އެންމެ ފަހުގެ ޗެންޕިއަން ސިނާ ބަލިކޮށް އަލްކަރާޒް ޔޫއެސް އޯޕަން ކާމިޔާބުކޮށްފި

ޔޫއެސް އޯޕަން ޓެނިސް މުބާރާތުގެ ފައިނަލުގައި އެންމެ ފަހުގެ ޗެންޕިއަން އިޓަލީގެ ޔަނިކް ސިނާ ބަލިކޮށް ސްޕެއިންގެ ކާލޯސް އަލްކަރާޒް ޗެންޕިއަންކަން ހޯދައިފިއެވެ.

މުބާރާތުގެ ފައިނަލުން ސިނާ ޖާގަހޯދީ ސެމީފައިނަލުގެ ފުރަތަމަ މެޗުގައި ކެނެޑާގެ ފިލިކްސް އޮގަރ-އަލިއަސިލައިމް 3-1 ގެ ނަތީޖާއަކުން ބަލިކުރުމަށްފަހު އެވެ. އަދި އަލްކަރާޒް ފައިނަލުން ޖާގަހޯދީ ސެމީފައިނަލްގެ ދެވަނަ މެޗުގައި ސާބިއާގެ ޖޮކޮވިޗް ސީދާ ތިން ސެޓުން ބަލިކުރުމަށްފަހު އެވެ.

ދެކުޅުންތެރިންގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ސެޓް 2-6 ގެ ނަތީޖާއަކުން ކާމިޔާބުކުރީ ދުނިޔޭގެ ދެވަނައިގައި ރޭންކްކޮށްފައިވާ އަލްކަރާޒް އެވެ. ނަމަވެސް ޖެހިގެންއައި ސެޓް ވާދަވެރި ކުޅުމަކަށްފަހު 6-3 ގެ ނަތީޖާއަކުން ކާމިޔާބުކުރީ ދުނިޔޭގެ އެއްވަނަ ކުޅުންތެރިއާގެ ގޮތުގައި ރޭންކްކުރެވިފައިވާ ސިނާ އެވެ.

މިއާއެކު މެޗުގެ ފޯރި އިތުރަށް ގަދަވި ނަމަވެސް ޖެހިގެންއައި ދެ ސެޓް 1-6 އަދި 4-6 ގެ ނަތީޖާއަކުން ކާމިޔާބުކޮށް އުމުރުން 22 އަހަރުގެ އަލްކަރާޒް ވަނީ މިމުބާރާތުގެ ތަށި ދެވަނަ ފަހަރަށް ކާމިޔާބުކޮށްފައެވެ. އަދި މިއާއެކު އެނާ ކާމިޔާބުކުރި ގްރޭންޑް ސްލޭމްގެ ޖުމްލަ ވަނީ ހަޔަކަށް އަރައިފަ އެވެ.

އެގޮތުން އަލްކަރާޒް ވަނީ ވިމްބަލްޑަން އާއި ފްރެންްޗް އޯޕަން ވެސް، ކޮންމެ މުބާރާތެއް ދެ ފަހަރު ކާމިޔާބުކޮށްފަ އެވެ. އަދި މިހާތަނަށް އެނާއަށް ކާމިޔާބުނުކުރެވި އޮތީ އޮސްޓްރޭލިއަން އޯޕަން އެވެ.

"ވަރަށް އުފާވެރި އިހުސާސެއް ކުރެވެނީ،" އަލްކަރާޒް ބުންޏެވެ. "މި ތަށި އުފުލާލަން ވަރަށް ބުރަކޮށް މަސައްކަތްކުރަމުން މި އައީ. މިއީ އަހަރެންގެ ދެ ވަަނަ ޔޫއެސް އޯޕަން. އެކަމަކު މިއީ ހުވަފެނެއް ހަގީގަތަކަށްވުން."

ހާޑް ކޯޓް ގްރޭންޑް ސްލޭމުގައި ސިނާގެ މޮޅުވުމުގެ ސިލްސިލާ 27 މެޗަށް ފަހު ނިމުމަކަށް ގެނައުމުގެ އިތުރުން، އަލްކަރާޒަށް ދެން އޮތް އުފަލަކީ އަނެއްކާ ވެސް ދުނިޔޭގެ ރޭންކިންގެ އެއްވަނަ އަށް އެރުމެވެ.

"އެއީ އަހަރެންގެ ފުރަތަމަ ޓާގެޓަކީ ވެސް. އަލުން ދުނިޔޭގެ އެއްވަނަ ހޯދުން،" ޖޫން މަހު ފްރެންޗް އޯޕަން ފައިނަލުން ވެސް ސިނާގެ މައްޗަށް ކުރި ހޯދި އަލްކަރޭޒް ބުންޏެވެ.

މެޗަށްފަހު ސިނާ ބުނީ އޭނާގެ އެންމެ މޮޅު ކުޅުން ދެއްކި ކަމަށާއި، ނަމަވެސް އަލްކަރޭޒް އެއަށް ވުރެ މޮޅަށް ކުޅުމުން ތަށި ހައްގުވީ ކަމަށެވެ.

ނިއު ޔޯކުގައި އޮތް ފައިނަލް މެޗު ބައްލަވާލެއްވުމަށް އެމެރިކާގެ ރައީސް ޑޮނާލްޑް ޓްރަމްޕް ވަޑައިގެންނެވި އެވެ. އެމަނިކުފާނު ފަހަކަށް އައިސް ވަރަށް ގިނަ ކުޅިވަރު އިވެންޓްތަކުގައި ބައިވެރިވެވަޑައިގަންނަވަ އެވެ. އެގޮތުން ފެބްރުއަރީ މަހު އޮތް އެންއެފްއެލް ސުޕަ ބޯލް މެޗާއި، ޖުލައި މަހު އޮތް ފީފާ ކްލަބް ވޯލްޑް ކަޕް ފައިނަލް މެޗު ބައްލަވާލެއްވުމަށް ސްޓޭޑިއަމަށް ވަޑައިގަތެވެ.