އެއާޕޯޓުތަކުގެ ސެކިއުރިޓީވެސް ވަރުގަދަކޮށްފި
އެއާޕޯޓްތަކުގެ ސެކިއުރިޓީ ވެސް އިތުރަށް މަތިކުރެވިފައި ކަމަށް އެމްއެންޑީއެފުން ބުނެފިއެވެ.
ގައުމީ ދިފާޢީ ބާރުގެ މީޑިއާ އޮފިޝަލް މޭޖަރ އިބްރާހީމް އާޒިމު މިރޭ ވިދާޅުވީ، ސިފައިންގެ އެލާޓް ލެވަލް މިހާރު ވަނީ އާދައިގެ ލެވަލް އަށްވުރެ "އެއްލެވަލް" މަތިކުރެވިފައި ކަމަށެވެ.
މިއީ ކަނޑަ އެޅިގެން ވަކި ނުރައްކަލެއް އޮވެގެން އެޅި ފިޔަވަޅެއްނޫން ކަމަށާ އެލާޓް ސްޓޭޓަސް މަތިކުރީ ދުރާލާ ރައްކާތެރި ފިޔަވަޅުތައް އިތުރުކުރުމަށް އާޒިމް ވިދާޅުވިއެވެ.
"އެލާޓް ސްޓޭޓަސް މަތިކުރީ ދުރާލާ ރައްކާތެރި ފިޔަވަޅުތައް އިތުރުކުރުމަށް. އަދި އެއާޕޯޓްތަކުގެ ސެކުރިޓީ ވެސް ވަނީ އިތުރަށް މަތިކުރެވިފައި. ސިފައިންގެ އާންމު ހާލަތުން އެހެންހާލަތަކަށް ބަދަލުކުރުމަށް "އެލާޓް" ސްޓޭޓަސް މަތިކުރުމަށް ވަކި ދަރަޖަތަކެއް އަމަލުކުރުމަށް އޮވޭ." އާޒިމް ވިދާޅުވިއެވެ.
ރާއްޖޭގެ އެކި ސަރަހައްދު ތަކުގައި ސިފައިން ހަތިޔާރާއިއެކު ހަރަކާތްތެރިވާ އޮޕަރޭޝަނެއް ފެށީ މިރޭ 7:00 ގައެވެ.
އެމްއެންޑީއެފް އިން ބުނީ މިރޭ ހަތެއް ޖަހާއިރުން ފެށިގެން ރާއްޖޭގެ ގައުމީ ދިފާއީ ބާރުގެ އެލާޓް ސްޓޭޓަސް މައްޗަށް ޖައްސައި "ޔެލޯ2" އަށް ބަދަލު ކުރެވޭނެ ކަމަށެވެ. އެމްއެންޑީއެފްގެ ސްޓޭޓަސް "ޔެލޯ2" އަށް ޖައްސާނީ ގައުމުގެ ސުލްހަ މަސަލަސްކަމާއި އަމަންއަމާން ކަމަށް ބުރޫއަ އަރާ ފަދަ ކަމަކާ ކުރިމަތިވާނެ ކަމަށް ބެލެވުން، ނުވަތަ އެފަދަ މައުލޫމާތެއް ލިބުމުންނެވެ.
އެމްއެންޑީއެފްގެ އެލާޓް މައްޗަށް ޖައްސައި ހިންގާ އެފަދަ އޮޕަރޭޝަންތަކަކީ ގައުމުގެ މަސްލަހަތާއި ރައްޔިތުންގެ ސަލާމަތާއި ރައްކާތެރިކަން ދެމެހެއްޓުމަށްޓަކައި ކުރެވޭ ކަމަށް ވާތީވެ ރައްޔިތުންގެ ފުރިހަމަ އެއްބާރުލުން ލިބޭނެ ކަމަށް ޔަގީން ކުރާ ކަމަށް ވެސް އެމްއެންޑީއެފުން ބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
