ޓީއެމްއޭ ޕައިލެޓުން މަސައްކަތް ހުއްޓާލައިފިނަމަ އެއީ ވަރަށް ސީރިއަސް މައްސަލައެއް: މަޓާޓޯ
ޓްރާންސް މޯލްޑިވްސް އެއަރވޭސްގެ މުވައްޒަފުން އިހުތިޖާޖަށް ނުކުތުމަކީ ރާއްޖޭގެ ފަތުރުވެރިކަމުގެ ސިނާއަތަށް އަގު ނުކުރެވޭ ވަރުގެ ގެއްލުމެއް ލިބިދާނެ ކަމެއްކަމަށް ބުނެ މޯލްޑިވްސް އެސޯސިއޭޝަން އޮފް ޓްރެވަލް އެޖެންޓް އެންޓް ޓުއަރ އޮޕަރޭޓާސް (މަޓާޓޯ) އިން ކަންބޮޑުވުން ފާޅުކޮށްފި އެވެ.
ޓީއެމްއޭ މުއައްޒަފުންގެ މުސާރައިގެ އެއްބައި ރުފިޔާއިން ދޭން ނިންމުމާ ގުޅިގެން ޓީއެމްއޭގައި މަސައްކަތްކުރާ ޕައިލެޓުން ވަނީ އިހުތިޖާޖަށް ނިކުތުމަށް ނިންމާފައެވެ. އެގޮތުން ޕައިލެޓުން ވަނީ މަސައްކަތަށް ނުނިކުންނާނޭކަމުގެ އިންޒާރުދީ މެނޭޖްމަންޓުގެ ސަމާލުކަމަށް އެކަން ގެނެސްފައެވެ.
ޓީއެމްއޭގެ ޕައިލެޓުންގެ އެ ނިންމުމާ ގުޅިގެން ދިވެހި ތްރެވަލް އޭޖެންޓުންގެ ޖަމިއްޔާ މަޓާޓޯއިން ނެރުނު ބަޔާނެއްގައި ބުނެފައިވަނީ، އިހުތިޖާޖަށް ނުކުތުމުގެ ސަބަބުން ރާއްޖެއަށް ޒިޔާރަތްކުރާ ފަތުރުވެރިންގެ ދަތުރުތަކަށް ބުރޫ އަރާފާނެކަމުގެ ބިރު އެބަ އޮތްކަމަށެވެ.
މަޓާޓޯއިން ބުނެފައިވަނީ ރާއްޖެ އަށް ޒިޔާރަތްކުރާ ފަތުރުވެރިންގެ ބޮޑު އިންސައްތައެއް އުފުލަމުން ދަނީ ޓީއެމްއޭގެ ސީޕްލޭންތަކުގައި ކަމަށާއި، ޕައިލެޓުން ދަތުރުކުރުން ހުއްޓާލާ އިހުތިޖާޖަށް ނިކުމެއްޖެ ނަމަ އެކަމުގެ ނޭދެވޭ އަސަރު ފަތުރުވެރިކަމުގެ ދާއިރާއަށް ކުރާނެ ކަމަށް އެ ޖަމުއިއްޔާއިން ވަނީ ބުނެފަ އެވެ.
މަޓާޓޯ އިން ވަނީ ކަމާ ގުޅުންހުރި އިދާރާތަކުން މަޝްވަރާކޮށްގެން މިކަމަށް އަވަސް ހައްލެއް ހޯދާދިނުމަށް ގޮވާލާފައެވެ.
މި މައްސަލައަކީ ހަމައެކަނި ޓީއެމްއޭގެ މައްސަލައެއް ނޫންކަމަށާއި މިކަމުގެ ސަބަބުން ރާއްޖޭގެ މުޅި ފަތުރުވެރިކަމުގެ ސިނާއަތުގެ އަގު ވެއްޓި ރާއްޖޭގެ ނަން ކިލަނބުވުމުގެ ފުރުސަތު ބޮޑުވެގެން ދާނެ ކަމެއްކަމަށް މަޓާޓޯ އިން ވަނީ ބުނެފަ އެވެ. މިކަމުގެ ސަބަބުން ރިސޯޓުތަކަށާއި އެއަރލައިންތަކަށް އޭގެ ނޭދެވޭ އަސަރު ކުރާނެކަމަށް ބެލެވޭ ކަމަށް މަޓާޓޯ އިން ވަނި ބުނެފަ އެވެ.
ޓީއެމްއޭއަކީ ރާއްޖޭގެ އިތުރުން މުޅި ދުނިޔޭގައިވެސް އޮތް އެންމެބޮޑު ސީޕްލޭން އޮޕަރެޓްކުރާ ކުންފުންޏެވެ. ޓީއެމްއޭއިން މުއައްޒަފުންގެ މުސާރައިގެ އެއްބައި ރުފިޔާއިން ދޭގޮތަށް ނިންމީ ބޭރުފައިސާ ގަނެވިއްކުމުގެ ގަވާއިދަށް ގެނައި އައު އުސޫލާއެކު ބޭންކްތަކަށް ޑޮލަރު މާރުކުރަން ލާޒިމްކުރުމާ ގުޅިގެންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
