ގޮތްކުޑަ އަމަލެއް: ފްލެޓްގެ ބެލްކަންޏަށް ނިކުމެ ކުނިކޮތަޅު އެ ވައްޓާލީ ބޮލަށް
ލިޔުންތެރިޔާ
އަހުމަދު ހަމީދު އާދަމް
ދިވެހީންނަކީ ރަނގަޅު، ހެޔޮ ސިފަތައް ގިނަ ބައެކެވެ. މީހުންގެ މައްޗަށް އޯގާތެރިކަން ބޮޑު ބައެކެވެ. އަނިޔާވެރިކަމާ، ގެއްލުން ދިނުމާއި ދެކޮޅު ބައެކެވެ.
ނަމަވެސް ދިވެހި މި މުޖްތަމައުން މި ސިފަތަކާ އިދިކީލަ ކަންކަން ބައެއް ފަހަރު ފެނެ އެވެ. ވަރަށް ލަދުވެތި އަމަލުތައް ފެންނަ ފަހަރު އާދެ އެވެ. ބައެއް ފަހަރު ފެންނަނީ ވަރަށް ގޮތްކުޑަ، އެހާމެ ދެރަވަރު ކަންކަމެވެ.
މި ފަހަރުވެސް އެފަދަ ކަމެކެވެ. މާލޭ ހިޔާގައި މިއަދު ހިނގި ކަމެކެވެ.
މާލެ ސިިޓީ ކައުންސިލުން ބުނި ގޮތުގައި ކައުންސިލް މުއައްޒަފުން، މާލެ ހިޔާ-2ގެ، ކުނި އަޅާ ސަރަޙައްދުން ކުނި ނެގުމުގެ މަސައްކަތް ކުރަމުން ދަނިކޮށް، އެ ޢިމާރާތުގެ ފްލެޓެއްގެ ބަދިގެއާ ވީފަރާތު ބެލްކަނިން، ހަޑިވެފައި ހުރި ކާ އެއްޗިއްސާ، އެކި ބާވަތުގެ ކުނި އަޅާފަހުރި ކޮތަޅެއް ވަނީ ވައްޓާލާފަ އެވެ.
އަދި އެ ވަގުތު އެތާގައި މަސައްކަތްކުރަމުންދިޔަ މާލެ ސިޓީ ކައުންސިލްގެ މުއައްޒަފެއްގެ ބޮލުގައި ކޮތަޅުން ޖެހި، އެ މީހާގެ ބޯ ދުޅަވެ، އެ މީހާއަށްވަނީ އަނިޔާވެފައެވެ. ކޮތަޅުގައި ހުރީ ރިހަތަކުން މުޅި މީހާގެ ބޮލާއި ކަނދުރާ ވަނީ ހަޑިވެފަ އެވެ.
ބެލެވޭ ގޮތުން މިއީ ގަސްތުގައި ކުރި ކަމެކެވެ. ނޫނީ ބަލަންވާވަރަށް ނުބަލާ ކޮތަޅު އެއްލާލުމުގެ ނަތީޖާ އެވެ. ކޮންމެ ގޮތެއް ވެސް މިއީ އަމަލުކޮށްގެންވާނެ ގޮތެއް ނޫނެވެ. ފްލެޓްގެ ބެލްކަންޏަށް ނިކުމެ ކުނިކޮތަޅު ހޫރާލާ ގޮތަށް އޮންނަ އުސޫލެއް ނޯވެ އެވެ.
ކައުންސިލުން ވަނީ މާލެ ހިޔާ ފްލެޓްތުގެ ކުނި، އެ ކައުންސިލުން ޤަވާޢިދުން ނަގަމުން ދަނިކޮށް، މި ފަދަ ނާ ތަހުޒީބު، ދަށު ދަރަޖައިގެ ޢަމަލު ހިންގުމަކީ، އެއް ވެސް ގޮތަކުން ބަލައިގަނެވޭނެކަމެއް ނޫން ކަމަށް ބުނެފަ އެވެ. އެހެންކަމުން، މި ފަދަ ވިޔާނުދާ ޢަމަލުތައް ތަކުރާރު ނުކުރުމަށް، އިލްތިމާސް ކޮށްފައިވެ އެވެ.
ކައުންސިލުން މިކަމާއި ގުޅޭ ޕޯސްޓްކުރުމުން އެތައް ބަޔަކު ވަނީ އެކަން ކުރި ބަޔަކު / މީހަކު ހޯދާ ހަރުކަށި ފިޔަވަޅު އެޅުމަށް ގޮވާލާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
