވެ.
އަދި މީހުންގެ ބޮލުގަ މިފަދަ ބޮޑެތި ދޮގު ހަދައިގެން ކަންކަން އެޅުވުމަށްވުރެ، އެމްޑީޕީ ސިޔާސަތުތަކުގެ ރަނގަޅުވާހަކަ ދެއްކެވުމަށް ވަގުތު ހޭދަކުރުން މާ ރަނގަޅުވާނެ ކަމަށް ވެސް ވަޒީރު ވިދާޅުވިއެވެ.
މަނިކުފާނުގެ ސަރުކާރުގަ މިކަން ކުރައްވަން މަނިކުފާނު ވިސްނެވީތޯ؟ ހަމަޔަގީނުންވެސް އަޅުގަނޑު މިހާތަނަށް ޚިޔާލަށްވެސް ނުގެންނަކަމެއްގެ ވާހަކަ ތިޔަ ވިދާޅުވީ. ތިބޭފުޅުން ތި ދައްކަވާ ކޮންމެ ދޮގުވާހަކައަކަށް ޖަވާބުދޭނެ ވަގުތު ނުވަތަ ފުރުސަތު އެމީހަކަށް ނުލިބިވެސްދާނެ. މީހުންގެ ބޮލުގަ މިފަދަ ބޮޑެތި ދޮގު ހަދައިގެން ކަންކަން އެޅުވުމަށްވުރެ ތިބޭފުޅުންގެ ސިޔާސަތުތަކުގެ ރަނގަޅުވާހަކަ ދެއްކެވުމަށް ވަގުތު ހޭދަކުރުން ރަނގަޅުވާނެ.
ވަޒީރު އިހްސާން
ޕީއެންސީއަށް މެމްބަރުން އިތުރު ކުރުމަށް މުޅި ރާއްޖެއަށް ހުޅުވާލައިގެން، ޕާޓީގެ އެކްޓިވިސްޓުންނާއި ހެޔޮއެދޭ ފަރާތްތަކުގެ ބައިވެރިވުމާއިއެކު ހިންގި "މެމްބަރޝިޕް ޑްރައިވް" ގައި ޕާޓީއަށް ހުށަހެޅި ގިނަ ފޯމުތަކެއް ޕާޓީގެ ފަރާތުން އިލެކްޝަންސް ކޮމިޝަނަށް ހުށަހަޅާފައިވާއިރު އޭގައި ސައްހަ ނޫން ފޯމުތަކެއް ހުރިކަން ފާހަގަވެފައިވާ ކަމަށް ޕީއެންސީން އިއްޔެ ވަނީ ބުނެފައެވެ.
އަދި ސައްހަ ނޫން ފޯމެއް މެދުވެރިކޮށް ޕާޓީއަށް ވެއްދުމުގެ އެއްވެސް މައްސަލައެއް ކުރިމަތިވެފައިވާނަމަ ޕާޓީގެ ރަސްމީ މެއިލްކަމަށްވާ [email protected] އަށް އީމެއިލް ކުރުމަށް އެ ޕާޓީން ވަނީ އެދިފައެވެ
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
