އޭޝިއަން ކަޕް: ފުރަތަަމަ މެޗުގައި ލެބަނަން އަތުން ޗެންޕިއަން ގަތަރަށް ފަސޭހަ މޮޅެއް

ކުލަގަދަ ރަސްމިއްޔާތަކާއެކު އޭޝިއަން ކަޕް ފުޓްބޯޅަ މުބާރާތް ހުކުރުދުވަހުގެ ރޭ ގަތަރުގައި ފެށިއިރު، މުބާރަތުގެ ފުރަތަަމަ މެޗުގައި ވާދަކުރީ ގުރޫޕް އޭގެ ލެބަނަން އާއި މުބާރާތް ބާއްވާ ގައުމު ގަތަރެވެ. މި މެޗު ފަސޭހަކަމާއި އެކު 3-0 ގެ ނަތީޖާއަކުން ކާމިޔާބުކޮށް އެންމެ ފަހުގެ ޗެމްޕިއަން ގަތަރުން ވަނީ މުބާރާތުގެ ފެށުން ރަނގަޅުކޮށްފައެވެ.

2022 ވަނަ އަހަރު ގަތަރުގައި ބޭއްވުނު ފީފާ ވޯލްޑް ކަޕް ފުޓްބޯޅަ މުބާރާތުގެ ފައިނަލް ކުޅުނު ލުސައިލް ސްޓޭޑިއަމްގައި 82,490 ސަޕޯޓަރުންގެ ކުރިމަތީގައި ކުޅެވުނު މިމެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މެޗުގެ 7 ވަނަ މިނެޓުގައި ގަތަރުގެ އަޒްމޮން ލަނޑެއް ކާމިޔާބު ކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

ގަތަރުން މެޗުގެ ލީޑު ހޯދީ ފުރަތަމަ ހާފުގެ 45 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ ފޯވާޑް އަކްރަމް އަފީފް އެވެ. މިއީ އެޓީމުގެ ފޯވާޑް އަލްމޮއެޒް އަލީ ތަނަވަސްކޮށްދިން ފުރުސަތެއްގައި ލުބުނާނުގެ ޕެނަލްޓީ އޭރިއާ މެދެންހާ ހިސާބުހުރެ ތިރިތިރިން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ގަތަރު ކުރީގައި އޮވެގެންނެވެ.

މެޗުގެ ދެވަަނަ ހާފުގައި ގަތަރުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގައި އެޓީމުން ވަނީ އިތުރު ދެ ލަނޑު ކާމިޔާބުކޮށްފައެވެ. އެގޮތުން އެޓީމުގެ ދެވަނަ ލަނޑު ދެވަނަ ހާފުގެ 56 ވަނަ މިނެޓުގައި ކާމިޔާބުކޮށްދިނީ ފޯވާޑް އަލްމޮއެޒް އަލީ އެވެ.

މިއީ އެޓީމުގެ މިޑްފިލްޑަރު މުހައްމަދު ވާދު ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އެޓީމުގެ ތިންވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ފުރަތަަމަ ލަނޑު ވެސް ކާމިޔާބުކޮށްދިން އަކްރަމް އަފީފް އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 3-0 ގެ ނަތީޖާއަކުން ގަތަރު ކުރީގައި އޮވެގެންނެވެ.

މިރޭގެ މެޗުން ލިބުނު ތިން ޕޮއިންޓާއެކު ގުރޫޕް އޭގެ އެއްވަނައިގައި މިވަގުތު އޮތީ ގަތަރެވެ. މިގުރޫޕްގައި ގަތަރާއި ލުބުނާންގެ އިތުރުން ދެން ހިމެނެނީ ޗައިނާ އަދި ތަޖިކިސްތާން އެވެ.