ކޯރާޑިން ހަމަލާ ދިން މައްސަލަ: 2 މީހުން ވެސް ޝަރީއަތް ނިމެންދެން ބަންދުކޮށްފި
ލިޔުންތެރިޔާ
ޚަދީޖާ އަރުފާ
ހުޅުމާލޭ ބޯގަންވިލާ މަގު، ރެހެންދި ޓަރފް ދަނޑު ހުޅަނގު ފަޅީގައި މަޑުކޮށްގެން ހުރި މީހަކަށް ސައިކަލެއްގައި އައި ދެމީހަކު މިދިޔަ ހޮނިހިރު ދުވަހުގެ ރޭ ކޯރާޑިއަކުން ދިން ހަމަލާއާ ގުޅިގެން ބަންދު ކުރި ދެ މީހުން ވެސް ތަހުގީގު ނިންމައި ޝަރީއަތުގެ މަރުހަލާ ނިމެންދެން ބަންދުކުރަން ކޯޓުން މިއަދު އަމުރުކޮށްފި އެވެ.
މި މާރާމާރީ ހިންގި ކަމަށް ތުހުމަތުކުރެވޭ ދެ މީހުން ހައްޔަރު ކުރީ ފިލައިގެން ހައިވޭއިން މާލެއަށް ދަނިކޮށެވެ.
އެގޮތުން މި މައްސަލައާ ގުޅިގެން ހައްޔަރުކުރެވުނު ފަރާތްތަކަކީ ހީނާމާގެ / ގދ. ފިޔޯރީ، ރުސްތުމް އިބްރާހިމް (25 އަހަރު) އަދި ބ. ގޮއިދޫ، ފިނިފެންމާގޭ ސައިފުالله ފައިޞަލް (19 އަހަރު) އެވެ.
އޭގެ ތެރެއިން ސައިފުالله ތަހުގީގު ނިމެންދެން އަދި ޝަރީއަތުން ގޮތެއް ނިމެންދެން ބަންދުކުރުމަށް މިދިޔަ ހޯމަ ދުވަހު އަމުރުކުރި ނަމަވެސް، އޭރު ރުސްތުމް ބަންދުކުރަން ކޯޓުން އަމުރުކުރީ ތިން ދުވަހަށެވެ.
ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ ރުސްތުމް ވެސް ތަހުގީގު ނިމެންދެން އަދި ޝަރީއަތުން ގޮތެއް ނިމެންދެން ބަންދުކުރުމަށް ކްރިމިނަލް ކޯޓުން މިއަދު އަމުރުކޮށްފައިވާ ކަމަށެެވެ.
ފުލުހުން މައުލޫމާތު ދެއްވާގޮތުގައި، މި ދެ މީހުން ހައްޔަރުކުރެވުނު ސަރަހައްދުން މާރާމާރީ ހިންގަން ބޭނުން ކުރިކަމަށް ތުހުމަތުކުރެވޭ ހަތިޔާރު ފެނިފައިވެއެވެ. އަދި ވަޅިއެއްވެސް ވަނީ ފެނިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
