ކަސްޓަމަށް ލިބެންޖެހި ނުލިބިވާ ފައިސާ: ލިސްޓްގެ އެންމެކުރީގައި ސަލްޓަންސް
ލިޔުންތެރިޔާ
އަބްދުﷲ ހުސައިން
މޯލްޑިވްސް ކަސްޓަމްސްއަށް ފައިސާ ދައްކަންޖެހި މިހާތަނަށް އެ ފައިސާ ނުދައްކައި ދިގުލައިގެންދިޔަ ފަރާތްތަކުގެ ލިސްޓް އާއްމުކޮށްފިއެވެ.
ކަސްޓަމްސްއިން އާއްމުކުރި މި ލިސްޓްގައި އެތައް އަހަރެންވަންދެން އެ އިދާރާއަށް ފައިސާ ދައްކަންޖެހި ނުދައްކާ ފަރާތްތައް ހިމެނެއެވެ. މި ލިސްޓަށް ބަލާއިރު އެންމެ ކުރީގައި އޮތީ، މިފަދަ މައްސަލަ ތަކުގައި މަޝްހޫރު ކުންފުންޏެއްކަމަށްވާ ސަލްޓަންސް އޮފް ދަ ސީސްއެވެ. އެކުންފުނިން ކަސްޓަމްސްއަށް 110 މިލިއަނަށްވުރެ ގިނަ ރުފިޔާ ދައްކަންޖެހެއެވެެ. އޭގެ ތެރޭގައި އިމްޕޯޓް ޑިއުޓީ އާއި ކަސްޓަމްސްގެ ގަވާއިދުތަކަށް އިހުމާލުވުމުން ދައްކަންޖެހޭ ފައިސާ ހިމެނެއެވެ.
ސަލްޓަންސްގެ މި 110 މިލިއަން ރުފިޔާއަކީ އެކުންފުނިން އޮޅުވާލައިގެން ދެ ލޯންޗެއް އެތެރެކުރުމުން އިމްޕޯޓް ޑިއުޓީ އާއި ޖޫރިމަނާގެ ގޮތުގައި ދައުލަތައް ދައްކަންޖެހުނު ފައިސާއެވެ. މި މައްސަލަ 2020 ވަނަ އަހަރު ސްޕްރީމް ކޯޓުން ބެލުމަށްފަހު އެ ކޯޓުން ވަނީ އެއީ ސަލްޓަންސް ކުންފުނިން ދައްކަންޖެހޭ ފައިސާއެއްކަމަށް ހުކުމްކޮށްފައެވެ. އެ ލޯންޗުތައް އެކުންފުނިން ގެނެސްފައިވަނީ 2007 އަދި 2008 ވަނަ އަހަރުގެ ތެރޭގައިކަން ކޯޓުގެ ގަޒިއްޔާތަކުން އެނގެއެވެ.
ސަލްޓަންސްގެ އިތުރުން ދެން އެންމެ ގިނައިން ކަސްޓަމަށް ފައިސާ ދައްކަންޖެހެނީ ވޭޕް އެތެރެކުރުމުގެ މައްސަލާގައި ޖޫރިމަނާކުރި މާފިނިވާގޭ އަޝްރަފް ރަޝީދެވެ. އޭނާ ދައްކަންޖެހޭ އަދަދަކީ 72.2 މިލިއަން ރުފިޔާއެވެ.
ކަސްޓަމްސްގެ މި ލިސްޓްގައި 600 އަށްވުރެ ގިނަ މީހުން ހިމެނޭއިރު، މީގެ ތެރޭގައި ގިނައީ އިމްޕޯޓް ޑިއުޓީ ނުދައްކާ މީހުންގެ އިތުރުން ދުންފަތާއި ވޭޕްގެ އުފެއްދުންތައް އެތެރެކުރުމުން ކޮށްފައިވާ ޖޫރިމަނާ ދައްކަންޖެހޭ މީހުންނެވެ. މީގެ ތެރޭގައި މަޝްހޫރު ވިޔަފާރިވެރިންގެ އާއިލާއަށް ނިސްބަތްވާ ފަރާތްތަކާއި ރާއްޖެއިން ބޭރުގެ މީހުން ހިމެނެއެވެ.
ކަސްޓަމްސްއިން އެކުލަވާލި އުސޫލުގެ ދަށުން ކޮންމެ ދެމަހަކުން އެއްފަހަރު އެ އޮތޯރިޓީއަށް ފައިސާ ނުދައްކާ މީހުންގެ ލިސްޓް އާއްމުކުރުމަށް ވަނީ ހަމަޖެހިފައެވެ.
ކަސްޓަމަށް ފައިސާ ނުދައްކައިގެން އާއްމުކުރި ލިސްޓް:
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
