އަށް މަހުން މަސައްކަތް ނިންމާ ޝެއިޚް ފަރީދުގެ ހަނދާނުގައި ބަންގްލަދޭޝްގައި ބިނާކުރި މިސްކިތް ހުޅުވައިފި

ދިވެހިރާއްޖޭގެ އިސްލާމީ ދަޢުވަތުގައި އިސްދައުރެއް އަދާކުރެއްވި ޝެއިޚް އިބްރާހީމް ފަރީދު އަޙުމަދުގެ ހަނދާނުގައި ބަންގްލަދޭޝް ގައި ބިނާ ކުރި މިސްކިތުގެ މަސައްކަތް ނިންމާ މިއަދު ހުޅުވައިފި އެވެ.

ޝެއިޚް ފަރީދު އަވަހާރަވީ މިދިޔަ އަހަރުގެ މެއި ނުވަވަނަ ދުވަހު މެލޭޝިޔާއަށް ވަޑައިގެންނެވިތާ މާ ގިނައިރެއް ނުވެ އެއާޕޯޓްގައި ހުންނަވަނިކޮށް ކުއްލި ގޮތަކަށެވެ. ޝެއިހްގެ ކުއްލި ވުމާއެކު ޝެއިޚްގެ ހަނދާނުގައި ބަންގްލަދޭޝް ގައި މިސްކިތެއް ބިނާކުރުމުގެ މަސައްކަތް އާއިލާއާ ޝެއިހް ހިންގެވި ޚިދުމަތް ޖަމިއްޔާއިން ފެށި އެވެ.

މިސްކިތަށް ބޭނުންވާ ފައިސާ ހޯދުމުގެ މަސައްކަތް ފެށީ ޖޫން 11 ވަނަ ދުވަހު އެވެ. އެ މަސައްކަތް ފެށިތާ މަދު ގަޑިއިރުތަކެއްގެ ތެރޭގައި މިސްކިތް ބިނާކުރުމަށް ބޭނުންވާ ހަތް ލައްކަ ރުފިޔާ ލިބުނެވެ.

އަދި އެއާއެކު މިސްކިތް ބިނާކުރުމުގެ މަަސައްކަތް ފެށި އެވެ. އަދި އަށެއްކަ މަސް ދުވަސްތެރޭ މިސްކިތް އެއްކޮށް ނިންމި އެވެ.

މިއަދު ވަނީ މިސްކިތް ރަސްމީކޮށް ހުޅުވާފަ އެވެ. ހިދުމަތް ޖަމިއްޔާއިން ކުރީން ބުނީ މިއީ 455 މީހުންގެ ޖާގައިގެ މިސްކިތެއް ކަމަށެވެ.

އެ ޖަމިއްޔާއިން މިހާރު ގެންދަނީ ހުޅުމާލޭ ތިންވަނަ ފިޔަވަހީގައި ވެސް ބޮޑު މިސްކިތެއް ބިނާކުރަން ފަންޑު އެއްކުރަމުންނެވެ. ޝެއިޚް ފަރީދަކީ ރާއްޖޭގައި ދީނީ ހޭލުންތެރިކަން އިތުރުކުރުމަށް އެންމެ ބުރަކޮށް މަސައްކަތް ކުރެއްވި އިލްމުވެރީންގެ ތެރޭގައި ވަރަށް ފާހަގަ ކޮށްލެވޭ ބޭފުޅެކެވެ.